Read wanga YOELI 2 Bible Online

YOELI 2 - wanga bible

YOELI 2

¹Khupe olwika mu Zayuni, khupe oluhungu khushikulu shianje eshitakatifu! Inywe mwesi abamenyanga mushialo shia Yuda mutechele, okhuba inyanga ya OMWAMI Nyasaye yitsanga, tooto yisitile ahambi.

²Inyanga eyo neyeshiilima khandi niyeshibeela, niyinyanga yamaleesi khandi eyeshiilima eshimali ti. Olucheka lwetsisiche olukhongo lwitsanga, lwitsa shinga eshiilima eshifuunikha ebikulu. Eshindu shinga eshio shishili okhwikholekhakhwo ta, kata shishiakhaloleshekhwo khandi mulwibulo lwolunyuma tawe inziayo.

³Tsisiche etsio tsisasinjia ebiraache ebili imbeli watsio biosi, shinga olwa omulilo kusasinjia ebiraache, eshialo eshili imbeli watsio shili shinga omukunda kwa Edeni, nebutswa inyuma watsio neshitsiimi eshikhaya, shibulaho eshihonokokhanga okhurula khutsio.

⁴Tsisiche etsio tsifwana shinga tsifarasi, khandi tsiseeranga shinga tsifarasi tsielihe.

⁵Tsiruuma khubutenje bwebikulu, nitsikhola obuyoka shinga obwa amakaari kelihe. Khandi tsikhola obuyoka shinga obwobunyasi busambwa nomumulilo. Tsisiche etsio tsiiyanzile mutsinyaali shinga omukanda omukhongo kwabelihe aberecheeshe okhulwana.

⁶Olwa tsisita hambi, buli mundu atiilwa noburi obukhongo, khandi buli mundu asaamuukha mumoni.

⁷Tsiseera shinga abelihe, tsiniina amasiisi aketsingoba shinga abalwani belihe, tsichenda nitsitsia imbeli shilunji, buli ndala khunjila yayo, ne shitsikotokhanga okhurula khunjila tawe.

⁸Shitsituyanangakhwo ta, buli ndala yichendanga khunjila yayo. Tsibira bubira mubimanulwa bielihe, ne shibulaho eshinyala okhutsiikalila.

⁹Tsisiche etsio tsiruumila khwitookho, tsiilushila khumasiisi. Tsiniina nitsiinjila mutsinzu tsiinjilila mumatirisha shinga abeebi.

¹⁰Olwa tsiitsa, eshialo shirenga, nalio likulu litechela. Eliuba nende omwesi biilima ti, natsio tsing'ining'ini tsilekha okhwakha.

¹¹OMWAMI Nyasaye alaka abelihebe nomwoyo omukhongo, abelihebe nabanji muno, nabo abamuhulilanga nabanji muno abalanyala okhubalwa tawe. Tooto mwene inyanga ya OMWAMI Nyasaye niyikhongo khandi neyamariisia muno, niwiina ounyala okhuchiifwila?

¹²Isie OMWAMI Nyasaye emboola endi, “Kata bulano, mwikalukhasie nimungalushila nemioyo chienywe chiosi, muhonje inzala khulwokhusaaya, nimulila nende okhwikhuula.

¹³Shimularandula tsingubo tsienywe khulwa okhulolesia eshibeela shienywe ta, habula mungalushile nomwoyo kwokhwiyama obwonooni bwenywe.” Mumukalushile OMWAMI Nyasaye wenywe, okhuba ye nowobukoosia khandi nowetsimbabasi, shiasinyikhanga bwangu ta, khandi nomunji owobuheeli oburalilu, buli lwosi ye wayerechekha okhulekha okhuhaana eshinyasio.

¹⁴Haundi OMWAMI Nyasaye wenywe anyala okhukalukhasia amapaaroke, namulaamila tsikhabi etsiokhunyoola ebiakhulia ebinji, mana mumuhaanile emisango chieimele nende idivai.

¹⁵Khupe olwika mu Zayuni, mulachilisie inyanga yokhuhonga inzala khulwokhusaaya, mulaanje omukhung'ano omutakatifu.

¹⁶Khung'asie abandu halala, mwahule abomukhung'ano, reere halala abakofu, khung'asie abaana, kata abaana abashinuuna. Omwene shiselelo arule mushisikashie, naye omweha arule mulububilwe.

