Read wanga OBUBALI 16 Bible Online

OBUBALI 16 - wanga bible

OBUBALI 16

¹ Olunyumakhwo Kora omusiani wa Izahari, womunzu ya Kohatsi, okhurula muluyia lwa Lawi, yabukula abandu nibalimwo Datsani, Abiramu abasiani ba Eliabu, nende Oni omusiani wa Peletsi abomuluyia lwa Rubeni.

²Abasaatsa abo bakhoonyana nende abemilisi ebikhumi bibili namakhumi karano (250), abahulwa nomukanda kwosi kwabandu ba Isiraeli okhufukula Musa.

³Mana nibakhung'ana halala imbeli wa Musa nende Haroni, nibababoolela bari, “Mwichinjimisinjia muno! Abandu ba Isiraeli boosi nabandu aba OMWAMI Nyasaye, naye ali ninefwe fwesi. Kho shiina eshichila iwe Musa niwikhola okhuba omukhongo okhushila abomukanda okwa OMWAMI Nyasaye kwosi?”

⁴Olwa Musa yahulilakhwo amakhuwa ako, yasikama hasi niyenamia obwenibwe hasi mana nasaaya.

⁵Naboolela Kora nende abalondibe ari, “Mukamba mumabwibwi OMWAMI Nyasaye alakhumanyia hakari wanje ninawe, ouli ouwe khandi alakhola oyo owa yaahula okhusita ahambi nende eshimalilo shiemisango.

⁶Kho mukamba mumabwibwi iwe nende abalondibo mubukule ebikaye,

⁷murekhwo amanda komulilo nende obubani mana mubireere khushimalilo shiemisango imbeli ewa OMWAMI Nyasaye. Ne khulamanya mbu niwiina owa OMWAMI Nyasaye yaahule. Inywe Abalawi ninywe abechinjimisiye muno!”

⁸Musa natsiililila okhuboolela Kora ari, “Inywe Abalawi recheresie.

⁹Mupaaranga mbu, nilikhuwa lituutu OMWAMI Nyasaye wa Isiraeli, okhumwahula inywe okhumukhalabanila mwiheemalie litakatifu nende okhukhalabanila abomukanda?

¹⁰Yamukholile inywe nende Abalawi bandi boosi okhunyoola oluyali luno, khandi mukhabanga okhuba abesaaliisi!

¹¹Khulwa okhiwiyiniakana khu Haroni, iwe nende abomukandakwo mwiyiniakananga nimuloba OMWAMI Nyasaye.”

¹²Mana Musa narumana okhulanga Datsani nende Abiramu abasiani ba Eliabu, nabo nibakalusia nibaboola bari, “Shikhwitsa tawe!

¹³Opaaranga mbu nelikhuwa litutu iwe okhukhurusia mushialo eshiyinda khandi eshinulu eshia Misiri okhukhwirira hano mushitsiimi? Khandi wikholanga okhuba omuruchi khwifwe!

¹⁴Kata kario shiokhwinjiisiye mushialo eshiyinda khandi eshinulu noho kata okhukhuhelesia obwayilo nende emikunda chiemitsabibu ta. Ne bulano oteemanga okhukhukaatia, shikhwitsa tawe.”

¹⁵Mana Musa nasinyikha muno, ne naboolela OMWAMI Nyasaye ari, “Shiolafuchililakhwo ebihaanwa biabandu bano bakhureerera tawe. Shindayonoonelekhwo omundu yesi yesi khubo kata okhubukulakhwo ndala khutsisishili tsiabwe tawe.”

¹⁶Mana Musa naboolela Kora ari, “Iwe nende abomukandakwo boosi abandu ebikhumi bibili nakakhumi karano (250) mwitse khwiheema elia OMWAMI Nyasaye mukamba, mwitse nende Haroni.

¹⁷Buli shiamulala khwinywe abukule eshikayeshie, arekhwo obubani, mana ashireere imbeli ewa OMWAMI Nyasaye.”

¹⁸Kho buli mundu nabukula eshikayeshie nibaramwo omulilo nende obubani, mana nibasinjila habwinjililo bweliheema litakatifu halala nende Musa nende Haroni.

¹⁹Mana Kora nakhung'asia abomukandakwe boosi nibasinjila habwinjililo bweliheema elo. Ne obulafu obwa OMWAMI Nyasaye nibubaloleshela abomukanda boosi.

²⁰Mana OMWAMI Nyasaye naboolela Musa nende Haroni ari,

²¹“Mwiyahukhasie okhurula mubomukanda kuno, okhuba ndalabasishia boosi mushise shilala.”

²²Mana Musa nende Haroni nibasikama hasi, nibenamia obweni bwabwe okhuula hasi ne nibaboola bari, “Iwe, Nyasaye obulamu bwabandu boosi burulanga khwiwe, kho omundu mulala niyonoona, notiilwa noburuma khubomukanda boosi?”

²³Naye OMWAMI Nyasaye nakalusia Musa ari,

²⁴“Boolela abomukanda boosi, basite ehale okhurula aha Koratsi, Detsani nende Abiramu bamenya.”

²⁵Mana Musa nasumukha natsia khu Datsani nende Abiramu, nabo abakhulundu ba Abaisiraeli nibamuloondakhwo.

²⁶Ne naboolela abomukanda abo ari, “Site ehale okhurula khumaheema kabandu abamayanu abo, ne mulatiilekhwo khushindu shiabwe shiosi shiosi tawe, nimukhola murio mulasikha halala ninabo nobwonooni bwabwe bwosi.”

