Read wanga AMOSI 6 Bible Online

AMOSI 6 - wanga bible

AMOSI 6

¹Muli mushilaamo shiobubi inywe abehulilanga obulayi mu Zayuni, nende abehulilanga nibali mumulembe khushikulu shia Samaria! Inywe mulolekhanga okhuba abemilisi belihanga likhongo, ababandu ba Isiraeli bareebanga obukhoonyi.

²Bulano, mutsie mwitookho lia Kaline mana mulihenjekhwo, olunyuma mutsie mulole litookho likhongo lia Hamatsi, mana mukholomoshe okhuula khwitookho lia Gatsi elia Abafilisiti. Oburuchi bwamatookho yako nobulayi okhushila obwenywe noho? Ne eshialo shiako neshikhongo okhushila eshienywe noho?

³Inywe mulobanga okhufuchilila mbu, inyanga yokhumululwa yitsanga, nebutswa akamukholanga kasutinjia inyanga eyo ahambi.

⁴Muli mushilaamo shiobubi inywe abeyalisinjia khubitali biakaasibwa okhurula khumeeno ketsinzofu, nimwilambisia khubifumbi bilikhwo emikotsoro, khandi nimulia inyama yebimoosi ebinefu nende eyebimeeme.

⁵Mwimbanga tsinyimbo tsiabutswa nimutsikhupila amatungu, khandi nimukaasia tsinyimbo tsimbia shinga olwa Daudi yakholanga.

⁶Munywetsanga idivai yoosi mubikaye, nimwibakha amafura keshing'ari eshilayi, ne shimwibeelelelakhwo khubusasishi bwabolwibulo lwa Yosefu tawe.

⁷Khulweshio, mulaba abambeli okhuyilwa mubuhambe, ne amasabo aka abo abelambisinjia kalahwa.

⁸OMWAMI Nyasaye mwene mahe ahaanile lichoomolie likhongo naboola ari, “Esinyisiibwe muno nende okhwichinjimisia khwabandu ba Isiraeli, khandi enjayile tsinzu tsiabwe tsikhongo etsiombakhwa obulayi etsio. Ndalahaana litookho liabwe likhongo nende biosi ebilimwo khubasuku babwe.”

⁹Nibaba nibaliho abandu ekhumi abatonyile munzu ndala, okhuula boosi bafwe.

¹⁰Omwikho womundu oufwile ouba nasinjiliile amasika alayinia omulambo munzu. Omwikho tsana oyo alalanjilisia ouba nasikaale munzu omwo naboola ari, “Omundu undi yakhaba nasikaale ninawe munzu omwo noho?” Ousikaale munzu alakalusia ari, “Tawe!” Naye alamuboolela ari, “Holeela tsi! Shikhulalangakhwo eliira lia OMWAMI Nyasaye tawe.”

¹¹Lole! Olwa OMWAMI Nyasaye alachilisia, tsinzu tsiosi tsikhongo nende tsindiiti tsilibulukha nitsikwa amayindi.

¹²Mana tsifarasi tsiakhelushila khutsinyanda noho? Omundu yakhalima inyanza netsing'ombe noho? Nebutswa inywe mwakalukhasia obukhalachi bwa habwene okhuba obufila nako akatooto okhuba amalulu.

¹³Inywe abekhoyelanga khulwa okhubukula litookho lia Lodebari, mwilayanga nimuboola muri, “Khwabukuule Karinaimu khulwa amaani kefwe abeene.”

¹⁴OMWAMI Nyasaye aboola ari, “Inywe abandu ba Isiraeli, ndalamurumila lihanga licheni okhumuseera, nalio lilamusandia okhurula khubwinjililo bwa Hamatsi, obuli Emulambo, okhuula khumuchela kwa Araba, okuli Emasaba.”