Read wanga OBUBALI 14 Bible Online

OBUBALI 14 - wanga bible

OBUBALI 14

¹Mana abomukanda boosi nibakhupa oluhungu nibalila eshilo shiosi.

²Abandu nibeyiniakanila Musa nende Haroni, nibaboola bari “Bwakhabele obulayi nikhwakhafwilile Misiri noho kata mushitsiimi!

³Mbushiina OMWAMI Nyasaye akhuyilanga mushialo eshio okhwirirwayo mwihe? Abakhasi befwe nende abaana befwe balatiilwa. Nobulayi nikhwakhakalukha mushialo shia Misiri!”

⁴Mana nibaboolelana abeene khubeene bari, “Chende khwahule omwimilisi mana khukalushe Misiri!”

⁵Mana Musa nende Haroni nibasikama hasi nibenamia obweni bwabwe okhuula hasi imbeli wabandu boosi.

⁶Ne Yoshwa omusiani wa Nuni nende Kalebu omusiani wa Yefune abali babili khubarunilisi abatsia mushialo shia Kanani, nibarandula ebifwalo biabwe mushibeela,

⁷mana nibaboolela Abaisiraeli bari, “Eshialo shia khwarunilisia neshilayi muno.

⁸OMWAMI Nyasaye naba nachamisibwa ninefwe alakhuyilayo nakhuhelesia eshialo eshio eshili eshiyinda khandi eshia liloba linulu.

⁹Habula muleshe okhukhaya OMWAMI Nyasaye, khandi mularie abandu bamenya mushialo eshio tawe. Khulabahula bwangu. OMWAMI Nyasaye akhulwanilanga khandi ahulile abanyasaye balindanga abandu abo; kho mularie tawe.”

¹⁰Abomukanda boosi beenya okhulasa Musa nende Haroni amachina bafwe. Nebutswa bwangu bwene abandu nibalola obulafu bwokhubaho okhwa OMWAMI Nyasaye nibulolekha khwiheema litakatifu.

¹¹Mana OMWAMI Nyasaye nareeba Musa ari, “Abandu bano balatsiililila okhundoba okhuula liina? Balatsiililila okhuloba okhuusuubilila okhuula liina? Kata olwa nindabakholela ebikhole ebiamakana ebinji hakari wabwe!

¹²Enzia okhubareerera olumbe, nende okhubamulula boosi, nebutswa ndalakhukhola iwe okhuba samwana lihanga likhongo khandi eliamaani okhubashila.”

¹³Nebutswa Musa naboolela OMWAMI Nyasaye ari, “Warusia abandu bano Misiri khulwa obunyalibwo. Olwa Abamisiri balahulilakhwo akokholile khubandubo,

¹⁴balaboolela abandu bamenyile mushialo shino. Abandu bano bamalile okhuhulila mbu, iwe OMWAMI Nyasaye okhwimililanga. Khandi mbu, ololekhanga obulayi bwene olwa lileesilio lisinjilanga hekulu wefwe, khandi okhwimililanga mwileesi elili shinga isiilo eshiteere nende isiilo yomulilo mushilo.

¹⁵Bulano noba niwira abandubo bano boosi, abamahanga abamala okhuhulilakhwo khu akoluyalilwo balaboola mbu,

¹⁶wiirire abandubo mushitsiimi shichila wakhayilwe okhuboosia mushialo eshia wabasuubisia okhubahelesia.

¹⁷Bulano iwe OMWAMI Nyasaye, ekhusaaya nochama lolesie obunyalibwo obukhongo khwifwe, mana okhole aka wakhusuubisia olwa woboola ori,

¹⁸‘Isie OMWAMI Nyasaye shiesinyikhanga bwangu ta, khandi endi owobuheeli oburalilu, owobwisiikwa, embeelanga abandu obwonooni nende obukhayi bwabwe. Nebutswa shindalachweya okhuhaana eshinyasio khubaana benywe nabetsukhulu benywe okhuula khulwibulo lwakhataru nende lwakhane khulwa obwonooni bwabebusi babwe tawe.’

¹⁹OMWAMI Nyasaye oli owetsimbabasi, khandi okholelanga abandu amakhuwa amalayi okhushila aka bakhoyile okhukholelwa. Chama obeele abandu bano tsimbabasi shinga olwa wababeelanga okhurula nibarula mushialo shia Misiri.”

²⁰Mana OMWAMI Nyasaye naboola ari, “Ebalesheele obwonooni bwabwe shinga olwa usaayile,

²¹nebutswa nditsuba mbu, shinga olwa eshiliho mwoyo, khandi obunyali bwanje bubushiliho khushialo,

²²abulaho khubandu bano oulanyalilwa okhwinjila mushialo eshio. Balola okhumwesukha khwobulafu bwokhubaho khwanje nende ebikhole ebiamakana, ebia ndakhola mushialo shia Misiri nende mushitsiimi. Nebutswa bateemanga obwisimilisi bwanje akhandi akhanji nibakalushila khandi nibaloba okhumbulila.

