Read wanga OBUBALI 23 Bible Online

OBUBALI 23 - wanga bible

OBUBALI 23

¹Ne Balaamu naboolela Balaki ari, “Unyumbashile hano ebimalilo biemisango musafu, mana umbelesie hano tsisurusi musafu nende amamiiku musafu.”

²Ne Balaki nakhola shinga olwa yaboolelwa, mana Balaki nende Balaamu nibakholela omusango kweisurusi nende limiiku khubuli shimalilo shiemisango.

³Ne Balaamu naboolela Balaki ari, “Sinjila hemisangochio emisambe chili hano, nasi enzie endole nikali OMWAMI Nyasaye aleetsa okhunzakanila noho tawe, ne liosi liosi eliayamanyia ndalakhuboolela.” Ne natsia habutenje bweshikulu.

⁴Ne Nyasaye niyakana nende Balaamu, kho Balaamu naboolela Nyasaye ari, “Engasiye ebimalilo biemisango musafu, ne ekholile omusango kweihunwa nende limiiku khubuli shimalilo shiemisango.”

⁵Mana OMWAMI Nyasaye naboolela Balaamu akatsia okhuboolela Balaki.

⁶Kho nakalukha, ne nanyoola Balaki nende abemilisibe nibashisinjiile ahomusangokwe omusambe kwali.

⁷Mana Balaamu narumbula obulakusibwe naboola ari, “Balaki omuruchi wa Abamoabu yarusiye Siria, okhurula mubikulu biebukwe niyamboolela ari, ‘Witse wunaamile Abaisiraeli eshilaamo shiobubi, khandi obafukule.’

⁸Nasi ndakhalaamila endie abandu eshilaamo shiobubi, aba Nyasaye ashili okhulaamilakhwo ario? Ndakhekana endie abandu aba OMWAMI Nyasaye ashili okhwikaana?

⁹Okhuba nendi khubutenje bweshikulu ebalolanga, okhurula khubikulu ebahenganga. Noluyia lwabandu abamenya bonyene, Bamanyile mbu bamala okhulamilwa tsikhabi okhushila amahanga kandi.

¹⁰Abolwibulo lwa Isiraeli bali shinga olufu, nabanji abalanyala okhubalwa tawe. Lekha efwe lifwa liabalunjishi, nabwo obumalilishi bwanje bukhoya bube shinga obwabwe.”

¹¹Mana Balaki nareeba Balaamu ari, “Nishiina eshiawukholele shino? Ekhureerile olaamile abasuku banje eshilaamo shiobubi, nawe eshiokholile nokhubalaamila ikhabi!”

¹²Balaamu namukalusia ari, “Enyala okhuboola butswa aka OMWAMI Nyasaye yamboolela okhuboola.”

¹³Mana Balaki naboolela Balaamu ari, “Yitsa khutsie habundu undi aha onyala okhulolakhwo butswa Abaisiraeli batiti abali ahambi, shiolabalola boosi ta, mana obalaamile eshilaamo shiobubi abwene yaho.”

¹⁴Ne namuyila mumukunda kwa Zofimu khubutenje bweshikulu shia Pisiga, ne nibombakhaho ebimalilo biemisango musafu, nende okhukholelaho omusango kweihunwa nende limiiku khubuli shimalilo shiemisango.

¹⁵Balaamu naboolela Balaki ari, “Sinjila ahamisangochio emisambe chili hano, nasi enzie ndakane nende OMWAMI Nyasaye hambeli yaho.”

¹⁶Mana OMWAMI Nyasaye niyakana nende Balaamu, ne namuboolela aka atsia okhuboolela Balaki,

¹⁷Kho Balaamu nakalukha, ne nanyoola Balaki nende abakhulundube nibashisinjiile hamusango omusambekwe kwali. Mana Balaki namureeba ari, “OMWAMI Nyasaye aboolile shiina?”

¹⁸Naye Balaamu narumbula obulakusibwe naboola ari, “Yitsa Balaki omusiani wa Zipori, orecheresie akenzia okhuboola.

¹⁹Nyasaye shiali shinga omundu owakhabeeya ta, noho omundu namundu owakhakalukhana ta. Liosi liasuubisia okhukhola alihesinjia, ne liosi liaboola alikholanga.

²⁰Lola endachilwe okhusaba ikhabi: ne Nyasaye nahanile ikhabi shienyala okhuchikalukhasia tawe.

²¹Shiendutsikhwo amasila mu Isiraeli ta, noho kata amanyakhano mubo tawe. OMWAMI Nyasaye wabwe ali halala ninabo. Ne barumbulanga ye okhuba omuruchi wabwe.

²²Nyasaye yabarusia Misiri, ne niye oubalwanilanga shinga imboko

²³Bubulaho obufumu, noho obulosi obunyala okhufukula Abaisiraeli. Bulano abandu bakhaboole khu Abaisiraeli bari, ‘Lola aka Nyasaye akholile!’

²⁴Lihanga lia Isiraeli lili namaani shinga akeitalanyi, eyilakonanga hasi niyishili okhulia eshioluyitsi lwayo ta, khandi nende okhunywa amatsayi aka eshiayirire tawe.”

²⁵Mana Balaki naboolela Balaamu ari, “Nolalaamila abandu ba Isiraeli eshilaamo shiobubi ta, kho kata olabasabile ikhabi tawe.”

²⁶Nebutswa Balaamu yamukalusia ari, “Shiekhuboolele mbu, ndalakhola koosi aka OMWAMI Nyasaye yamboolela okhukhola?”

²⁷Mana Balaki naboolela Balaamu ari, “Bulano itsa khutsie ekhuyile habundu hundi, haundi kakhachamisia Nyasaye, kho akhunyalile unamile abandu bano eshilaamo shiobubi abwene yaho.”

²⁸Kho Balaki nayila Balaamu khubutenje bweshikulu shia Peori obuhengane neshitsiimi.

²⁹Ne Balaamu naboolela Balaki ari, “Nyumbashila hano ebimalilo biemisango musafu mana umbelesie hano tsisurusi musafu nende amamiiku musafu.”

³⁰Naye Balaki nakhola shinga olwa yaboolelwa, ne nibakholela omusango kweihunwa nende limiiku khu buli eshimalilo shiemisango.