Read wanga AMOSI 2 Bible Online

AMOSI 2 - wanga bible

AMOSI 2

¹OMWAMI Nyasaye aboola ari, “Abandu ba Moabu bakhola obwonooni akhandi akhanji, ne khulweshio okhuula embahelesie eshinyasio. Basamba amakumba komuruchi wa Edomu nikakwa likoshe.

²Khulweshio ndalaruma omulilo mushialo shia Moabu, ne kulamulula tsingoba tsielitookho lia Keriotsi. Abandu ba Moabu balafwila mundiri eyo, balafwa nibaayula nalwo olwika nilukhupwa,

³Ndalarusiaho omuruchi welihanga lia Moabu, ndalamwira halala nende abemilisi balio boosi, Nolwa isie OMWAMI Nyasaye emboola.”

⁴OMWAMI Nyasaye aboola ari, “Abandu ba Yuda bakhola obwonooni akhandi akhanji, khulweshio okhuula embahelesie eshinyasio. Bakhaya okhuhulila amalako kanje, khandi shibaalonda amebaalo kanje tawe. Bakoyasibwa nabanyasaye bobubeeyi babaakuuka babwe benamilanga.

⁵Kholweshio ndalaruma omulilo mushialo shia Yuda, nakwo kulamulula tsingoba tsielitookho lia Yerusalemu.”

⁶OMWAMI Nyasaye aboola ari, “Abandu ba Isiraeli bakhola obwonooni akhandi akhanji, ne khulweshio, okhuula embahelesie eshinyasio. Bakusinjia abandu abalunjishi mubuhambe, okhuba shibanyala okhurunga amakofi kabwe ta, khandi bakusinjia abamanani abalanyala okhurunga likofi lietsipatipati.

⁷Basenachila hasi abamanani nibarusia abasanda okhurula khunjila tsiabwe. Omusiani nende samwana bakonanga nomukhana omuhambe mulala, mana bafwimbia isie omurwe.

⁸Abaisiraeli beyalisinjia habuli shimalilo shiemisango, khutsingubo tsiabukulwa okhurula khubamanani shinga omusingo. Babukulanga idivai okhurula khubamakofi babwe, nibachinywela muhekalu yanje isie Nyasaye wabwe.

⁹Kata kario inywe abandu banje, isie ndamulula Abamori khulwenywe, abandu abali abarambi shinga emisaala chiemisiita, khandi abamaani shinga omuruba.

¹⁰Ndamuyinia inywe okhurula mushialo shia Misiri, nemwimilila khulwa emiyika amakhumi kane (40) mushitsiimi, mana nemuhelesia eshialo shia Abamori okhuba eshienywe.

¹¹Ndaahula balala khubasiani benywe okhuba abalakusi, khandi balala khubasiani benywe ababuukha okhuba Abanasariti.[1] Inywe abandu ba Isiraeli, shikali kario noho? Nolwa isie OMWAMI Nyasaye emboola.

¹²Nebutswa mwachila Abanasariti nibanywa idivai, khandi nimukaya abalakusi okhuboola amakhuwa kanje.

¹³Bulano ndalamufwinyila hasi, shinga olwa likaari lifwinyanga niliitsuulemwo imele.

¹⁴Kata abelukhanga tsimbilo bwangu shibalahonokokha tawe. Abamaani balahwelwa amaani, nabo abelihe shibalahonia obulamu bwabwe tawe.

¹⁵Abalasanga obuyingo shibalaliinda ta, kata ebelushi betsimbilo abalayi shibaleehonokosia ta, kata abelihe abokhutsifarasi shibalahonokokha tawe.

¹⁶Khunyanga eyo, kata abelihe abalulu balasukuna ebimanulwa biabwe mana belushe eshiechenye.” Nolwa OMWAMI Nyasaye aboola.