Read wanga OBUBALI 21 Bible Online

OBUBALI 21 - wanga bible

OBUBALI 21

¹Olwa omuruchi wa Abakanani, owarukanga Aradi, ne niyamenya Negebu yahulila mbu, Abaisiraeli betselanga khunjila yitsia Atsarimu, yarula nabaseera, ne natiila abandi khubo.

²Mana Abaisiraeli nibetsubila OMWAMI Nyasaye nibaboola bari, “Noba nokhunyalila okhuhula abandu bano, khulabamululila elala bo abeene halala namatookho kabwe.”

³OMWAMI Nyasaye nahulila okhulila khwabwe, ne nabanyalila okhuhula Abakanani. Kho Abaisiraeli nibamululila elala Abakanani nende amatookho kabwe mana nibakulikha habundu yaho eliira mbu Horima,[5]

⁴Mana Abaisiraeli nibasumukha okhurula khushikulu shia Hori nibalonda khunjila yitsia khunyanza inzakhanyu, mbu babotokhane eshialo shia Edomu. Nebutswa nibali khuluchendo olwo, bakhaywa okhwisimilisia.

⁵Kho nibeyiniakana khu Nyasaye nende khu Musa nibaboola bari, “Shichila shiina nimukhutikulusia okhurula Misiri, mbu khufwile mushitsiimi shino? Khubula eshiokhulia kata amaatsi, khandi ebiokhulia bino bikhusinyile.”

⁶Mana OMWAMI Nyasaye naruma emiyokha chiobufwisi obululu mubandu, nachio nichiluma Abaisiraeli abanji nibafwa.

⁷Mana abandu abo nibetsa khu Musa nibaboola bari, “Khwonoona olwa khweyiniakanila OMWAMI Nyasaye nende iwe, bulano khukhusaaya oboolele OMWAMI Nyasaye nachama arusie emiyokha chino mwifwe.” Mana Musa nasaayila abandu khu OMWAMI Nyasaye.

⁸Mana OMWAMI Nyasaye naboolela Musa ari, “Okaasie inzokha okhurula khumukasa mana ochisinjisie khumusaala, ne omundu yesi yesi oulumwa neinzokha nahengakhwo alamenya.”

⁹Musa nakaasia inzokha okhurula khumukasa nachisinjisia khumusaala, ne olwa inzokha yalumanga omundu yesi yesi, ne nahenga khuinzokha yomukasa eyo, ne abaho omulamu.

¹⁰Mana Abaisiraeli nibasumukha, ne nibakhoma ikambi yabwe Obotsi.

¹¹Khandi nibasumukha okhurula ebweneyo, ne nibakhoma ikambi yabwe mumahindi ka Abarimu akali mushitsiimi ebukwe wa Moabu.

¹²Okhurula yaho, basumukha nibakhoma ikambi yabwe mwibanda lia Zeredi.

¹³Okhurula yaho basumukha, ne nibakhoma ikambi yabwe elubeka lwemulambo lwomwalo kwa Arinoni okuli mushitsiimi, khulwakho lwa Abamori. (Okhuba omwalo kwa Arinoni nikwo olwakho lwa Abamoabu nende Abamori).

¹⁴Niko akachila eshitabu shiamahe aka OMWAMI Nyasaye shiboolanga mbu, “Litookho lia Wahebu elili mu Sufa nende amabanda komwalo kwa Arinoni,

¹⁵nende ebikholomokho biamabanda ako ebiulanga khwitaala lia Ari, ne nibitsia okhuula khulwakho lwa Moabu.”

¹⁶Okhurula yaho batsiililila okhuchenda niboola habundu halangwa mbu, amayabo, niho aha OMWAMI Nyasaye yaboolela Musa ari, “Khung'asia abandu boosi halala nasi ndalabahelesia amaatsi.”

