Read wanga OBUBALI 19 Bible Online

OBUBALI 19 - wanga bible

OBUBALI 19

¹OMWAMI Nyasaye nalachilisia Musa nende Haroni ari,

²“Lino nilio lilako elia isie OMWAMI Nyasaye endachilisia mbu, oboolele Abaisiraeli bakhureerele ing'ombe imosi inzakhanyu eyibulakhwo obulema bwosi bwosi khandi eyishili okhukholakhwo omulimo kwosi kwosi.

³Nawe ochihaane khumwisaaliisi Eliazari. Mana yirusibwe elwanyi weikambi mana yisinzwe imbeliwe.

⁴Naye omwisaaliisi Eliazari abukulekhwo nolwalalwe amalasile kayo mana akahaanye okhuula musafu hambeli weliheema.

⁵“Mana imosi eyo yoosi yisambwe omwisaaliisi tsana nalolanga, bachisambe halala neliseelo liayo, inyama yayo, amalasile kayo halala nende amala kayo.

⁶Mana omwisaaliisi oyo abukule olusaala lwomusiita, amabinu nende omukoye omwakhanyu abisukune hakari womwalo.

⁷Olunyuma lwako, yosie ebifwalobie nende okhwisinga mumaatsi, ne namalile akenako alakalukha mukambi, habula omwisaaliisi oyo alaba owomusilo okhuula khungoloobe.

⁸Naye omundu oubisamba okhuula yesi yoosie ebifwalobie khandi yesinje, yesi khandi alaba womusilo okhuula khungoloobe.

⁹Ne omundu omusiiye abunjelesie likoshe lieimosi eyo mana alitsushe habundu hasiiyikhu elwanyi wekambi. Likoshe elo lilabiikhwa nende Abaisiraeli khulwa okhutsokaasibwa mumaatsi kokhusiiya nende akokhurusiaho obwonooni.

¹⁰Naye oubunjelesia likoshe lieimosi eyo okhuula yoosie ebifwalobie, yesi khandi alaba owomusilo okhuula khungoloobe. Lilako lino nelia buli lwosi khu Abaisiraeli nende khubarende abamenyanga mubo.

¹¹“Omundu yesi yesi outiila khumulambo aba owomusilo khulwetsinyanga musafu.

¹²Okhuula yesiiye omwene namaatsi akokhusiiya khunyanga yomusafu kho mana abe omusiiye. Nebutswa nalesiiya omwene khunyanga yakhataru nende yomusafu ta, shialabakhwo omusiiyikhu tawe.

¹³Omundu yesi yesi outiila khumulambo kwomundu, ne nalesiiya omwene ta, atsiililila okhuba owomusilo, shichila amaatsi kokhusiiya shikaba nikamulafiye ta, aba yonoonia liheema lianje litakatifu, ne shiaba mulala khubandu banje tawe.

¹⁴“Omundu yesi naba nafwiila mwiheemalie, omundu undi yesi yesi ouba nabele mwiheema elio mubise biomundu oyo afwililemwo kata owinjilamwo aba owomusilo khulwa tsinyanga musafu.

¹⁵Buli shindu shiosi kata inyungu yilafunikhwa tawe, yosi yiba eyomusilo.

¹⁶Omundu yesi naba natiila khumulambo kwomundu wirirwe noho oufwile butswa omwene noho outilakhwo khushikumba shiomundu oufwile noho khushilindwa, aba owomusilo khulwa tsinyanga musafu.

¹⁷“Khulwa okhusiiya, babukule likoshe elia ing'ombe yomusango kusambilwe khulwa okhurusiaho obwonooni, balire munyungu mana balitsokaasie namaatsi akomwalo kubiranga.

¹⁸Mana omundu omusiiye abukule amabinu, yeene mumanyasi tsana ako namiitsa khwiheema nende khubindu biosi nende khubandu boosi abalimwo. Omundu omusiiyikhu oyo ahanye amanyasi ako khumundu owatilakhwo khushikumba shiomulambo noho omulambo kwene noho eshilindwa.

¹⁹Ne omundu omusiiye amiitse khumundu womusilo khunyanga yakhataru nende khunyanga yomusafu, kho khunyanga yomusafu alamusiiya, ne owomusilo oyo afuye tsingubotsie nende okhwisinga omwene mumaatsi, ne khungoloobe alaba omusiiye.

²⁰“Nebutswa omundu yesi ouba owomusilo, nalesiiya omwene ta, shichila ashili okhutsukhwakhwo amanyasi kokhumusiiya, okhuula arusibwe mubandu banje shichila yonooniye liheema lianje litakatifu.

²¹Ne okhuula mulinde lilako lino buli lwosi. Naye oumiitsa amanyasi okhuula yesi afuye tsingubotsie. Omundu yesi outiila khumanyasi ako alaba owomusilo okhuula khungoloobe.

²²Ne eshindu shiosi shiosi shiomundu womusilo oyo atilakhwo, shiosi shiba shiomusilo khandi omundu yesi outiila khushindu tsana eshio yesi aba owomusilo okhuula khungoloobe.”