Read wanga YONA 2 Bible Online

YONA 2 - wanga bible

YONA 2

¹Yona nali munda mwokunyeni okwo, yamuhaabila OMWAMI Nyasayewe, naboola ari,

²“Iwe OMWAMI Nyasaye, ndakhuhaabila olwa ndali mumatinyu kanje, nawe waambulila niumbonia. Ndakhulilila nendi hasi Emakombe, nawe wahulila okhulila khwanje.

³Waasukuna mulusiba lweinyanza, hasi bwene khubweru bweinyanza, ewa amaatsi kaafuunikha, nako amarundako amasiro nikaamburing'anakhwo.

⁴Ndapaara mbu usukuune ehale okhurula imbeliwo, ne shindakhalolekhwo Ihekaluyo indakatifu khandi tawe.

⁵Amaatsi kaafuunikha, ninjaaka okhumila emiuya, amaatsi kolusiba kaambotokhana tsimbeka tsiosi, nabwo obulimo bwomunyanza nibunzikanyilakhwo khumurwe.

⁶Ndeyinikha okhuula mulwalo mwebikulu, okhuula mushialo, eshialo shiebiliibwa biashio biekalwa inziayo. Nebutswa iwe OMWAMI Nyasaye, warusiayo neshili mwoyo.

⁷Olwa obulamu bwanje bwali nibuhwelelelanga, ndakhwitsulila iwe OMWAMI Nyasaye, mana nekhuhaabila, nawe noli muhekaluyo indakatifu niumbulila.

⁸Abenamilanga abanyasaye babutswa, balekha obuheeli oburalilu obunyoolekhanga khwiwe.

⁹Nebutswa isie ndalemba nekhwitsoomia, ndalakhukholela omusango, ninduusia aka ndakhwitsubila okhukhola. Okhuba OMWAMI Nyasaye yenyene niye oumboninjia.”

¹⁰Mana OMWAMI Nyasaye nalachilisia okunyeni okwo okhusala Yona khuluchinga lweinyanza, nakwo nikukhola kurio.