¹⁷Mana Abaisiraeli nibemba olwimbo luno nibaboola bari,

¹⁸“Liyabo eliayabwa nabaruchi nende abakhongo babandu, eliayabwa nende indabushi yobwami nende emitunga chiabwe.” Ne okhurula mushitsiimi eshio, batsia Matana;

¹⁹ne okhurula Matana batsia Nahalieli, nibarula Nahalieli nibatsia Bamotsi,

²⁰nibarula Bamotsi nibatsia mwibanda elili mushialo shia Abamoabu ahambi nende khubutenje bweshikulu shia Pisiga, obuhenjile hasi mushitsiimi.

²¹Mana Abaisiraeli nibaruma abarume khu Sihoni omuruchi wa Abamori nibaboola bari,

²²“Oleshe khubirile mushialoshio; ifwe nemiruko chiefwe shilakotokhakhwo mumukundakwo noho mumukunda kwemitsabibu kata okhunywakhwo amaatsi mumayabo ta, habula khulalonda butswa khumuhanda omukhongo kwomuruchi okhuula olwa khuba nikhubirile mushialoshio.”

²³Nebutswa Sihoni shiyafuchilila Abaisiraeli okhubirila mushialoshie tawe. Kho nakhung'asia abelihebe boosi, ne narula okhuseerana nende Abaisiraeli mushitsiimi, habundu halangwa mbu eyahazi.

²⁴Abaisiraeli nibabeera netsinganga nende okhubukula eshialo shiabwe okhurula khumwalo kwa Arinoni okuli emasaba wa Yaboki okhuula khu Abamoni, shichila olwakho lwa Abamoni lwali liasirwa obutinyu.

²⁵Mana Abaisiraeli nibabukula amatookho ka Abamoni koosi halala nende elia Heshiboni namataala kalio ne nibamenyayo.

²⁶Heshiboni liali litookho likhongo lia Sihoni omuruchi wa Abamori, owali niyakhupana nende oyo owalinji omuruchi wa Moabu, ne niyabukula eshialoshie shiosi okhutsia okhuula khumwalo kwa Arinoni.

²⁷Niko akachila abareleesi betsinyimbo nibemba bari, “Mwitse Heshiboni; mwitookho liomuruchi Sihoni. Khwenyanga khuliumbashe obuyia khandi.

²⁸Okhuba omulilo kwarula mwitookho lia Sihoni, nikusasia litookho lia Ari eliali mu Moabu, nikusamba ebikulu bieinjelekha womwalo kwa Arinoni.

²⁹Inywe abandu ba Moabu mumululwe! Inywe abenamilanga omunyasaye Kemoshi musasibwe. Omunyasaye wenywe yalekha abasaatsa benywe nibaba abahuya huyi, nabo abakhasi nibaba ababohe abamahe bomuruchi wa Abamori.

³⁰Nebutswa abolwibulo lwabwe bulano bamululwe boosi pe, okhurula khwitookho lia Heshiboni okhuula khwitookho lia Diboni. Okhurula khwitookho lia Nashimu okhuula khu elia Nofa elili ahambi nende Medeba.”

³¹Kho Abaisiraeli nibamenya mushialo shia Abamori.

³²Mana Musa naruma abandu okhuhenjelesia shinga olwa bakhaseera litookho lia Yazeri. Abaisiraeli balibukula halala namataala kalio, ne nibalonda Abamori abali nibamenyamwo.

³³Mana Abaisiraeli nibashiukhana nibatikulushila khunjila ya Bashani, naye Ogu, omuruchi wa Bashani narula okhubaseera, ye nende abandube boosi nibetsa okhubaseera Ederei.

³⁴Ne OMWAMI Nyasaye naboolela Musa ari, “Shiolabaria ta, shichila emuhanile ye nende abandube boosi nende eshialoshie mumakhonoko, nawe olamukholela aka wakhola khu Sihoni omuruchi wa Abamori owarukanga Heshiboni.”

³⁵Kho Abaisiraeli nibera Ogu, nabasianibe nende abandube boosi, abulaho owehonokokha kata mulala tawe, mana nibabukula eshialoshie.