Read wanga YONA 4 Bible Online

YONA 4 - wanga bible

YONA 4

¹Nebutswa eshikhole eshio shiasinyisia omulakusi Yona muno.

²Yasaaya OMWAMI Nyasaye naboola ari, “Iwe OMWAMI Nyasaye, shindaboolakhwo kata neshili okhurula mushialo shianje mbu, kano niko akanokhole noho? Kano niko akachila nendeema okhwilukha nihenjile mwitookho lia Tarishishi, okhuba ndamanya mbu, iwe oli Nyasaye wobukoosia khandi wetsimbabasi, Nyasaye wokhwisimilisia khandi wobuheeli oburalilu, oukalukhasinjia lichoomolie liokhuhana eshinyasio khubandu.

³Kho bulano, OMWAMI Nyasaye, ekhusaaya mbu, obukule obulamu bwanje, okhuba nobulayi isie okhufwa okhushila okhubaho mwoyo.”

⁴Mana OMWAMI Nyasaye nareeba Yona ari, “Tooto mwene kali habwene iwe okhutiilwa noburuma?”

⁵Yona yarula elwanyi welitookho, nachooma Ebukwe walio. Yekaasilia litili ne niyekhala hasi mushiinikha shialio naliindilila okhulola aketsa okhwikholekha khwitookho elo.

⁶Ne OMWAMI Nyasaye yakhola omusaala okhumelaho kho mbu, kuhaane eshiinikha khu Yona, nikwikalila omubasu okhumulia. Yona nasaangaala muno khulwa omusaala okwo.

⁷Nebutswa mumabwibwi inyanga yalondakhwo, OMWAMI Nyasaye yaruma inyende niyilia omusaala tsana okwo, mana kuniala, nikufwa.

⁸Olwa eliuba liafwinda, OMWAMI Nyasaye yakhola omuyeka okuyile pia okhurula Ebukwe okhuhuutsa khu Yona. Omubasu omululu nikwakha nikusamba omurwe kwa Yona obululu, nahwa amaani mumubili, okhuula niyekomba okhufwa, naboola ari, “Nobulayi isie okhufwa okhushila okhubaho mwoyo!”

⁹Nebutswa OMWAMI Nyasaye yareeba Yona ari, “Tooto mwene kali habwene iwe okhusinyikha khulwa omusaala okwo?” Yona namukalusia ari, “Ni habwene isie okhusinyikha, kata okhuula okhufwa!”

¹⁰OMWAMI Nyasaye namuboolela ari, “Shiwaraachile omusaala kuno ta, kwamelile okwene mushilo shilala, ne mushilo shilondilekhwo, kunialile. Iwe shiwakukholeelekhwo eshindu shiosi shiosi ta, kho eshichila nokubeelelela nishiina?

¹¹Nasi shiekhoyile okhuteeba litookho lia Ninewe ta noho? Litookho likhongo elo, elilimwo abandu abashila ebikhumila eshikhumi shilala nende amakhumi kabili (120,000) abalamanyile okhwahukhasia aka habwene nende akalali aka habwene ta, khandi elilimwo emiruko eminji!”