Read wanga AMOSI 3 Bible Online

AMOSI 3 - wanga bible

AMOSI 3

¹Inywe abandu ba Isiraeli, hulile amakhuwa ka OMWAMI Nyasaye aboolile khwinywe, inywe abelihanga liosi elia yarusia mushialo shia Misiri.

²“Mumahanga koosi akali mushialo, ninywe mwenyene aba ndaahula, niko akachila okhuula emuhelesie eshinyasio khulwa obwonooni bwenywe bwosi.”

³Tooto abandu babili bakhachaaka aluchendo halala nibalafuchilisaniye?

⁴Italanyi yakhahoolela mumutsuru niyilalutsi eshia yiyiima noho? Italanyi imbuukha yakhakhaasa mushimenyo shiayo niyilatiilile eshindu ta?

⁵Mana linyonyi liakhahambwa ahomureko kulali ta? Omureko kwakharekukha okwene nikulatiililekhwo eshindu ta?

⁶Mana olwika lwelihe lwakhakhupwa mwitookho abandu nibalaria ta? Mana amatinyu kakhakwila litookho narali OMWAMI Nyasaye oukholile ta?

⁷Tooto mwene OMWAMI Nyasaye shiakholanga likhuwa liosi, nalamanyisiyekhwo abakhalabanibe abalakusi lichoomolie tawe.

⁸Olwa italanyi yihoola, niwiina oulanyala okhuria ta? Olwa OMWAMI Nyasaye aboola, niwiina owakhachweya okhurumbula amakhuwake?

⁹Boolele boosi abamenya mutsinzu tsioburuchi tsia Misiri nende Ashidodi mbu, “Mwikhung'asie halala khubikulu ebili ahambi Samaria, mana mulole amanyakhano amakhongo kalimwo nende amabi akakholungwa ebweneyo.”

¹⁰OMWAMI Nyasaye aboola ari, “Abandu bano shibamanyile okhukhola aka habwene tawe. Betsusinjia tsinzu tsiabwe tsingali nebindu ebiabanyoolile mukhuyaaya nende mukhunuula.

¹¹Khulweshio isie OMWAMI Nyasaye omwene mahe emboola endi, ‘Omusuku alabotokhana eshialo shiabwe, nafunaka tsingoba tsiabwe, nende okhuyaaya tsinzu tsiabwe tsikhongo.’ ”

¹²OMWAMI Nyasaye aboola ari, “Shinga olwa omwayi ayininjia mumunwa kweitalanyi ebilenje bibili noho eshirwi shilala ebielikondi lieitalanyi yiliilekhwo, nolwa abandu ba Isiraeli abamenya mu Samaria bakhahonokosibwe. Baliba butswa nende eshitali shiafunikha nende obulili bwarandukha.”

¹³OMWAMI Nyasaye mwene mahe aboola ari, “Recheresie bulano emuboolele inywe abolwibulo lwa Yakobo.

¹⁴Khunyanga ya ndakhahaane eshinyasio khubandu ba Isiraeli khulwobwonooni bwabwe, ndakhasasie ebimalilo biemisango bia Betseli. Ndakharemache tsinzika tsieshimalilo eshiemusango tsiosi nitsikwa hasi.

¹⁵Ndakhasasie tsinzu tsienywe tiamumenyangamwo mutsinyanga tsiomunyiri nende etsia mumenyangamwo mushimiyu. Tsinzu etsiasiaywa nende ameeno aketsinzofu tsiakhasasibwe, kata tsinzu tsingali tsiakhasasibwe.” Nolwa OMWAMI Nyasaye aboola.