Read wanga OBUBALI 18 Bible Online

OBUBALI 18 - wanga bible

OBUBALI 18

¹Kho OMWAMI Nyasaye naboolela Haroni ari, “Iwe nende abasianibo nende Abalawi muletukha obumayanu obularulana nobukhalabani bwomwiheema litakatifu, nebutswa iwe nende abaanabo mwenyene ninywe abaletukha obumayanu oburulana nende obwisaaliisi bwenywe.

²Obukule abasiani benywe, aboluyia lwa Lawi, nende abekhobo mbu, bakhukhoonye olwa iwe nende abasianibo muba nimukhalabananga mwiheema litakatifu.

³Balakhukhalabanila iwe nende okhukhalabana emilimo chiomwiheema, nebutswa balasitakhwo ahambi nende ebimanulwa ebitakatifu biahabundu hatakatifu kata khushimalilo shiemisango tawe. Nibakhola bario, boosi iwe ninabo mulafwa.

⁴Balasanga halala ninawe nibakhalabana emilimo mwiheema, nebutswa omundu oulakwanile ta, alakhalabanakhwo ninawe tawe.

⁵Nawe nende abasianibo mwenyene ninywe abalakhalabana emilimo echia Habundu Hatakatifu nende chiokhushimalilo shiemisango; kho mbu endeshe khandi okhutilwakhwo neliruma khubandu ba Isiraeli.

⁶Nisie owaahule abasiani benywe aboluyia lwa Abalawi okhurula mubandu ba Isiraeli okhuba eshihaanwa khwiwe. Bahulilwe isie khulwa okhukhola emilimo chiomwiheema.

⁷Nebutswa iwe nabasianibo mwenyene ninywe abakhalabana emilimo chiobwisaaliisi echiakhushimalilo shiemisango, nende echia Habundu Hatakatifu Muno. Emilimo chia habundu yaho chiosi nechichio, shichila ekhuhelesiye eshihaanwa shiobwisaaliisi. Ne omundu undi yesi oulakwanile ta, nasitakhwo ahambi nebindu ebitakatifu ebio alerwa.”

⁸Mana OMWAMI Nyasaye naboolale Haroni ari, “Witsulile mbu ekhuhelesiye biosi ebitong'anga khubiemisango chianje emisambe, ekhuhelesiye ebindu ebio shinga omukabokwo iwe nende abolwibulolwo kho mbu, bibe omukabo kwenywe okwa buli lwosi.

⁹Khubihaanwa ebili ebitakatifu muno ebilasambilwe khushimalilo shiemisango ta, bino bilaba ebibio; ebihaanwa bieimele, ebihaanwa biomusango kwobwonooni nende ebihaanwa biomusango kwomurungo. Buli shindu shiahaanilwe khwisie shinga omusango omutakatifu nishishio iwe nende abasianibo.

¹⁰Okhuula mubilile Habundu Hatakatifu Muno, ne buli mundu weshisaatsa anyala okhubiliakhwo, nebitakatifu khwinywe.

¹¹“Okhumeetakhwo, eshihaanwa shiosi eshiokhuchelwa eshia Abaisiraeli bahaanila shilaba eshienywe. Ekhuhelesiye ebio iwe, nabasianibo nende abakhaanabo okhuba omukabo kwenywe okwa buli lwosi. Omundu yesi owamunzuyo ouli omusiiye anyala okhubialiakhwo.

¹²“Khandi ekhuhelesiye amafura amalayi mumafura koosi, khandi idivai indayi mutsidivai tsiosi, nende imele indayi mutsimele, ekhuhelesiye halala nende ebichese biambeli ebia bahaanila isie.

¹³Ekhuhelesiye ebiamo ebiengu biambeli ebia bahaanila omundu yesi owomunzuyo ouli omusiiye anyala okhuliakhwo.

¹⁴“Eshindu shiosi mu Isiraeli eshiamala okhuhaanilwa isie neshishio.

¹⁵“Buli shindu eshikulanda shibe eshiomundu noho eshieisolo eshia Abaisiraeli bahaanila isie, shilabetsanga eshishio. Halali okhuula ofuchilile omurungo khulwa okhununula eshikulanda shiomundu nende eshia isolo yomusilo.

¹⁶Abaana abalanunulwa nabo, abali nomwesi mulala, omurungo kwabwe kulaba ebitonye bieifetsa birano okhuloondana neshichelo shiarebwaho.

