Read wanga AMOSI 4 Bible Online

AMOSI 4 - wanga bible

AMOSI 4

¹Hulile kano, inywe abakhasi ba Samaria, abaneranga shinga tsing'ombe tsia Bashani, inywe abasandinjia abateshele, nimukhupia abamanani khushibi, nimulaka mbu, okhuula abasaatsa benywe bamureererenje idivai!

²OMWAMI Nyasaye mwene mahe, ouli omutakatifu alachilisiye ari, “Tsinyanga tsitsanga olwa abandu bakhamukhwese netsindobo nibamuyila ehale, mwesi mwakhabe shinga inyeni khululobo.

³Mwakhakhweswe nimurulila mutsinzafwa tsielisisi, mana mulafuubwa elwanyi.” Nolwa OMWAMI Nyasaye aboola.

⁴OMWAMI Nyasaye aboola ari, “Inywe abandu ba Isiraeli, tsie habundu hatakatifu mu Betseli, mana mukholeleho obwonooni! Tsie Giligali mana mukhole obwonooni neinjinia! Reere emiruko chienywe khulwa okhumalila emisango buli khunyanga, khandi mureere eshitonye shielikhumi shienywe buli khunyanga ya khataru.

⁵Tsiililile okhuhaana emikaate chienywe khulwokhukhupila isie mbu, orio, mana mwikhoyele ebihaanwa bindi ebia muuhaanilanga isie! Okhuba nolwa mwachama okhukhola murio!” Nolwa OMWAMI Nyasaye aboola.

⁶OMWAMI Nyasaye aboola ari, “Nisie owareera inzala mumatookho kenywe koosi, nebutswa shimwakalukha khwisie tawe.

⁷Ndabisia ifula olwa ebiraakwa bienywe biali nibienya ifula, khandi shindakwisiakhwo ifula khwitookho lindi tawe. Ifula yakwa khumukunda mulala ne niyilakwa khumukunda kundi ta ne nikuuma.

⁸Abandu bahutuumana nibarula mwitookho lindi nibatsia mulindi nibakhaabanga amaatsi, nebutswa shibanyoola akabahela tawe. Kata kario shibayangalushila tawe.” Nolwa OMWAMI Nyasaye aboola.

⁹OMWAMI Nyasaye aboola ari, “Ndamurumila obuloolo nende eshimiyu okhusasia emikunda chienywe nende emitsabibu chienywe. Tsisiche tsialia emikhuyu nende emiseituni chienywe chiosi. Ne kata kario, shimwayangalushila tawe.

¹⁰Ndamurumila amanyakhano shinga aka ndarumila abandu ba Misiri. Ndeera abasiani bienywe ababuukha mwihe ne nimbukula tsifarasi tsienywe tsiomwihe. Ndetsusia obubolo bwabandu bafwa mumaheema kenywe. Ne kata kario, shimwayangalushila tawe.

¹¹Ndamulula balala khwinywe shinga olwa ndamulula abandu ba Sodoma nende Komora. Abahonokokhakhwo bali shinga eshichienga shirusiibwe mumuliro. Ne kata kario, shimwayangalushila tawe.

¹²Khulweshio inywe abandu ba Isiraeli, ndalamuhelesia eshinyasio. Ne okhuba ndalamukholela kano, mwikhale nimwirecheeshe okhunyoola obuyaasi bwanje.”

¹³Nyasaye niye owakaasia ebikulu, khandi niye owalonga omuyeka. Akholanga abandu okhumanya amapaaroke, akalukhasinjia eshiteere nishikwa eshiilima, khandi achendanga khubutenje bwebikulu. Eliiralie nilio, OMWAMI Nyasaye!