Read wanga AMOSI 8 Bible Online

AMOSI 8 - wanga bible

AMOSI 8

¹OMWAMI Nyasaye yaamanyia lilolelo lindi. Mwilolelo elo, ndalola indubi niyilimwo ebiamo.

²OMWAMI Nyasaye yareeba ari, “Amosi, nishiina eshiololanga yishio?” Nasi nengalusia endi, “Endolanga indubi eyilimwo ebiamo.” Mana OMWAMI Nyasaye niyamboolela ari, “Eshihesi shiulile khubandu banje ba Isiraeli. Shindalakalukhasia lichoomo lianje liokhubahelesia eshinyasio tawe.

³Khunyanga eyo, tsinyimbo tsiomuhekalu[2] tsiakhakwe tsimbungu. Emilambo chiabandu bafwile chiakhabe buli habundu ne chiakhasukunungwe elwanyi mumasilisi.”

⁴Hulile kano inywe abasenachilanga abatakha hasi, nimumulula abamanani bokhushialo.

⁵Muboolanga muri, “Tsinyanga tsiomwesi omuyia netsihwe liina, kho mbu, khunyale okhukusia imele? Inyanga ya Isabato niyihwe liina, kho mbu, khunyale okhukusia ingano yefwe? Olwene olwo nolwa nakhukusie obukusi obukali, nikhwikhoonyela ebichelo ebilali ebia habwene ta, nende okhusasia tsiratili khulwokhwibila abakuli.

⁶Nakhukusie amakhumbili keingano khulwa obukusi obukali. Nakhunyale okhukula abamanani khulwa amapesa, nende okhukula abatakha khulwa obukusi bwebilaaro bietsikaala.”

⁷OMWAMI Nyasaye wa Isiraeli, ouli oluyali lwa Yakobo yetsubile naboola ari, “Tooto mwene, shindakhebilile ebikhole biabwe ebimayanu tawe.

⁸Khulweshio, eshialo shiakharenje, ne buli mundu mushialo yakhekhuule. Eshialo shiosi shiakherunderunde, shiakhatikulushe nishiikha hasi, shinga olwa amaatsi komwalo kwa Naili katikulukhanga nikakholomokha.”

⁹OMWAMI Nyasaye aboola ari, “Khunyanga eyo, ndakhakhole eliuba okhuyeela mushiteere hakari, khandi ndakhelimie eshialo mushiteere.

¹⁰Ndakhakalukhasie amasabo kenywe okhuba amasika, natsio tsinyimbo tsienywe ndakhatsikalukhasie okhuba tsinzikhuulo. Ndakhamukhole inywe mwesi okhwifwala ebifwalo biamakunia khulwa eshibeela, nende okhubeka emirwe chienywe olwaale, shinga omundu owikhuula okhufwa khwomwanawe omutelwa. Inyanga yokhumalilikha yakhabe eyobutsunwi obukhongo.”

¹¹OMWAMI Nyasaye aboola ari, “Tsinyanga tsitsanga etsiandakhareere inzala mushialo. Shiyakhabe inzala yeshiokhulia noho eyobuloho bwamaatsi ta, nebutswa yakhabe inzala yokhuhulila amakhuwa ka OMWAMI Nyasaye.

¹²Abandu bakhachendechende okhurula khunyanza okhuula khunyanza yindi, nende okhurula Emasaba okhuula Ebukwe. Bakhelukhane eyi nende eyi nibakhaaba likhuwa elia OMWAMI Nyasaye, nebutswa shibakhalinyoole tawe.

¹³Khunyanga eyo, ababuukha abasiani nabakhaana bakhakamulile emiuya khulwa obuloho.

¹⁴Abeetsubanga muliira lia Ashima, eshifwanani shiomunyasaye wa Samaria nibaboola bari, ‘Muliira liomunyasaye wa Dani,’ noho ‘Muliira liomunyasaye wa Berisheba,’ bakhakwe ne shibakhabuushekhwo khandi tawe.”