¹⁷Abesaaliisi, abali abakhalabani ba OMWAMI Nyasaye, balile nibekhuula nibali hakari heshimalilo shiemisango nende habwinjililo bweihekalu: bekhuule nibaboola bari, “Iwe OMWAMI Nyasaye, obeele abandubo tsimbabasi, shiolalekha abandu bobulaamebwo okhuchaaywa, nibanyekwa nende abamahanga kandi, nibaboola bari, ‘Nyasaye wabwe ali heena’ ta?”

¹⁸Mana OMWAMI Nyasaye nabeelelela eshialoshie, khandi natiilwa netsimbabasi khulwa abandube.

¹⁹Nakalusia abandube nababoolela ari, “Bulano ndalamurumila imele, idivai nende amafura, mana muleekura, ne shindalamukholakhwo abandu abokhunyekwa mumahanga kandi khandi tawe.

²⁰Ndalarusiaho omukanda kwabasuku, okuli elubeka lwemasaba, ndalakuloondachila okhuula mushitsiimi. Abomukanda kweimbeli ndalabasundula munyanza yomunyu, nabo abomukanda kweinyuma ndalabasundula munyanza ya Hakari. Emilambo chiabwe chilabolelamwo nichihunya obubolo. Ndalabasasia khulwa amabi ka bamukholela.

²¹Inywe abokhushialo, shimularie ta, habula musaangaale nimwikhoya, okhuba OMWAMI Nyasaye akholile amakhuwa amakhongo.

²²Inywe tsisolo nabulimo, shimularie ta, okhuba obwayilo bwomushitsiimi bukwile liswa eliomuboka, emisaala chiamia ebiamo biachio, nachio emitsabibu nende emikhuyu chiosi chiama mubunji.

²³Inywe abandu ba Zayuni musaangaale, khandi mwikhoye mu OMWAMI Nyasaye wenywe, okhuba amureereere ifula yeirootso, khandi amukwisiliye ifula eyihela, amureereere ifula yeirootso nende eyeshiubwe shinga olwa yakholanga khale.

²⁴Olwanyi lwokhuseselakhwo imele luletsuulakhwo imele khandi, natsio tsineemo tsiletsulamwo idivai nende amafura.

²⁵Ndalamurunga emiyika echio chiosi, echiolucheka lwetsisiche lwasasia ebiraache bienywe, ndalamukalusilia buli shindu eshiasasibwa netsisiche, tsikhungu, nende obwonya, ebia isie omwene ndamurumila okhuseera inywe.

²⁶Mulaba nebiokhulia ebinji, khandi mulekura. Muletsoomia eliira lia OMWAMI Nyasaye wenywe, owamukholela akokhuchenya ako. Mana abandu banje shibalafwimbibwakhwo omurwe khandi tawe.

²⁷Mana inywe abandu ba Isiraeli, mulamanya mbu, isie endi halala ninenywe, khandi mbu isie OMWAMI Nyasaye, nisie Nyasaye wenywe, ne oundi shialikhwoho tawe. Ne abandu banje shibalafwimbwa omurwe khandi tawe.”

²⁸“Mana olunyumakhwo, ndilisundula Roho wanje mubandu boosi, abaana benywe abasiani nende abakhaana balirumbula akobulakusi, abakofu benywe baliloora amalooro, nabo ababuukha benywe balilola amalolelo.

²⁹Mutsinyanga etsio, ndilisundula Roho wanje, kata mubakholi beshisaatsa nende abeshikhasi.

³⁰Ndililolesia ebilolelo biamakana mwikulu nende khushialo, nabio biliba amatsayi, omulilo nende tsisiilo tsiomwosi.

³¹Eliuba lilikwa eshiilima, nakwo omwesi kulikwa omwakhanyu, inyanga ikhongo khandi eyamarisia ya OMWAMI Nyasaye eyo niyishili okhuula.

³² Ne nolwa abalimuhaabila OMWAMI Nyasaye booosi balihonibwa, okhuba mushikulu shia Zayuni nende Yerusalemu, balibamwo abalihonokokha, ne mubo, balibaho aba isie OMWAMI Nyasaye ndalanga, shinga olwa isie omwene ndamala okhuboola.”