Read wanga AMOSI 9 Bible Online

AMOSI 9 - wanga bible

AMOSI 9

¹Ndalola mwilolelo OMWAMI Nyasaye nasinjiile hashimalilo shiemisango. Naye niyandachilisia naboola ari, “Khupa tsisiilo tsieihekalu etsio obutinyu okhuula olwomuse kwayo kutechela. Ofunache tsisiilo etsio mana tsikwile abandu khumirwe. Ndaleera abalasikala boosi nolukanga, ne abulaho kata mulala khubo oulelukha tawe. Tooto abulaho oulahonokokha tawe.

²Kata nibayaba obuko okhuula emakombe, ndalabarusiayo nomukhono kwanje. Kata nibaniina okhuula mwikulu, ndalabeeshia hasi.

³Kata nibefisa khubutenje bweshikulu shia Karimeli, ndalabakhaaba okhuula olwa embanyoola. Kata nibefisa mulwalo lweinyanza okhurula khwisie, ndalalaka okuyokha kwomunyanza okukali okhubaluma.

⁴Kata nibayilwa mubuhambe nabasuku babwe, ndalalaka mbu, beerwe nolukanga. Ndalabahenjelesia khulwa okhubakholela amabi, halali amalayi tawe.”

⁵OMWAMI Nyasaye, atiilanga khushialo, nashio shirenga, nabo abamenyamwo bekhuula. Eshialo shiosi shifimba nishibombolokha shinga okhufimba nokhubombolokha khwomwalo kwa Naili kwa Misiri.

⁶OMWAMI Nyasaye yombakha litaalalie mwikulu, nafuunikha eshialo nelikulu. Alanjilisinjia amaatsi komunyanza, mana akatsukha khushialo. Eliiralie niye OMWAMI Nyasaye.

⁷OMWAMI Nyasaye aboola ari, “Khulwanje, inywe abandu ba Isiraeli muli shinga abandu ba Etsiopia. Ndayinia Abafilisiti okhurula mushialo shia Kirete nabo Abasiria okhurula mushialo shia Kiri, shinga olwa ndayinia inywe okhurula mushialo shia Misiri.

⁸Isie, OMWAM Nyasaye Wobunyali bwosi ehenganga oburuchi obumayanu buno, ne ndalabumulula khushialo bwosi pe. Nebutswa shindalamulula abolwibulo lwa Yakobo boosi tawe.

⁹Lola, ndalahaana lilako mana eseleetse abandu ba Isiraeli mubialo bindi, shinga olwa omundu achunganga imele khushichungo, kho mbu, erusieho abalakhoyeele.

¹⁰Abonooni abali mubandu banje bakheerwe mwihe nolukanga. Abo nibo ababoolanga bari, ‘Amabi shikalakhukwila noho okhukhunyoola tawe!’ ”

¹¹OMWAMI Nyasaye aboola ari, “Inyanga yitsanga olwa ndakhasinjisie inzu ya Daudi eyali niyakwa. Ndakhombashe amasiisi kayo, nesinjisia obuyia amayindi kayo. Ndalachiumbakha obuyia ibe shinga olwa yalinji khale.

¹²Nabo abandu ba Isiraeli bakhabukule eshialo shia Edomu, eshiliba nishiasikala halala nende amahanga koosi akalinji akanje. Nolwa isie OMWAMI Nyasaye emboolile, ne ndalakhola endio.”

¹³OMWAMI Nyasaye aboola ari, “Tooto mwene tsinyanga tsitsanga olwa ebiraache biakhalabe bwangu nibiyomba abokhubichesa, natsio tsinzabibu tsiakhenje bwangu, nitsiyomba obokhukaasia idivai. Idivai imilamilu yakharoonye okhurula khubikulu, ne yakhachetulushe okhurula khutsingulu.

¹⁴Ndakhakalusie abandu banje ba Isiraeli mushialo shiabwe. Bakhombashe obuyia amatookho kabwe akasikala ne nibakamenyamwo. Bakharaache emitsabibu nibanywa idivai yachio. Bakharaache emikunda nibalia ebirulamwo.

¹⁵Ndakhabasimishe mushialo shiabwe, ne shibakhayinibwekhwo okhurula mushio eshio khandi tawe. Nolwa isie OMWAMI Nyasaye emboola.”