Read wanga YOELI 3 Bible Online

YOELI 3 - wanga bible

YOELI 3

¹OMWAMI Nyasaye aboola ari, “Mutsinyanga etsio, khandi mubise ebio, ndakhakalusilie Yuda nende Yerusalemu tsikhabi tsiabwe,

²ndilikhung'asia amahanga koosi halala, ne nekakholomosia nekayila mwibanda lia Yehoshafati. Ebweneyo ndilikakhalachila eshiina khulwa amakhuwa kabakholela abandu banje abobulaame ba Isiraeli. Amahanga ako kasalaasia abandu banje mubialo bindi ebicheni. Bakabana eshialo shianje shia Isiraeli.

³Khandi bakhupa ikha khulwa okhukabana abandu banje, bakusia abaana abasiani khulwa okhunyoola amapesa akokhurunga abatamba, khandi bakusia abaana abakhaana khulwa okhunyoola amapesa kokhukula idivai nibanywa.

⁴ “Nishiina eshia muteemanga okhuukholela inywe Tiro, nende Sidoni nende tsimbeka tsiosi etsia Filisitia? Mwenyanga okhurunga elia ndakhola noho? Ne nimuba nimurunga, nasi ndalamurunga inywe bwangu habwene nahabwene.

⁵Mwabukula ifeetsa yanje, itsahabu yanje, khandi mwayila amabishilo kanje akobukusi mutsihekalu tsienywe.

⁶Mwakusia abandu ba Yuda nende Yerusalemu khu Abagiriki, nimubayila ehale okhurula khushialo shiabwe.

⁷Nebutswa bulano enzia okhubakalusia okhurula ewa mwabakusia, mana ndalamukholela inywe malala tsana ako akamwabakholela.

⁸Ndalakusia abaana benywe abasiani nende abakhaana khubandu ba Yuda, nabo balabakusia khubandu ba Sheba, lihanga elili ehale muno. Isie OMWAMI Nyasaye emalile okhuboola.

⁹Mulandie likhuwa lino mumahanga koosi, mwirecheshe okhulwana lihe, lanje abalwani benywe abalulu, lanje abelihe benywe boosi halala, boosi betse imbeli.

¹⁰Yiranye tsimbako tsienywe tsibe tsinganga, natsio tsinjeso tsienywe tsibe amafumo, kata oulali namaani ta, aboole ari, ‘Siesi khandi endi omulwani omululu.’

¹¹Yitse bwangu, inywe amahanga koosi akali ahambi, mana mukhung'ane halala mwibanda.” Iwe OMWAMI Nyasaye, ruma abelihebo beetse baseere amahanga.

¹²“Kho leshe amahanga kerecheshe, mana keetse mwibanda lia Yehoshafati, okhuba ebweneyo niyo ewa ndalakhalachila amahanga koosi akali ahambi eshiina.

¹³Kho bukule tsinjeso tsienywe, okhuba ebise bielichesa biulile, mwinjile, mubasenachile hasi shinga abasenachila emitsabibu echitsuule mushitiinyilo shiachio. Obumayanu bwabwe nobunji muno.”

¹⁴Emikanda emikhongo chili mwibanda eliokhukhalachilwamwo eshiina, okhuba inyanga ya OMWAMI Nyasaye, yili ahambi mwibanda liobukhalachi elo.

¹⁵Eliuba nomwesi biilima, natsio tsing'ining'ini tsilekha okhwakha.

¹⁶OMWAMI Nyasaye alihoolelanga Zayuni, omwoyokwe kulikukumilanga Yerusalemu, nalio likulu nende eshialo bilirenga. Nebutswa OMWAMI Nyasaye aliba obwilushilo bwabandube, khandi aliba olukoba lwabaana ba Isiraeli.

¹⁷“Mana inywe Abaisiraeli mulimanya mbu, isie nisie OMWAMI Nyasaye wenywe, oumenyanga mushikulushie eshitakatifu shia Zayuni. Yerusalemu lilaba litookho litakatifu kata abasuku shibalalitiilakhwo khandi tawe.

¹⁸Ne khunyanga eyo, ebikulu biliroonyia idivai imilamilu, amabeele kalikholomokha mungulu shinga amaatsi, emichela chia Yuda chiosi chiliitsulamwo amaatsi, nayo isebele yilifutukha munzu ya OMWAMI Nyasaye, niyisama amaatsi mwibanda lia Shitimu.

¹⁹Eshialo shia Misiri shilikwa likunda, nashio eshia Edomu nishikwa eshitsiimi eshikhaya, okhuba baseera abandu ba Yuda mana nibeera abandu babula eshikha.

²⁰Nebutswa abandu balimenya mushialo shia Yuda inziayo, khandi balimenya mu Yerusalemu inziayo.

²¹Ndilihelesia abeera abandu ba Yuda eshinyasio, ne shindalaleshelakhwo abali neshikha ta, okhuba isie OMWAMI Nyasaye emenyanga mushikulu shia Zayuni.”