Read wanga OBUBALI 11 Bible Online

OBUBALI 11 - wanga bible

OBUBALI 11

¹Mana abandu nibeyiniakanila Nyasaye OMWAMI, amatinyu aka balola. Ne olwa OMWAMI Nyasaye yakahulila yasinyikha, mana naruma omulilo mubandu abo, nikwakha hakari mubo, khandi nikusamba ebitonye biokhundulo biekambi.

²Mana abandu abo nibamulilila Musa, naye Musa nasaaya khu OMWAMI Nyasaye, mana omulilo okwo nikusima.

³Kho habundu aho nihakulikhwa elira mbu Tabera,[2] shichila omulilo okwa OMWAMI Nyasaye kwakha hakari mubo.

⁴Baliho abarende abachendanga halala nende Abaisiraeli, Nabo bali nolusa lweinyama olunji. Mana kata Abaisiraeli boosi nibachaaka okhwiyiniakana nibaboola bari “Nikhwakhabelekhwo butswa neyinyama khwalia!

⁵Nikhushili Misiri khwalitsanga tsinyeni nikhulakulile ta, khwalitsanga obunuuka, amahondo, eliani, ebitungu nende tsitania,

⁶ne bulaano amaani kefwe kahwele, ne khubulakhwo eshindu shindi shiakhunyala okhulia habula imana butswa!”

⁷Ne imana tsana yalinji shinga imwo yamabele keikhumba, eyobukondo obulafu lafu.

⁸Abandu barulanga nibayitola mana bachisia khuluchina noho bachiswaka mubinu. Mana bachiteshela mutsinyungu, ne bachikasiakhwo emikaate. Ne eshiuya shiayo shialinji shinga eshiuya shiemikaate chiteshilwe namafura.

⁹Olwa liime liamanga khukambi mushilo, ne imana yaama ninalio halala.

¹⁰Mana Musa nahulila abandu nibalilanga mumikanda chiabwe habwinjililo bweliheemalie. Kho OMWAMI Nyasaye natiilwa noburuma obunji, naye Musa nasinyika.

¹¹Kho Musa naboolela OMWAMI Nyasaye ari, “Mbushina niundeerera isie omukhalabaniwo amatinyu kano? Shichila shiina niusinyishila? Shichila shiina niundeshela omusiko kwabandu bano boosi?

¹²Shiendi nisie owebula abandu bano ta! Kho eshichila niumboolela mbu, ebachinje mumakhono kanje shinga ouchinga indana, okhuula mushialo shiawetsuba okhuhelesia abakuuka babwe nishiina?

¹³Ndakhanyoola hena mushitsiimi muno inyama yokhuhelesia abandu bano boosi? Okhuba bandililanga mbu, ebahelesie inyama balie.

¹⁴Shienyala okhuchinga abandu bano sienyene ta, omusiko kuno nomusiro muno khwisie.

¹⁵Nikaba mbu nolwa otsia okhuukholela, ekhusaaya nochama unzire efwe bwangu, kho endeshe okhulola amatinyu kanje kano.”

¹⁶Mana OMWAMI Nyasaye naboolela Musa ari, “Khung'asia abasaatsa amakhumi musafu okhurula mubemilisi ba Abaisiraeli, aba omanyile mbu nabemilisi babandu khandi abasinjilili babwe. Mana obareere mwiheema basinjileho halala ninawe.

¹⁷Nasi ndalekha hasi okhuboola ninenywe yaho. Ndalabukulakhwo iroho yandara mwiwe neyinjisia mubo. Nabo balakhukhoonya okhuchinga omusiko okwo, kho mbu oleshe okhukwitukha wenyene tawe.

¹⁸Bulano boolela abandu ori, ‘Mwisiiye abeene khulwa inyanga ya mukamba, okhuba mulalia inyama. OMWAMI Nyasaye ahuliile nimulilanga khandi nimuboola mbu mwikombanga okhulia inyama, khandi mbu mwali obulayi nimushili Misiri. Bulano OMWAMI Nyasaye alamuhelesia inyama mulie.

