Read wanga YONA 1 Bible Online

YONA 1 - wanga bible

YONA 1

¹Inyanga yindi, OMWAMI Nyasaye yaboolela Yona, omusiani wa Amitai ari,

²“Rula otsie mwitookho likhongo lia Ninewe, orumbule obulakusi nolifukula obutinyu, okhuba emalile okhumanya obumayanu bwabandu balio.”

³Nebutswa Yona yarula nachooma Tarishishi, nateema okhwilukha okhurula khu OMWAMI Nyasaye. Yakholomokha okhuula Yopa, nanyoolayo imeeli eyali niyitsitsanga Tarishishi. Yarunga ne nakhalaka itikiti khulwoluchendo, mana niyenjila mumeeli omwo. Halala nabandu abali mumeeli omwo, yachaaka oluchendo okhutsia Tarishishi, khulwa okhwilukha okhurula khu OMWAMI Nyasaye.

⁴Nebutswa OMWAMI Nyasaye yaruma omuyeka kwamaani amanji, imbumbuyeka niyibaho ikhongo khunyanza, okhuula imeeli niyenya okhufinikha.

⁵Abakholi bomumeeli omwo nibatiilwa noburi. Buli mulala nahaabila omunyasayewe. Bafuuba munyanza emisiko echiali mumeeli khulwokhwanguyia imeeli. Yona naye yali natsiile mushisika shiahasi shieimeeli, niyeyalisiye, tsindoolo tsisiro nitsimuyilile.

⁶Omukhongo weimeli yatsia ewa Yona yali, namubuusia namureeba ari, “Iwe okholanga shiina? Okonanga tsindoolo nokhola shiina? Buukha osaaye omunyasayewo, haundi alakhulolela tsimbabasi khuleshe okhutiba.”

⁷Abakholi bomumeeli nibaboolelana bari, “Chende khukhupe ikha khumanye mbu, niwiina ouchila nikhuba mumatinyu kano.” Kho nibakhupa ikha, nayo niyikwila Yona.

⁸Mana nibamureeba bari, “Khuboolele eshichila nikhuba mumatinyu kano. Ni mulimo shiina okwokholanga? Orula heena? Omenyanga mushialo shi? Ne oli owoluyia shiina?”

⁹Yona nabakalusia ari, “Isie endi Omuheburania. Ndinamilanga OMWAMI Nyasaye womwikulu, owalonga eshialo nende inyanza.”

¹⁰Natsiililila okhubaboolela mbu, yelukhanga okhurula khu OMWAMI Nyasaye. Olwa abakholi abo bahulila bario, batiilwa noburi obunji, nibamureeba bari, “Nishiina eshiokholile shino?”

¹¹Amarunda keimbumbuyeka kameetekha muno, kho nibamureeba bari, “Khukhukhole khurie kho mbu, inyanza yiihotselesie?”

¹²Yona nabakalusia ari, “Mbukule mufuube munyanza, nayo yilehotselesia, shichila emanyile mbu, nisie ouchila imbumbuyeka ikhongo yino niyimunyaasia.”

¹³Kata kario, abakholi abo bateema okhulwana neimeeli okhuchikalusia khuluchinga, nebutswa shibanyalilwa ta shichila amaatsi kameeta okhukhupa amarumda amasiro.

¹⁴Kho bahaabila OMWAMI Nyasaye nibaboola bari, “Iwe OMWAMI Nyasaye, shiolakhumulula khulwa okhumala obulamu bwomundu uno ta. Kata shiolakhuraakhwo obwonooni khulwa okhufwakhwe ta, shichila okholile akakhuchamisiye iwe.”

¹⁵Kho nibabukula Yona, nibamusukuna munyanza, ne habwene nahabwene inyanza niyilenjeela.

¹⁶Kano kachila abakholi abo nibaria OMWAMI Nyasaye muno, ne nibamukholela omusango nende okhuusia ebiitsubo bia bali nibamwitsubiile.

¹⁷Ne OMWAMI Nyasaye nalaka okunyeni okukhongo okhumila Yona, naba munda mwakwo khulwa tsinyanga tsitaru, eshilo neshiteere.