Read wanga YOELI 1 Bible Online

YOELI 1 - wanga bible

YOELI 1

¹OMWAMI Nyasaye yaboolela Yoeli, omusiani wa Petsweli ari,

²Recheresie kano inywe abakofu, reche amarwi inywe mwesi abamenyanga mushialo shia Yuda. Eshindu shinga shino shiekholekhakhwo mubulamu bwenywe, noho kata mutsinyanga tsiabakuuka benywe noho?

³Boolele abaana benywe amakhuwa kano, nabo abaana benywe baliboolela abaana babwe, nabo abaana babwe abo baliboolela abolwibulo luloondakhwo.

⁴Olucheka lwa tsisiche lumaamiile ebiraache, nabio ebia tsisiche tsileshile obwoonya buliile, nabio ebiobwoonya buleshile tsikhungu tsiliile, nabio ebia tsikhungu tsileshile, tsisiche etsia amatongolo tsiliile.

⁵Inywe abameesi, buushe mwikhuule, khupe tsimbungu inywe mwesi abanywi beidivai, okhuba tsinzabibu tsiosi etsiokhukaasia idivai indooro tsisasiibwe.

⁶Olucheka lwetsisiche lumaamile eshialo shiefwe, tsisiche etsio netsiamaani khandi tsinyinji tsilanyala okhubalwa tawe. Ameeno katsio kali shinga akeitalanyi, nako amatere katsio kali shinga akeitalanyi ikhasi.

⁷Tsisiche etsio tsisasiye emitsabibu chiefwe, khandi tsinyanyile emikhuyu chiefwe, tsikhoboole amakhoba kemisaala echio nitsikasukuna hasi, tsileshile amasaka kachio nikalabile tswe.

⁸Mwikhuule shinga omukhaana omushisila owifwalile ebifwalo biamakunia, owikhuula khulwa okhufwa khwomusaatsa oushimuselelanga.

⁹Emisango chieimele nende echieidivai shichireerungwa muhekalu ya OMWAMI Nyasaye tawe. Abesaaliisi bamukhalabanilanga OMWAMI Nyasaye bekhuula.

¹⁰Emikunda chisikaale emikhaya, liloba likhuula, okhuba imele yisasiibwe, idivai yihwele, nako amafura kemiseituni shikanyoolekhanga tawe.

¹¹Mubeelele inywe abalimi, mukhupe tsimbungu inywe abaakanga emikunda chiemitsabibu, okhuba ingano nende ishayiri nende ebiraache bindi biosi bisasiibwe.

¹²Emitsabibu chiumile, emikhuyu chifululuushe, emisaala chiamakomamanga, echiamashindu, nende echiamachungwa chiumile, emisaala chiosi echiomumikunda chiumile. Abandu babula obusaangaafu.

¹³Inywe abesaaliisi, fwale ebifwalo biamakunia nimwikhuula, khupe tsimbungu inywe abakhalabani ba hashimalilo shiemisango; Tsie mwinjile muhekalu nimwifwalile ebifwalo biamakunia, mwikhuule eshilo shiosi, okhuba emisango chieimele nende echieidivai shichiliho echiokhuhaanila Nyasaye wenywe tawe.

¹⁴Lachilisie abandu okhwiyima ebiokhulia khulwa okhusaaya, lanje omukhung'ano kwabandu boosi, khung'asie abakofu, nende boosi abamenya mushialo shia Yuda, boosi betse muhekalu ya OMWAMI Nyasaye, Nyasaye wenywe, mana bamuhaabile OMWAMI Nyasaye.

¹⁵Inyanga eyo yilaba mushilaamo shobubi, inyanga ya OMWAMI Nyasaye yili ahambi, inyanga ya Nyasaye Owobunyali Bwosi alireera obusasishi.

¹⁶Ebiokhulia biefwe bisasiibwe nikhureerekhwo tsimoni, obusaangaafu nende tsinzekho shibiliho munzu ya Nyasaye wefwe tawe.

¹⁷Imwo yibolelanga mwiloba, nabio ebiachi bieshiokhulia bisikaale ebikhaya, khandi bisasiishe khulwa okhubula imele yokhubiikhamwo.

¹⁸Lole shinga olwa tsisolo tsiana mushibeela, amatuuli ketsing'ombe kachendachenda khulwa okhubula obwayilo, kata amatuuli kamakondi koosi kanyakhana.

¹⁹Ekhuhaabila iwe OMWAMI Nyasaye, okhuba omulilo kusambile obwayilo bwosi, khandi tsimemu tsiakwo tsisambile emisaala chiosi.

²⁰Kata tsisolo nabulimo tsikhuhaabila iwe, okhuba emialo nende emichela chiosi chikhamile, nakwo omulilo kusambile obwayilo bwomushitsiimi bwosi.