Read wanga AMOSI 5 Bible Online

AMOSI 5 - wanga bible

AMOSI 5

¹Inywe abandu ba Isiraeli, hulile amakhuwa kolwimbo lwokhwikhuula luno:

²Isiraeli yili shinga omukhaana omushisila oukwile, oukhayilwe okhubuukha khandi. Aleshilwe nakonile hasi, shialiho oumukhoonyelela okhubuukha tawe.

³OMWAMI Nyasaye mwene mahe aboola ari, “Litookho elala mu Isiraeli lilaruma abelihe eshikhumila shilala (1,000), nebutswa balachelela eshikhumi shilala (100) bonyene. Litookho lindi lilaruma abelihe eshikhumi shilala, nebutswa balachelela abelihe ekhumi bonyene.”

⁴OMWAMI Nyasaye aboolela abandu ba Isiraeli ari, “Muukhaabe isie ne mulaba mwoyo.

⁵Shimulakhaabe Betseli ta, kata shimulatsiakhwo Giligali ta, noho shimularuuba oluchendo okhutsia Berisheba tawe. Okhuba tooto mwene abandu ba Giligali baliyilwa mubuhambe, nalio litookho lia Betseli nilisasibwa.”

⁶Khaabe OMWAMI Nyasaye ne mulaba mwoyo, nimulakhola murio ta, aba alamusamba nomulilo, inywe abolwibulo lwa Yosefu. Omuliro kulasamba abandu ba Betseli, ne shialiho oulakusimia tawe.

⁷Muli mushilaamo shiobubi inywe abakalukhasinjia obukhalachi bwa habwene okhuba eshindu eshilulu, ne nimulola obulunjishi okhuba shinga amakokha.

⁸OMWAMI Nyasaye niye awakaasia tsing'ining'ini tsia Inimilo nende etsia Orioni. Akalukhasinjia eshiilima okhuba obulafu, nashio eshiteere okhuba eshilo. Ye atahanga amaatsi okhurula munyanza, mana akasundula khushialo. Eliiralie niye OMWAMI Nyasaye.

⁹Niye oumululanga abamaani nasasia tsingoba tsiabwe.

¹⁰Inywe mwasila abayaasi ba habwene nende ababoolanga obwatooto mushiina.

¹¹Inywe musandinjia abamanani, nimubarunjia obushuru bweimele okhubisia eshichelo. Khulweshio, kata nimuba nimweyumbashila tsinzu tsiamachina, shimulatsimenyamwo tawe. Kata nimuba nimwaraaka emitsabibu emilayi, shimulanywakhwo idivai yirula khuchio tawe.

¹²Okhuba emanyile obumayanu bwenywe bwosi, nende obunji bwobwonooni bwenywe. Inywe musandinjia abalunjishi, nimubukula eshiomufuusi, khandi shimukholelanga abamanani aka habwene mushiina tawe.

¹³Khulweshio, abo abali abachesi bakhoyile okhuholeela tsi mubise biobwonooni shinga ebio.

¹⁴Khaabe okhukhola amalayi, shimulakhola amabi ta, kho munyale okhumenya, naye OMWAMI Nyasaye alaba halala ninenywe shinga olwa muboolile.

¹⁵Sile obwonooni, ne muheele akali amalayi khandi nimukhola aka habwene mumise chiebiina. Haundi OMWAMI Nyasaye alabeela tsimbabasi abandu belihangalie abashiliho mwoyo.

¹⁶Khulweshio, OMWAMI Nyasaye aboola ari, “Tsimbungu tsiakhabeho khumihanda chiosi, nende okhulila khweshibeela mubalima khumikunda. Abalimi bakhalangwe okhwitsa okhwikhuula, nabo abamanya okhwikhuula bakhalangwe okhwitsa okhukhupa tsimbungu.

¹⁷Tsimbungu tsiakhabeho mumikunda chiemitsabibu chiosi. Kano koosi kakhekholeshe, okhuba nditsanga okhumuhelesia eshinyasio.” Nolwa OMWAMI Nyasaye aboola.

¹⁸Muli mushilaamo shiobubi inywe abaliindililanga induukho ya OMWAMI Nyasaye! Namalayi shiina akamulinyoola khunyanga eyo? Khulwenywe yakhabe inyanga yeshiilima, shiyakhabe inyanga yobulafu tawe.

¹⁹Kaliba shinga olwa omundu yelukha ingwe mana abukaane neitalanyi, noho shinga olwa omundu owinjila munzu, nayeesia omukhono khwisiisi ne nalumwa neinzokha.

²⁰Inyanga ya OMWAMI Nyasaye yakhareere eshiilima, nebutswa obulafu ta, yakhabe inyanga yeshiilima eshimali ti, shiyakhabekhwo nobulafu bwosi bwosi tawe.

²¹OMWAMI Nyasaye aboola ari, “Ndasila khandi ndachaaya amasabo kenywe, khandi shiesaangaalilanga emikhung'ano chienywe emitakatifu tawe.

²²Kata nimuukholela emisango chienywe emisambe nende echieimele, shindalabifuchilila ta, kata shindalafuchilila emiruko chienywe echianera echiemisango tawe.

²³Rule hano nobuyoka bwetsinyimbo tsienywe, shindenya okhuhulila amayoosi kamatungu kenywe tawe.

²⁴Leshe akatooto kakholomoshe shinga omwalo, nabwo obulunjishi bukholomoshe shinga omuchela kulakhamanga tawe.

²⁵Inywe abandu ba Isiraeli, isie shindaamulakakhwo mbu, mundeerere emisango nende ebihaanwa khulwemiyika amakhumi kane echia ndamwimilila mushitsiimi tawe.

²⁶Nebutswa bulano, okhuba mumalile okhwinamila ebifwanani bia mwakaasia biomunyasaye wenywe Sakotsi, ouli omuruchi wenywe, nende ebia Kaiwani, omunyasaye wenywe wetsing'ining'ini, okhuula namuchinje ebifwanani ebio,

²⁷olwa nembe nemuyila mubuhambe mushialo shili injelekha wa Damasiko.” Nolwa OMWAMI Nyasaye aboola, oweliiralie ni Nyasaye Wobunyali bwosi.