¹⁷Nebutswa eshiambeli shieying'ombe, kata eshielikondi, kata eshieimbusi shibilanunulwa ta, okhuba nebianje, okhuula biirwe, ne ohanye amatsayi kabio khushimalilo shiemisango, mana osambe amasinya kabio shinga eshiokhulia eshisambilwe nomulilo eshie isakakha indayi khwisie.

¹⁸Ne inyama yabio yibe eyiyio, niyo itakata eyichelwa, eshiatakho eshisaatsa nende biemisango emiahule.

¹⁹“Ebihaanwa ebitakatifu biosi ebiabandu ba Isiraeli bahaanila isie, ekhuhelesiye iwe nabaanabo abasiani nende abakhaana boosi halala bibe bienywe bia buli lwosi. Ne yino neindakano eyilawaho ta, eya ekholile hakari wanje ninawe nende abolwibulolwo boosi.”

²⁰Mana OMWAMI Nyasaye naboolela Haroni ari, “Iwe shiolabetsanga nobulaame bwosi kata omukabo mushialo shia Isiraeli tawe. Isie nisie omukabokwo, khandi obulaamebwo mubandu ba Isiraeli.”

²¹OMWAMI Nyasaye naboola ari, “Ehelesiye Abalawi buli eshitonye shielikhumi shiosi eshia Abaisiraeli bandeerera, nishio omurungo kwabwe khulwa okhukhalabana khwabwe khwokhulinda liheema.

²²Ne okhurula inyanga yino Abaisiraeli bandi shibalasitakhwo ahambi nende liheema tawe, nibakhola bario balereerela eshinyasio shiokhufwa.

²³Okhurula bulano Abalawi nibo abalakhola emilimo mwiheema nende okhwitukha eshikha shiobwonooni obukholwa khwiheema elo. Lilako lino nelia buli lwosi mutsinzibulo tsienywe tsiosi. Abalawi shibalabakhwo nobulame bwemiandu chiabwe abeene mu Isiraeli tawe,

²⁴shichila abahelesiye eshitonye shielikhumi eshia Abaisiraeli banderela shinga eshihaanwa eshiahule. Niko akachila nimboola mbu shibalabakhwo nobulame bwemiandu chiabwe abeene mu Isiraeli tawe.”

²⁵Mana OMWAMI Nyasaye naboolela Musa

²⁶mbu aboolele Abalawi ari, “Olwa mubukula eshitonye shielikhumi okhurula mubandu aba Isiraeli eshia OMWAMI Nyasaye amuhelesinjia okhuba obulaame bwenywe, okhuula muhaane eshitonye shielikhumi okhurula khushio shinga eshihaanwa eshiahule khu OMWAMI Nyasaye.

²⁷Ne eshihaanwa shienywe eshio shilabasilibwa khwinywe shinga eshiomulimi ahaananga okhurula khuimeleye yambeli nende khuidivaiye yambeli.

²⁸Kho mwesi mulareera eshihaanwa khu OMWAMI Nyasaye okhurula khushitonye shielikhumi, shiamunyoola okhurula mubandu ba Isiraeli, ne eshihaanwa shienywe eshia OMWAMI Nyasaye eshio mulashihaana khumwisaaliisi Haroni.

²⁹Okhurula mubihaanwa bienywe biosi, muhaane ebihaanwa ebilayi okhushila biosi khandi ebitakatifu khu OMWAMI Nyasaye.

³⁰Olwa muba nimwakhahaana ebihaanwa ebilayi okhushila biosi, munyala okhubiikha ebitong'a shinga lwomulimi abiikhanga ebitong'a olunyuma lwokhuhaana eshihaanwashie.

³¹Ne inywe nende abomutsinzu tsienywe munyala okhulia ebitong'a ebio, habundu hosi hosi shichila nomurungo kwenywe khulwa obukhalabani bwenywe mwiheema.

³²Nenyu olwa muba nimuhaanile eshishila khushio shimulabakhwo nobwonooni bwosi bwosi khulwokhushilia tawe. Habula shimulonoonia ebihaanwa ebitakatifu ebia Abaisiraeli khulwa okhulia khubihaanwa biabwe, ne nimushili okhuhaana ebishila ebio obulayi tawe. Nimukhola murio mulafwa.”