Read wanga OBUBALI 2 Bible Online

OBUBALI 2 - wanga bible

OBUBALI 2

¹OMWAMI Nyasaye naboolela Musa nende Haroni ari,

²“Abandu ba Isiraeli balakhoma tsikambi tsiabwe nibabotokhana liheema lianje litakatifu, buli mundu alaba aha eshilolelo shiabeshilibwashiw shili, nende aha ipendera yabeinzuye yili.”

³Abalakhoma ikambi yabwe elubeka lwebukwe eweliuba lirulilanga, balaba aboluyia lwa Yuda, ne omwimilisi wabwe alaba Nashoni, omusiani wa Aminadabu.

⁴Abomukandakwe shinga olwa babalwa balaba ebikhumila amakhumi musafu na bine nende ebikhumi bisasaba (74,600).

⁵Abalakhoma ikambi yabwe niyiloondana nende eyoluyia lwa Yuda, balaba aboluyia lwa Isakari, ne omwimilisi wabwe alaba Natsanieli omusiani wa Zuari.

⁶Aboluyialwe shinga olwa babalwa balaba ebikhumila amakhumi karano na bine nende ebikhumi bine (54,400).

⁷Mana abalaloondakhwo naboluyia lwa Zebuluni, ne omwimilisi wabwe niye Eliabu omusiani wa Heloni.

⁸Aboluyialwe shinga olwa babalwa balaba ebikhumila amakhumi karano na musafu nende ebikhumi bine (57,400).

⁹Aboluyia lwa Yuda boosi shinga olwa babalwa, mumikanda chiabwe, balaba ebikhumila amakhumi munane na bisasaba nende ebikhumi bine (186,400). Nibo abalaranjilila okhutsia.

¹⁰Abalakhoma ikambi yabwe elubeka lwemulambo balaba aboluyia lwa Rubeni, ne omwimilisi wabwe alaba Elizuri omusiani wa Shedeuri.

¹¹Aboluyialwe shinga olwa babalwa balaba ebikhumila amakhumi kane na bisasaba nende ebikhumi birano (46,500).

¹²Nabo abalakhoma ikambi yabwe nibaloondakhwo balala aboluyia lwa Simeoni, ne omwimilisi wabwe alaba Shelumieli omusiani wa Zurishadai.

¹³Aboluyialwe shinga olwa babalwa balaba ebikhumila amakhumi karano na shienda nende ebikhumi bitaru (59,300).

¹⁴Abalaloondakhwo naboluyia lwa Gadi, ne omwimilisi wabwe alaba Elisafu omusiani wa Rueli,

¹⁵Aboluyialwe shinga olwa babalwa balaba ebikhumila ebikhumi bine na birano nende ebikhumi bisasaba namakhumi karano (45,650).

¹⁶Abandu boosi abali mukambi ya Rubeni boosi shinga olwa babalwa mumikanda chiabwe bali ebikhumila ebikhumi birano na shilala nende ebikhumi bine na makhumi karano (151,450). Nibo abalaba abakhabili okhusumukha okhutsia.

¹⁷Mana liheema litakatifu nilichinjilwe nende aboluyia lwa Lawi lilaloondakhwo, nilili hakari wemikanda chiambeli chibili nende echiokhumalilikha chibili, kho okhuula bachende buli omukanda mubwiyangu bwakwo nende aha ipendera yabwe yili.

¹⁸Abalakhoma ikambi yabwe elubeka lwomumbo balaba aboluyia lwa Efuraimu, ne omwimilisi wabwe alaba Elishama omusiani wa Amihudi.

¹⁹Aboluyilwe shinga olwa babalwa balaba ebikhumila amakhumi kane nende ebikhumi birano (40,500).

²⁰Mana abalaloondakhwo balaba aboluyia lwa Manase, ne omwimilisi wabwe alaba Gamalieli omusiani wa Pedahazuri.

²¹Abomukandakwe shinga olwa babalwa balaba ebikhumila amakhumi kataru na bibili nende abikhumi bibili (32,200)

²²Mana abalaloondakhwo naboluyia lwa Benjamini, ne omwimisi wabwe alaba Abidani omusiani wa Gideoni.

²³Abomukandakwe shinga olwa babalwa balaba ebikhumila amakhumi kataru na birano nende ebikhumi bine. (35,400).

²⁴Abandu boosi abali mukambi ya Efuraimu boosi shinga olwa babalwa mumikanda chiabwe bali eshikhumila eshikhumi namunane nende eshikhumi shilala (108,100). Nibo abalaba abakhataru okhusumukha okhutsia.

²⁵Abalakhoma ikambi yabwe elubeka lwemasaba balaba aboluyia lwa Dani, ne omwimilisi wabwe alaba Ahiezeri omusiani wa Mishadayi.

²⁶Abomukandakwe shinga olwa babalwa balaba ebikhumila amakhumi kasasaba nabibili nende ebikhumi musafu. (62,700).

²⁷Nabo abalakhoma ikambi yabwe nibaloondakhwo balaba aboluyia lwa Asheri, ne omwimilisi wabwe alaba Pagieli, omusiani wa Okurani.

²⁸Aboluyialwe shinga olwa babalwa balaba ebikhumila amakhumi kane na shilala nende ebikhumi birano (41,500).

²⁹Abalaloondakhwo balaba abolwibulo lwa Nafutali, ne omwimilisi wabwe alaba Ahira omusiani wa Enani.

³⁰Abolwibulolwe shinga olwa babalwa balaba ebikhumila amakhumi karano na bitaru nende ebikhumi bine. (53,400)

³¹Abandu boosi abali mukambi ya Dani shinga olwa babalwa mumikanda chiabwe bali ebikhumila ebikhumi birano na musafu nende ebikhumi bisasaba (157,600). Nibo abalaba abokhumalilikha okhusumukha.

³²Aboluyia lwa Isiraeli shinga olwa babalwa boosi halala mubilibwa biabwe nende mumikanda chiabwe bali abandu ebikhumila ebikhumi bisasaba nebikhumi nabitaru nende ebikhumi birano namakhumi karano (603,550).

³³Nebutswa shinga OMWAMI Nyasaye yali nalachilisiye Musa, Abalawi shibabalilwa muluyia olwa Abaisiraeli tawe.

³⁴Kho abandu ba Isiraeli nibakhola buli shindu shinga olwa OMWAMI Nyasaye yali nalachilisiye Musa. Nibakhoma tsikambi tsiabwe, buli omukanda neipendera yabwe, ne nibatsia buli mundu nali mubeshilibwashie.