Read wanga OBUBALI 10 Bible Online

OBUBALI 10 - wanga bible

OBUBALI 10

¹OMWAMI Nyasaye naboolela Musa ari,

²“Yiranya tsitarumbeta tsibili okhurula khufetsa, mana oshikhoonyelenje okhulanga omukanda halala nende khulwa okhubasumula nibatsia.

³Ne olwa tsiosi tsibili tsikhupwa abomukanda boosi bekhung'asie ewa oli mubwinjililo bweliheema litakatifu.

⁴Nebutswa nibakhupa itarumbeta ndala, betsimbia tsia Abaisiraeli bekhung'asia ewa oli.

⁵Olwa tsikhupwa, ne abomukanda kuli elubeka lwebukwe basumukha.

⁶Ne olwa tsikhupwa olwakhabili, abomukanda bali elubeka lwemulambo basumukha. Itarumbeta ikhupungwe buli olwa baba nibasumukha.

⁷“Ne niwenya okhukhung'asia omukanda kwosi halala, okhupe itarumbeta nebutswa olakhupa oluhungu tawe.

⁸Abasiani ba Haroni, nibo abalakhupa tsitarumbeta. Tsitarumbeta etsio tsilabetsanga lilako lia buli lwosi mutsinzibulo tsienywe tsiosi.

⁹Ne olwa mutsia mwihe mushialo shienywe okhuseera abasuku abamusandia, okhuula mukhupe oluhungu nende tsitarumbeta, kho isie OMWAMI Nyasaye wenywe emukhoonye nende okhumuhonia khubasuku bwenywe abo.

¹⁰Khandi khunyanga yokhwikhoya khwenywe, nende mutsinyanga tsiamasabo kenywe, nende tsiokhulolekha khwomwesi, mulakhupanga tsitarumbeta, nende olwa muhaana emisango chienywe emisambe nende echiokhureera omulembe. Nasi ndalamukhoonya. Nisie OMWAMI Nyasaye wenywe.”

¹¹Mumuyika kwakhabili, omwesi kwakhabili khunyanga ya amakhumi kabili olunyuma olwa Abaisiraeli okhurula Misiri, lileesi liachingukha ikulu okhurula khwiheema litakatifu.

¹²Kho Abaisiraeli nibasumukha okhurula mushitsiimi shia Sinai. Lileesi elo niliyeela khandi mushitsiimi shia Parani.

¹³Basumukha khuluchendo lwabwe khu lilako elia OMWAMI Nyasaye okhubirira khu Musa.

¹⁴Abomukanda kwoluyhia lwa Yuda nibo abaranjilila okhusumukha nibemililwe nende Nashoni omusiani wa Aminadabu.

¹⁵Naye owemilila abomukanda kwoluyia lwa Isakari yali Netsanieli omusiani wa Zuari.

¹⁶Naye owemilila abomukanda kwoluyia lwa Zebuluni yali Eliabu omusiani wa Heloni.

¹⁷Mana liheema elo nilisambulwa ne abeshilibwa shia Gerishoni nende eshia Merari abali abokhuluchinga nibasumukha.

¹⁸Mana abomukanda kwoluyia lwa Rubeni nibalondakhwo, ne omwimilisi womukanda kwabwe yali Elizuri omusiani wa Shedeuri.

¹⁹Ne abomukanda kwoluyia lwa Simeoni bemililwa nende Shelumieli omusiani wa Zurishadai.

²⁰Nabo abomukanda kwoluyia lwa Gadi nibemililwa nende Elisafu omusani wa Deweli.

²¹Mana aboluyia lwa Kohatsi nibaloondakhwo nibachinjile ebibdu ebitakatifu. Liheema liasinjisibwa nibashili okhuulayo.

²²Abalondakhwo bali abomukanda kwoluyia lwa Efuraimu nibemililwe nende Elishama omusiani wa Amihudi.

²³Naye Gamalieli omusiani wa Pedahazuri yemilila abomukanda kwoluyia lwa Manase.

²⁴Naye Abidani omusiani wa Gideoni niyemilila abomukanda kwoluyia lwa Benjamini.

²⁵Mana abomukanda kwoluyia lwa Dani, bamalilikha okhusumukha mumikanda chiabwe, nibali abelihe beinyuma betsikambi tsiosi; ne omwimiliisi womukanda kwabwe yali Ahiezeri omusiani wa Amishadayi.

²⁶Ne Pagieli omusiani wa Okurani yemilila abomukanda kwoluyia lwa Asheri.

²⁷Naye Ahira omusiani wa Enani yemilila abomukanda kwoluyia lwa Nafutali.

²⁸Abandu ba Isiraeli bachenda bario mumikanda chiabwe buli olwa basiulanga liheema nibatsia.

²⁹Mana Musa naboolela Hobabu omusiani wa Yetsiro Omumidiani owali nyakhufialanyene ari, “Khusumukhanga okhutsia habundu aha OMWAMI Nyasaye yaboola mbu, yakhakhuhelesie; OMWAMI Nyasaye yamala okhusuubisia mbu yakhakholele Abaisiraeli amalayi kho witse khutsie ninawe khukabane amalayi ako ninawe.”

³⁰Nebutswa Hobabu yamukalusia ari, “Shindalatsia ninenywe ta, isie ndalatsia khumukunda kwanje nende khubandu banje.”

³¹Nebutswa Musa yamusaaya nabola ari, “Nochama shiolakhulekha ta, shichila niwe oumanyile ewa khunyala okhukhoma tsikambi tsiefwe mushitsiimi; kho niwe oulakhuchelelanga.

³²Ne noba notsia ninefwe amalayi koosi koosi aka OMWAMI Nyasaye alakhukholela efwe, niko aka fwesi khandi khulakhukholela iwe.”

³³Kho Abaisiraeli nibasumukha okhurula khushikulu shia Sinai, nibachenda oluchendo lwetsinyanga tsitaru. Lisanduku lieindakano eya OMWAMI Nyasaye liaranjilila okhutsia oluchendo lwetsinyanga tsitaru, okhubakhabila habundu ahokhuhulushila.

³⁴Ne buli olwa basumukhanga nibarula mukambi, lileesi elia OMWAMI Nyasaye lialinji hekulu wabwe mushiteere.

³⁵Ne buli olwa lisanduku lieindakano elo liasumukhanga, Musa yasaayanga naboola ari, “Iwe OMWAMI Nyasaye, buukha osalasie abasukubo, nabo abakhusila iwe belushe okhurula imbeliwo.”

³⁶Ne buli olwa liheema elo liasinjisibungwa, Musa yaboolanga ari, “Iwe OMWAMI Nyasaye, kalushila ebikhumila nebikhumila bia Abaisiraeli.”