²⁷Kho abandu nibasita ehale okhurula khumaheema ka Koratsi, Datsani nende Abiramu bamenyangamwo. Mana Detsani nende Abiramu nibarula elwanyi, ne nibasinjila hamuliango wa maheema kabwe halala nende abakhasi babwe na baana babwe abasiani nende abaana abatutu.

²⁸Naye Musa naboolela abandu ari, “Munjila yino nolwa mulamanya mbu, OMWAMI Nyasaye yaruma okhukhola emilimo chino, ne shichikholanga khulwa okhwenya khwanje omwene tawe.

²⁹Abasaatsa abo nibaba nibafwa shinga abandu boosi bafwitsanga noho kata olumbe lutiilanga abandu boosi nilubatiila, kho OMWAMI Nyasaye shiaba niyaruma tawe.

³⁰Nebutswa OMWAMI Nyasaye nakholakhwo eshindu shindi eshicheni, mana liloba liasame omunwa nende okhubamila boosi halala nende emiandu chiabwe, ne nibekha emakombe nibalimwoyo, kho mulamanya mbu, abandu bano balechelesiiye OMWAMI Nyasaye.”

³¹Ne olwa yamala butswa okhuboola amakhuwa ako, liloba liabandu abo bali nibasinjilekhwo liasiabukhamwo hakari,

³²nilibamila boosi halala nende abomutsinzu tsiabwe nende abandu bali aba Kora boosi halala nende emiandu chiabwe chiosi.

³³Kho abandu abo nende emiandu chiabwe chiosi nibekha emakombe nibali mwoyo, ne liloba elo niliyikala ikulu wabwe, kho nibasikha okhurula mubomukanda bario.

³⁴Ne Abaisiraeli boosi abali nibababotokhaane belukha olwabahulila okhwayula khwabandu abo. Abaisiraeli nibaboola bari, “Khwilushe liloba liakhakhumila fwesi khandi!”

³⁵Mana OMWAMI Nyasaye naruma omulilo, nikusamba nende okhusishia abandu ebikhumi bibili namakhumi karano (250) abali nibahaanile obubani abo.

³⁶Mana OMWAMI Nyasaye naboolela Musa ari,

³⁷“Boolela Eliazari omusiani wa Haroni omwisaaliisi abukule ebikaye biomukasa biobubani okhurula mumulilo, ne asalaasie omulilo okwo ehale, shichila ebikaye ebio nibitakatifu.

³⁸Ebikaye ebio biakholwa ebitakatifu olwa biahaanwa imbeli weshimalilo shiemisango shianje. Khulweshio mubukule ebikaye biabandu bayerirwe khulwa obwonooni bwabwe abo, mubiiranyekhwo ebikaye ebipapale mana bibe ebifunikho biokhushimalilo shiemisango. Kho bilaba eshilolelo shiokhuchetsiyia abandu ba Isiraeli.”

³⁹Kho omwisaaliisi Eliazari nabukula ebikaye biomukasa biabandu abali nibasambilwe bali nibahanile, ne nibiiranya nibiba shinga eshifunikho shiokhushimalilo shiemisango.

⁴⁰Eshio nishiba eshilolelo shiokhuchetsiyia khubandu ba Isiraeli mbu, omundu yesi yesi oulali omwisaaliisi noho owolwibulo lwa Haroni, shialasitakhwo ahambi neshimalilo shiemisango nasamba bubani imbeli ewa OMWAMI Nyasaye tawe. Nakhola ario aba alaba shinga Kora nende abomukandakwe. Koosi nikekholekha shinga olwa OMWAMI Nyasaye yali naboolele Eliazari okhubirila mu Musa.

⁴¹Ne olwa bwashia inyanga yalondakhwo, abandu bomukanda kwa Abaisiraeli boosi beyiniakana khu Musa nende Haroni nibaboola bari, “Mwirire abandu aba OMWAMI Nyasaye.”

⁴²Ne olwa abomukanda bali nibakhung'anile okhuyingasia Musa nende Haroni, bakhupa amashemo ewa liheema litakatifu liali, ne nibalola lileesi nililifuniishe, ne obulafu bwokhubaho okhwa OMWAMI Nyasaye nibulolekha.

⁴³Ne Musa nende Haroni nibetsa hambeli weliheema litakatifu.

⁴⁴Ne OMWAMI Nyasaye naboolela Musa ari,

⁴⁵“Sinjila ehale okhurula mumukanda kuno, ndalabasishia khushise shilala.” Nabo boosi nibasikama nibenamia obweni bwabwe hasi.

⁴⁶Mana Musa naboolela Haroni ari, “Bukula eshikayeshio, orekhwo omulilo okhurula khushimalilo shiemisango mana oreekhwo obubani, ne oshiyile bwangu mubomukanda mana obatise, okhuba OMWAMI Nyasaye asinyiishe, neshinyasio shiolumbe shimalile okhuchaaka.”

⁴⁷Kho Haroni nakhola shinga olwa Musa yali namuboolele, niyelukha tsimbilo natsia mubomukanda, ne eshinyasio shiolumbe shiali nishichachile mubandu, kho nara obubani khushikayeshie, ne natisa abandu.

⁴⁸Kano kasinjisia eshinyasio eshio, ne nasikala nasinjiile hakari wabandu abalamu nende abali nibafwile.

⁴⁹Abandu abafwa khulwa eshinyasio shiolumbe eshio, bali ebikhumila ekhumi nabine nende ebikhumi musafu (14,700), noshili okhubalilakhwo abafwa khulwa obuyiri bwa Kora.

⁵⁰Ne olwa eshinyasio shiolumbe eshio shiasinjisibwa, Haroni nakalukha khu Musa habwinjililo bweliheema.