Read wanga OBUBALI 17 Bible Online

OBUBALI 17 - wanga bible

OBUBALI 17

¹Mana OMWAMI Nyasaye naboolela Musa ari,

²“Boolela abandu ba Isiraeli bakhuhelesie tsindabushi ekhumi natsibili, indabushi ndala okhurula khubuli omwimilisi waboluyia. Ohandiche eliira liabuli mundu khundabushiye,

³ne khundabushi ya Abalawi ohandichekhwo eliira lia Haroni. Okhuba buli omwimilisi waboluyia alaba nende indabushi ndala.

⁴Mana olatsibiikha mwiheema litakatifu imbeli welisanduku lieindakano, aha embukanilanga ninenywe.

⁵Ne indabushi yomundu wandahula yilaroombokha, ne munjila yino nolwa enzia okhurusiaho okhwiyiniakana khwabandu ba Isiraeli khwiwe.”

⁶Musa naboolela abandu ba Isiraeli; ne abemilisi babwe boosi nibamuhelesia tsindabushi, ndala okhurula khubuli omwimilisi okhulondana nende tsimbia tsiabwe, tsiosi nitsiba tsindabushi ekhumi natsibili, ne indabushi ya Haroni yali halala ninatsio.

⁷Mana Musa nabiikha tsindabushi etsio mwiheema imbeli welisanduku elia OMWAMI Nyasaye.

⁸Olwa bwashia, Musa yatsia mwiheema lielisanduku lieindakano, ne nalola indabushi ya Haroni eyeshilibwa shia Lawi yali niyiroomboshe, niyirusiye emirombo, khandi niyamile eshiamo eshiengu eshia alumondi.

⁹Mana Musa narusia tsindabushi etsio ewa tsiali imbeli ewa OMWAMI Nyasaye, natsireera ewabandu ba Isiraeli bali, nabo nibatsilola buli mundu nabukula indabushiye.

¹⁰Mana OMWAMI Nyasaye naboolela Musa ari, “Kalusia indabushi ya Haroni imbeli welisanduku lieindakano, yibiikhweho shinga eshilolelo shiokhuchetsiyia abeinduli mu baisiraeli, bamanye mbu nibalalekha okhwiyiniakana ta, balafwa.”

¹¹Ne Musa nakhola shinga olwa OMWAMI Nyasaye yali namulachilisiye.

¹²Mana abandu ba Isiraeli nibaboolela Musa bari, “Kho fwesi khusishile khuhwele.

¹³Nikali mbu, omundu yesi ousitakhwo butswa ahambi neliheema okhuula afwe, kho fwesi khuli shinga abamalile okhufwa!”