Read wanga OBUBALI 15 Bible Online

OBUBALI 15 - wanga bible

OBUBALI 15

¹OMWAMI Nyasaye nahelesia Musa

²amalako kano khulwa abandu Abaisiraeli mbu bakatiile nibali mushialo eshia yali natsia okhubahelesia. Naboola ari,

³Ihunwa, limiiku, likondi noho imbusi binyala okhuhaanwa khwisie shinga omusango omusambe noho okwa okhuusia eshitsubo noho okwokhuchama butswa noho okwa amasabo ka buli lwosi akeidiini. Isakakha yemisango echio yinjamisinjia isie OMWAMI Nyasaye.

⁴Kho oureera eshihaanwashie eshio, okhuula khandi ahaane khwisie OMWAMI Nyasaye omusango kweimele ikilo ndala yobuusie obunyushe obutsokasibwemwo ilita ndala yamafura akemiseituni,

⁵nende idivai ilita ndala khulwa omusango kwokhunywa. Ebihaanwa ebio bileerwe halala nende buli omuruko kwomusango omusambe, okhuula kube likondi noho imbusi.

⁶Olwa limiiku lihaanwa okhuba omusango okhuula oulihaana alireere halala nende tsikilo tsibili tsiobusie obunyushe obutsokasiibwemwo ilita ndala neinusu yamafura akomuseituni shinga omusango okweimele,

⁷halala nende ikilo ndala neinusu ya idivai. Isakakha yemisango echio yinjamisinjia isie OMWAMI Nyasaye.

⁸Ne olwa ihunwa yihaanwa khwisie okhuba omusango omusambe noho khulwa omusango kwobusanjila niokhuusia eshitsubo noho khulwa omusango kwobusanjilani

⁹okhuula okuuhaana areere obusie obunyushe tsikilo tsitaru obutsokasiibwemwo tsilita tsibili etsiamafura kemitseituni,

¹⁰halala nende tsilita tsibili etsia idivai. Isakakha yomusango kuno yinjamisinjia Isie OMWAMI Nyasaye.

¹¹Ebio nebindu bilahaanungwa nende buli ihunwa, noho limiiku, noho likondi noho imbusi.

¹²Obunji bwebihaanwa ebio bulalondana nobunji bwetsisolo etsio etsihaanilwe okhuba omusango.

¹³Buli omwibule wa Isiraeli okhuula akhole ako olwa aba nahaana omusango okweshiokhulia, okuli isakakha yinjamisia Isie OMWAMI Nyasaye,

¹⁴Ne inyanga yindi omurende yesi owamenya mwinywe khulwa ebise bitutu noho khulwa oluhono, naba nahaana omusango omusambe okwa isakakha yakwo yinjamisianjia isie OMWAMI Nyasaye, okhuula alonde amalako malala ako.

¹⁵Khulwa emiyika chiosi echitsanga amalako malala kano kalamwimililanga inywe nende abarende bamenyanga mwinywe. Inywe ninabo muli nashilala imbeli wanje isie OMWAMI Nyasaye.

¹⁶Amalako ako nende amalachilisio kano kalaba khwinywe nende khubo.

¹⁷OMWAMI Nyasaye nahelesia Musa

¹⁸amalako kano khulwa Abaisiraeli okhuloonda nibamenyile mushialo eshia yali natsia okhubahelesia, naboola ari,

¹⁹“Olwa mulia eshiokhulia shirulile mumukunda, mwahule eshitonye mundeerere okhuba eshihaanwa eshiahule.

²⁰Olwa mutekha emikaate, mwahule omukaate okuteshilwe khubusie bweimele yambeli mundeerere okhuba eshihaanwa eshiaule okhurula aha basielanga imele.

²¹Eshihaanwa eshiahule shino eshirula mumikaate chiamuteekha mushireerenje khwisie buli lwosi.

²²“Ne omundu yesi niyetsukhana nafunaka amalako aka emulachilisiye okhubirira khu Musa,

²³noho munyanga tsitsanga omukanda kwosi nikuba nikulaloonda buli lilako elia isie OMWAMI Nyasaye ehaanile,

²⁴ne obwonooni obwo nibukholwa mukhukorwa noho abomukanda nibalamanyile ta, okhuula bahaane ihunwa yomusango omusambe nende omusango kweimele nende okweidivai. Isakakha yabio yinjamisinjia isie OMWAMI Nyasaye. Okhumeetakhwo, okhuula bahaane imbusi ikhole, khulwa omusango kwobwonooni.

²⁵Ne omwisaaliisi okhuula atise abomukanda boosi kho balaleshelwa shichila betsukhane nibonoonile, ne bareera omusango kwabwe okwobwonooni khwisie.

²⁶Mana omukanda kwosi okwa Abaisiraeli nende abarende abamenyanga mubo balaleshelwa shichila buli shiamundu yakhola obwonooni obwo.

²⁷“Ne omundu mulala niyetsukhana niyonoona okhuula ahaane imbusi isubini yomuyika mulala khulwa omusango okwobwonooni.

²⁸Omwisaaliisi akhole eshitiso imbeli ewa OMWAMI Nyasaye, khushimalilo shiemisango khulwa omundu owitsukhane niyonoona oyo, mana alaleshelwa.

²⁹Lilako elala tsana elo nelia buli mundu owitsukhana niyonoona, abe omuisiraeli noho omurende oumenyanga mubo.

³⁰“Nebutswa omundu yesi owonoona namanyile, abe omuisiraeli noho omurende, aba neshikha shiokhuufwola isie OMWAMI Nyasaye, ne okhuula yeerwe,

³¹shichila akhayile aka isie ndalachilisia, ne afunache elala khumalako kanje. Omundu oyo okhula yeerwa, ne eshitsayishie shili khuye omwene.”

³²Olwa abandu ba Isiraeli bali nibali mushitsiimi banyoola omundu undi narenyanga tsikhwi khunyanga ya Isabato.

³³Abandu bamunyoola narenyanga abo nibamureera khu Musa nende Haroni nende abomukanda boosi.

³⁴Nibamwikalila mundindi shichila shibamanyilisia obulayi aka banyala okhumukholela tawe.

³⁵Mana OMWAMI Nyasaye naboolela Musa ari, “Omundu oyo okhuula yeerwe, abomukanda boosi bamulase namachina afwe elwanyi weikambi.”

³⁶Mana abomukanda boosi nibamuyila elwanyi weikambi, nibamulasa namachina nafwa, shinga olwa OMWAMI Nyasaye yali nalachile Musa.

³⁷OMWAMI Nyasaye naboolela Musa ari;

³⁸“Boolela abandu ba Isiraeli mbu, banabe amayeeye khundulo khwebifwalo biabwe mana khubuli liyeeye barekhwo omukoye kwobukondo bwa bulu. Bakholenje bario emiyika chiosi.

³⁹Buli olwa balola amayeeye ako baletsulilanga amalako kanje nende okhukakhola, kho shibalandekhakhwo nibakhola akokhwenya khwabwe abeene nende okhwikomba khwabwe abeene tawe.

⁴⁰Amayeeye ako kalamwitsusinjia okhulonda amalako kanje koosi, mana balaba abandu banje inziayo.

⁴¹Isie nisie OMWAMI Nyasaye wenywe, owamurusia mushialo shia Misiri, okhuba Nyasaye wenywe. Nisie OMWAMI Nyasaye wenywe.”