Read wanga AMOSI 1 Bible Online

AMOSI 1 - wanga bible

AMOSI 1

¹Amakhuwa ka Amosi, owali mulala khubaayi okhurula mwitookho lia Tekoa. Nyasaye yamubisulila amakhuwa kano koosi khu Isiraeli, nichishili emiyika chibili kho eshialo shirenje, olwa Uzia yali nali omuruchi wa Yuda, naye Yeroboamu, omusiani wa Yehoashi, nali omuruchi wa Isiraeli.

²Amosi yaboola ari, “OMWAMI Nyasaye ahoola nali khushikulu shia Zayuni, omwoyokwe kukukuma nali Yerusalemu. Obwayilo buniala, nabwo obunyasi obuli khubutenje bweshikulu shia Karimeli buniala.”

³OMWAMI Nyasaye aboola ari, “Abandu ba Damasiko bakhola obwonooni akhandi akhanji, ne khulweshio okhuula embahelesie eshinyasio. Bakhupa abandu ba Giliadi shinga abahuula imele nebihuulilo bieshibia.

⁴Kho ndalaruma omulilo okhusamba inzu yoburuchi ya Hazaeli, khandi ndalasamba tsingoba, etsiombakhwa nomuruchi Benihadadi.

⁵Ndalakwisia hasi emiliango chiebiliibwa bia Damasiko, ndalarusiaho abamenya mwibanda lia Aweni, omuruchi wa Betsi-edeni, halala nende abandu ba Siria balayilwa mubuhambe mushialo shia Kiri.” Nolwa OMWAMI Nyasaye aboola.

⁶OMWAMI Nyasaye aboola ari, “Abandu belitookho lia Gaza bakhola obwonooni akhandi akhanji, ne khulweshio okhuula embahelesie eshinyasio. Babukula abandu belihanga liosi mana nibabakusia khubandu ba Edomu shinga abasumba.

⁷Kho ndalaruma omulilo khumasiisi kelitookho lia Gaza, mana kusambe tsingoba tsialio tsiosi.

⁸Ndalarusiaho abamenya Ashidodi, halala nende omuruchi wa Ashikeloni. Ndalahaana eshinyasio khwitookho lia Ekironi, ne Abafilisiti boosi abatong'aho mwoyo balafwa.” Nolwa OMWAMI Nyasaye aboola.

⁹OMWAMI Nyasaye aboola ari, “Abandu belitookho lia Tiro bakhola obwonooni akhandi akhanji, ne khulweshio okhuula embahelesie eshinyasio. Babukula abandu belihanga liosi, nibabayila mubuhambe mushialo shia Edomu, ne shibaaliinda indakano yobwitsa, eya bali nibakaasia tawe.

¹⁰Khulweshio ndalaruma omulilo okhusamba amasiisi kelitookho lia Tiro, omulilo kulasamba tsingoba tsialio tsiosi.” Nolwa OMWAMI Nyasaye aboola.

¹¹OMWAMI Nyasaye aboola ari, “Abandu ba Edomu bakhola obwonooni akhandi akhanji, ne khulweshio okhuula embahelesie eshinyasio. Bayiima abaana babwe, Abaisiraeli nende tsinganga ne shibababeelakhwo tsimbabasi tawe. Liruma liabwe liali elinji muno, khandi shiliahwakhwo kata nahatuutu tawe.

¹²Khulweshio ndalaruma omulilo khwitookho lia Temani, ne kulasamba tsingoba tsia Bozira.” Nolwa OMWAMI Nyasaye aboola.

¹³OMWAMI Nyasaye aboola ari, “Abandu ba Amoni bakhola obwonooni akhandi akhanji, ne khulweshio, okhuula embahelesie eshinyasio. Baarasiamwo tsinda tsiabakhasi bali tsinda mu Giliadi, khulwa okhubambula tsinzakho tsiemikunda chiabwe.

¹⁴Khulweshio ndalaruma omulilo khumasiisi kelitookho lia Raba, nakwo kulasamba tsingoba tsialio tsiosi. Tsimbungu tsinyinji tsiakhabeho khunyanga ya lihe elo, lihe elo liakhabe likhongo shinga omuyeka kweimbumbuyeka.

¹⁵Omuruchi weshialo shia Amoni halala nende abemilisibe bakhayilwe mubuhambe.” Nolwa OMWAMI Nyasaye aboola.