¹⁹Shimulachilia khulweinyanga ndala noho tsinyanga tsibili, noho tsinyanga tsirano noho tsinyanga ekhumi noho tsinyanga amakhumi kabili tawe,

²⁰habula khulwomwesi omulamba, okhuula olwa yilamurulila mumolu, khandi yimusinye. Kano kalekholekha kario shichila mulobile OMWAMI Nyasaye ouli hakari mwinywe, ne nimwiyiniakana khuye nimuboola mbu shiamwakharulile Misiri tawe.’ ”

²¹Nebutswa Musa yaboolela OMWAMI Nyasaye ari, “Abandu benzimiliile nabandu ebikhumila ebikhumi bisasaba (600,000) abachendanga khubilenje, nawe oboola mbu, olabahelesia inyama balie khulwomwesi omulamba!

²²Kata nobeerera tsing'ombe namakondi, shibibahela tawe! Kata tsinyeni tsiomunyanza tsiosi nitsikhung'asibwa, shitsibahela tawe.”

²³Naye OMWAMI Nyasaye nareeba Musa ari, “Nishina eshinyala okhukhaya isie? Bulano olalola nikali aka emboolile kekholekha noho tawe.”

²⁴Kho Musa narula, naboolela abandu amakhuwa aka OMWAMI Nyasaye yali naboolile. Nakhung'asia abasaatsa amakhumi musafu khubemilisi babandu, nababotokhasia khuliheema liosi.

²⁵Mana OMWAMI Nyasaye niyekha hasi nali mwileesi naboola nende Musa. Ne nabukulakhwo iroho eya yali niyara mu Musa nachira mubemilisi amakhumi musafu abo. Olwa iroho eyo yabenjilamwo bachaaka okhurumbula shinga abalakusi, nebutswa kali butswa khulweshise shiti.

²⁶Bulano abasaatsa babili khubemilisi abo amakhumi musafu bali nibasikaale mukambi, mulala mbu Elidabu, ne oundi mbu Medadi. Bali balala khubahandikwa nebutswa shibali nibarulile okhutsia ewa liheema liali tawe. Kho nibali mukambi iroho eyo yabenjilamwo, ne boosi nibachaaka okhurumbula shinga abalakusi.

²⁷Ne omuraaka oundi niyelukha naboolela Musa ari, “Elidadi nende Medadi balarumbulanga muliira elia OMWAMI Nyasaye mukambi.”

²⁸Naye Yoshwa omusiani wa Nuni, owali omukhonyeleli wa Musa okhurula muburaakabwe naboolela Musa ari; “Omwami wanje Musa, obakaye!”

²⁹Nebutswa Musa yamukalusia naboola ari, “Khane otiililwe imbalikha khulwanje? Shiakhuha OMWAMI Nyasaye yahelesia abandube boosi irohoye mana boosi baba abalakusi!”

³⁰Mana Musa nende abemilisi amakhumi musafu ba Abaisiraeli abo nibakalukha mukambi.

³¹Mana OMWAMI Nyasaye naruma omuyeka nikuhutsa, nikureera tsisindu okhurula munyanza, ne nitsikwa ahambi neliheema, nitsibunjikha khwiloba oburambi buhela ahambi tsifuti tsitaru, ne nitsibotokhana tsimbeka tsiosi tsieliheema habundu hanyala okhuhela oluchendo lweinyanga ndala.

³²Mana khunyanga eyo yosi nende eshilo shiosi nende inyanga yaloondakhwo yosi, abandu barula nibatoola tsisindu. Oyo owatoola tsinemu muno yatoola amatebe ekhumi. Mana nibatsibakala okhuuma nitsibotokhana liheema liosi.

³³Olwa bali nibashilitsanga tsisindu etsio, nibashili okhutsimala, OMWAMI Nyasaye yatilwa noburuma khubandu mana nabarumila eshinyasio eshikhongo.

³⁴Khulweshio habundu yaho nihakulikhwa mbu, Kibirotsi-hatava, eshisina mbu: “Ebilindwa biobwikombi” shichila baliho abandu abali nobwikombi bayabilwayo.

³⁵Okhurula Kiburotsi Hatava abandu bachenda okhuula Hazerotsi, ne nibakhomayo ikambi yabwe.