²³Shibakhenjilekhwo mushialo shia ndasuubisia abakuuka babwe tawe. Abulaho kata mulala khu abondobile abo, oulanyala okhwinjilamwo.

²⁴Nebutswa shichila mbu omukhalabani wanje Kalebu yahukhane ninabo mumapaaro khandi yambulilanga nomwoyokwe kwosi, ndalamuusia mushialo shia yarunilisia nabo abolwibulolwe balabukula eshialo eshio.

²⁵Bulano khulwa okhubeela Abameleki nende Abakanani bamenya mumabanda kashio, mukamba mushiukhane mutsie mushitsiimi nimulonda injila eyitsia khunyanza inzakhanyu.”

²⁶Mana OMWAMI Nyasaye nareeba Musa nende Haroni ari,

²⁷“Omukanda kwabandu abamayanu bano, baleyiniakana okhuula liina? Embuliile okhwiyiniakana khwabandu ba Isiraeli beyiniakaane khwisie.

²⁸Baboolele amakhuwa kano ori, ‘Nditsuba mbu olwa endiho mwoyo, ndalamukholela butswa aka muusabile. Isie OMWAMI Nyasaye emalile okhuboola.

²⁹Mulafwa, ne emilambo chienywe chilasalaasibwa mushitsiimi shino. Shichila muyiniakane khwisie, abulaho kata mulala khwinywe okhuchaachila khu owemiyika amakhumi kabili oulenjila mushialo eshio tawe.

³⁰Ndamusuubisia okhumuyila mumenyemwo nebutswa abulaho khwinywe oulamenyamwo, habula Kalebu nende Yoshwa bonyene.

³¹Mwaboolile mbu, abaana benywe abatiiti balatiilwa, nebutswa ndalabareera mushialo eshia mwaloba, nashio shilaba eshimenyo shiabwe

³²Mulafwiila mushitsiimi shino.

³³Ne abaana benywe balitimatima mushitsiimi khulwemiyika amakhumi kane, nibanyakhananga khulwa okhubula obwisiikwa khwenywe khwisie, okhuula olwa mwesi mwakhabe nimumalile okhufwa.

³⁴Mwakhanyakhane khulwa obwonooni bwenywe emiyika amakhumi kane, buli muyika khulwa inyanga ndala eya mwekhoonyelanga okhulambuula eshialo eshio. Mulamanyilisia eshisina eshia isie okhuba omubi khwinywe!

³⁵Nditsuba mbu ndalamukholela kano inywe abandu abamayanu abekhung'asia okhufukula isie. Buli omundu alafwiila mushitsiimi shino. Isie OMWAMI Nyasaye nisie ouboolile.’ ”

³⁶Abasaatsa aba Musa yaruma okhulambuula eshialo eshio, abareera amakhuwa akobubeeyi akachila abandu nibeyiniakana khu OMWAMI Nyasaye,

³⁷nibeerwa nobulwale obwa OMWAMI Nyasaye yareera.

³⁸Yoshwa omusiani wa Nuni nende Kalebu omusiani wa Yefune nibo abatong'aho abalamu, mubasaatsa abatsia okhulambuula eshialo eshio.

³⁹Mana Musa naboolela abandu ba Isiraeli amakhuwa ako, nabo nibalila obululu.

⁴⁰Olwa bwashia mumabwibwi bachaaka okhutsia okhuseera eshialo shiebikulu shia Kanani nibaboola bari, “Bulano khwirecheeshe okhutsia habundu aha OMWAMI Nyasaye yakhusuubisia. Khwiyame obwonooni bwefwe.”

⁴¹Nebutswa Musa nabareeba ari, “Eshichilanga nimukhaya okhuhulila OMWAMI Nyasaye nishiina? Shimulanyalilwaakhwo tawe.

⁴²Shimulatsie okhuseera abasuku benywe ta, shichila OMWAMI Nyasaye shiali ninenywe tawe. Abasuku benywe balamuhula.

⁴³Olwa museera Abameleki nende Abakanani muleerwa. OMWAMI Nyasaye shialamukhoonya ta, shichila mwakhayile okhumuhulila.”

⁴⁴Nebutswa Abaisiraeli bakhaya okhuhulila Musa nibatikulukha okhutsia mushikulu kata olwa bali nibaleshile Lisanduku lieindakano eya OMWAMI Nyasaye nende Musa mukambi.

⁴⁵Mana Abameleki nende Abakanani abali nibamenya mubikulu ebio nibakholomokha hasi nibakhupa Abaisiraeli nibabahula khandi nibabalondachilila okhuula khwitookho lia Horima.