Read wanga AMOSI 7 Bible Online

AMOSI 7 - wanga bible

AMOSI 7

¹OMWAMI Nyasaye mwene mahe yamanyia libisulo lino: Ndamulola niyerechekhanga okhuruma omukanda omukhongo kwetsisiche khushialo. Tsiali tsinyanga tsiomukabo kwebiraache biomuruchi ebiali nibichesilwe nabio ebiraache bindi nibisebukhanga.

²Mwilolelo elo, ndalola tsisiche nitsilia buli shindu eshiali nishisebukhanga. Mana nemboola endi, “Iwe OMWAMI Nyasaye mwene mahe, ekhusaaya mbu okhubeele tsimbabasi! Abandubo bolwibulo lwa Yakobo bakhahonokokha barie! Bo nibatiiti muno!”

³Mana OMWAMI Nyasaye nakalukhasia lichoomolie naboola ari, “Shikalaba kario tawe!”

⁴Khandi OMWAMI Nyasaye mwene mahe yaamanyia libisulo lindi. Mulio, ndalola OMWAMI Nyasaye mwene mahe niyerechekhanga okhuhaana eshinyasio shiokhusamba abandube. Omulilo okwo kwasamba inyanza ingali khandi nikuchaaka okhusamba eshialo.

⁵Mana nemboola endi, “Iwe OMWAMI Nyasaye mwene mahe, ekhusaaya mbu, oleshe! Abandubo bolwibulo lwa Yakobo bakhahonokokha barie? Bo nibatiiti muno!”

⁶Mana OMWAMI Nyasaye nakalukhasia lichoomolie naboola ari, “Shikalaba kario khandi tawe!”

⁷OMWAMI Nyasaye yamanyia lilolelo lindi. Mwilolelo elo, ndalola OMWAMI Nyasaye nasinjiile ahambi khwisiisi, eliali niliombakhwa khulwa khwikhoonyela ikabiro. Yali neikabiro eyo mumukhonokwe.

⁸Mana OMWAMI Nyasaye niyareeba ari, “Amosi, nishiina eshiololanga?” Nasi nemukalusia endi, “Endolanga ikabiro.” Mana naboola ari, “Lola! Ndikhoonyelanga ikabiro yino okhulolesia mbu, abandu banje bali shinga lisiisi liashiama. Ne shindalakalukhasia lichoomo lianje liokhubahelesia eshinyasio tawe.

⁹Habundu wabolwibulo lwa Isaka benamilanga abanyasaye babwe hakhasasibwe. Habundu hatakatifu ha Isiraeli hakhakwisibwe likunda. Ndalaseera nemulula aboluyia lwomuruchi Yeroboamu.”

¹⁰Nebutswa olwa Amazia, omwisaaliisi welitookho lia Betseli yahulila aka Amosi yali naboolanga, yarumila omuruchi Yeroboamu wa Isiraeli amakhuwa kano naboola ari, “Amosi akhukhobanga khubandubo ba Isiraeli, okhuboolakhwe khulasaalisia eshialo shino.”

¹¹Okhuba aboolanga ari, “Yeroboamu aleerwa mwihe, nabo abandu ba Isiraeli balayilwa mubuhambe, ehale muno neshialo shiabwe.”

¹²Mana Amazia naboolela Amosi ari, “Bulano khuchoonyile ninawe, iwe omulakusi. Rula hano! Kalukha mushialo shia Yuda, olakulileyo nonyoolelayo omurungo kwobulakusibwo.

¹³Shiolalakulilakhwo mwitookho lia Betseli lino ta, okhuba ni habundu homuruchi yenamilanga Nyasaye, khandi aha Ihekalu yelihanga liosi.”

¹⁴Amosi nakalusia Amazia ari, “Isie shiendi omulakusi wokhurungwa, mulala khubeshiama shiabalakusi tawe. Isie endi omwayi wamakondi khandi omuliindi wemikhuyu.

¹⁵OMWAMI Nyasaye yaayinia khumulimo kwanje kwobwayi niyamboolela mbu enzie okhuba omulakusi khubandube ba Isiraeli.

¹⁶Bulano iwe Amazia, hulila amakhuwa ka OMWAMI Nyasaye aboola. Iwe umboolelanga mbu, endeshe okhurumbula obulakusi khubandu ba Isiraeli khandi mbu, endeshe okhurumbula amakhuwa ka Nyasaye khubandu bolwibulo lwa Isaka.

¹⁷Khulweshio OMWAMI Nyasaye aboola ari, ‘Omukhasiwo yakhabe omutamba mwitookho lino, nabo abaanabo abasiani nende abakhaana bakhafwile mwihe. Emikundachio chiakhaarwe nichiheebwa abandu bandi, nawe omwene wakhafwile mushialo shiomusilo. Ne tooto mwene abandu ba Isiraeli bakhayilwe mubuhambe ehale muno nende eshialo shiabwe.’ ”