Read wanga OBUBALI 13 Bible Online

OBUBALI 13 - wanga bible

OBUBALI 13

¹OMWAMI Nyasaye naboolela Musa ari,

²“Waahule omwimilisi mulala okhurula mubuli oluyia olwa Abaisiraeli, mana obarume okhulambuula eshialo shia Kanani eshia ehelesinjia Abaisiraeli.”

³Kho Musa nabaruma okhurula mushitsiimi shia Parani shinga olwa OMWAMI Nyasaye yali nalachilisiye. Boosi bali abasaatsa abemilisi ba Abaisiraeli.

⁴Ne kano niko ameera kabwe; Okhurula muluyia lwa Rubeni yali Shamuha, omusiani wa Zakuri,

⁵Okhurula muluyia lwa Simeoni yali Shafati omusiani wa Hori,

⁶Okhurula muluyia lwa Yuda yali Kalebu omusiani wa Yefune;

⁷Okhurula muluyia lwa Isakari yali Igali omusiani wa Yosefu;

⁸Okhurula muluyia lwa Efuraimu yali Hosheya omusiani wa Nuni;

⁹Okhurula muluyia lwa Benjamini yali Paliti omusiani wa Raru;

¹⁰Okhurula muluyia lwa Zebuluni yali Godieli omusiani wa Sodi;

¹¹Okhurula muluyia lwa Yosefu oluli oluyia olwa Manase yali Gadeli omusiani wa susi

¹²Okhurula muluyia lwa Dani yali Amieli omusiani wa Gamali

¹³Okhurula muluyia lwa Asheri yali Setsuri omusiani wa Mikaeli;

¹⁴Okhurula muluyia lwa Nafutali yali Nahibi omusiani wa Wofusi.

¹⁵Okhurula muluyia lwa Gadi yali Geweli omusiani wa Maki.

¹⁶Kano niko ameera kabandu aba Musa yaruma okhutsia okhulambuula eshialo shia Kanani. Mana Musa nakulikha Hosheya omusiani wa Nuni mbu Yoshwa.

¹⁷Olwa Musa yabaruma okhutsia okhulambuula eshialo shia Kanani yababoolela ari, “Tsie mubire mushialo shia Negebu mana mutikulushe mushialo shiebikulu.

¹⁸Murunilisie mulole mbu eshialo eshio shili shirie, khandi mbu abandu bamenyamwo, nabamaani noho abateshele, nibaba nibali abanji noho batiiti butswa.

¹⁹Khandi mulole eshialo eshio nishiba nishili eshilayi noho eshibi; khandi amataala kabwe nikaba nikali aketsikambi noho aketsingoba.

²⁰Khandi mulole liloba liabwe niliba nilili linulu noho tawe. Khandi mulole emisaala nichiba nichilimwo noho tawe. Mube abeitswoni, ne olwa muchelela mureerekhwo khubiamo bieshialo eshio.” Tsiali tsinyanga etsia ebichese biambeli biemitsabibu.

²¹Kho abasaatsa abo nibatikulukha nibarunilisia eshialo eshio okhurula mushitsiimi shia Zini elubeka lwemulambo okhuula khwitookho lia Rehobu elili hambi mubwinjililo bwa Hamatsi elubeka lwemasaba.

²²Baranjilila okhutsia Negebu niboola Heburoni ewa tsimbia tsia Ahimani, Sheshai nende Talimayi etsiali etsiabetsukhulu bemindu emikhongo echialangungwa mbu, Anakimu. Litookho lia Heburoni liombakhwa liamala emiyika musafu elia Zoani elili mu Misiri nilishili okhumbakhwa.

²³Mana niboola khwibanda lia Eshikoli nibaremamwo olusaka lulala olweshisakanya shiemitsabibu nibashichinjila khumutunga hakari wabandu babili, khandi nibareera amakomamanga nende amakhuyu.

²⁴(Habundu yaho nihalangwa mbu, libanda lia Eshikoli, eshisina mbu, “Eshisakanya” shichila Abaisiraeli baremaho eshisakanya shiemitsabibu.)

²⁵Nibakhamala okhulambuula eshialo eshio khulwa tsinyanga amakhumi kane,

²⁶bakalukha khu Musa, Haroni nende abomukhung'ano kwosi kwabandu ba Isiraeli Kadeshi mushitsiimi shia Parani. Abarunilisi abo nibababoolela koosi aka bali nibaluutsi khandi nibabamanyisia ebiamo ebia bali nibareerile.

²⁷Nibaboolela Musa bari, “Khurunilisiye eshialo eshio, ne khunyoolile mbu neshilayi khandi eshinulu; ne bino nibio bilala khubiamo biashio.

²⁸Nebutswa abandu bamenya mushialo eshio nabamaani, ne amataala kabwe namakhongo muno khandi aketsingoba. Ne okhumeetakhwo nabetsukhulu aba emindu emikhongo echia oluyia lwa Anaki.

²⁹Abamaleki bamenya Negebu elubeka lwomumbo weshialo eshio, Abahiti, Abayebusi nende Abamori bamenya elubeka lwashio lwebikulu. Abakanani bamenya khunyanza ya Mediterenia nende khumwalo kwa Yorodani.”

³⁰Naye Kalebu naholelesia abandu abali nibeyiniakananga khu Musa naboola ari, “Chende khutsie khuseere khubukule eshialo eshio. Khuli abamaani khandi khunyala okhushibukula.”

³¹Ne abasaatsa bali nibatikulusheyo nende Kalebu nibaboola bari, “Shikhunyala okhutsia okhuseera abandu abo ta, shichila nabamaani okhushila ifwe.”

³²Kho nibaboolela abandu ba Isiraeli akobubeeyi khushialo eshia bali nibatsiile okhulambuula. Nibaboola bari, “Eshialo eshio shishikhusinjia ebiokhulia bihela abandu bamenyangamwo tawe. Buli omundu wakhwaluutsi nomurambi muno.

³³Khandi khwaluutsi Abanefilimu, emindu emikhongo, emitsukhulu chia Anaki. Ifwe khwaloleshe orutiiti shinga amatete imbeli wabwe.”