Read wanga OBUBALI 12 Bible Online

OBUBALI 12 - wanga bible

OBUBALI 12

¹Mana Miriamu nende Haroni nibamoonya, Musa, shichila yali niyateshia omukhasi okhurula mu Abakushi[3]

²Nibareeba bari, “OMWAMI Nyasaye yaboola butswa nende Musa yenyene noho? Shiyaboola kata ninefu fwesi?” Ne OMWAMI Nyasaye nahulila akababoola ako.

³Musa yali omundu owokhwitutuyia muno, okhushila abandu bandi boosi khushialo.

⁴Mana mubwangu OMWAMI Nyasaye naboolela Musa, Haroni nende Miriamu ari, “inywe bataru rule elwanyi mutsie weliheema lianje litakatifu lili.” Mana bataru abo nibarula elwanyi,

⁵Mana OMWAMI Nyasaye niyekha hasi nali musiilo eya lileesi, ne nasinjila habwinjililo bweliheema, nalanga Haroni nende Miriamu, nibetsa boosi.

⁶Nysaye nababoolela ari, “Hulile aka emboola: Omulakusi naba nali mwinywe, isie OMWAMI Nyasaye ndimanyisinjia khuye mumalolelo, khandi emboolanga ninaye mumalooro.

⁷Ne shikali kario khumukhalabani wanje Musa tawe, ye ndamukhola okhuba omusinjilili wabandu banje ba Isiraeli boosi.

⁸Emboolanga ninaye moni namoni habulafu, nindalakatsia olulimi tawe, ne kata yaluutsi likondo lianje! Nenyu mwakhaboola murie amabi khumukhalabani wanje Musa nimumile imoni?”

⁹Mana OMWAMI Nyasaye natiilwa noburuma khubo, natsia

¹⁰nalio lileesi elo nilirula hekulu weliheema; obuchele nibutila Miriamu bwangu, omubilikwe nikuba omulafu shinga itsaluji. Olwa Haroni yahenga Miriamu nalola mbu omubilikwe kwosi kuli nobuchele;

¹¹yaboolela Musa ari, “Omwami wanje, olakhukhola khunyoole eshinyasio shino khulwa obwonooni bwefwe obwakhukholile tawe.

¹²Ekhusaaya nochama, olakhola Miriamu okhuba shinga omundu owebulwa nafwiile, owa omubilikwe hambi kwosi kwabola tawe.”

¹³Mana Musa nalilila OMWAMI Nyasaye ari, “Iwe Nyasaye, ekhusaaya omuhonie.”

¹⁴Nebutswa OMWAMI Nyasaye yakalusia Musa naboola ari, “Samwana aba niyamufutsakhwo amare mumoni, yakhafimbilwe omurwe khulwa tsinyanga musafu. Kho mumwikalile elwanyi wekambi khulwa tsinyanga musafu, ne nitsihwele akalusibwemwo khandi.

¹⁵Miriamu niyekalilwa elwanyi wekambi khulwa tsinyanga musafu. Ne abandu shibatsiililila okhuchenda ta, okhuula olwa Miriamu yakalusibwamwo khandi.”

¹⁶Olunyuma olwa amakhuwa ako, abandu barula Hezerotsi ne nibakhupa ikambi mushitsiimi shia Parani.