Read wanga OBUBALI 24 Bible Online

OBUBALI 24 - wanga bible

OBUBALI 24

¹Olwa Balaamu yalola mbu, OMWAMI Nyasaye yenyanga Abaisiraeli basabilwe ikhabi, shiyatsia khubufumu shinga olwa yali nakholilenje tawe, habula yashiukhana ne nahenga butswa mushitsiimi.

²Ne nalola Abaisiraeli nibakhomile tsikambi tsiabwe okhulondana nende tsimbia tsiabwe. Ne Roho wa Nyasaye niyetsa khuye,

³naye narumbula obulakusibwe, naboola ari; “Obulakusi bwa Balaamu omusiani wa Beori aboola, amakhuwa akomundu wetsimonitsie tsilolanga obulayi

⁴khandi ouhulilanga amakhuwa ka Nyasaye. Ne tsimoni tsianje nitsitimbile endolanga lilolelo okhurula khu Nyasaye Owobunyali Bwosi.

⁵Amaheema ka Abaisiraeli nakobukondo obulayi,

⁶kali shinga emikhosi emirambi chiamashindu, khandi shinga emikunda chiokhumwalo; Kali shinga ebikakha ebia OMWAMI Nyasaye yaraaka, khandi shinga emisiita chiokhumatsi.

⁷Balaba neifula yinyinji, khandi balaraka imwo yabwe mumikunda chikwisilibwe ifula. Omuruchi wabwe alabakhwo omukhongo okhushila Agagi. Ne oburuchibwe buloola ehale.

⁸Nyasaye yabarusia Misiri; Naye abalwanilanga shinga imboko, Basasinjia abasuku babwe batubulanga amakumba kabwe, nibafunaka obuyingo bwabwe

⁹Abandu abo bali shinga italanyi ikhasi, niyikonile hasi abulaho owakhehaka okhuchibusia. Omundu oulamila Isiraeli ikhabi aba neikhabi, naye oubalama eshilaamo shiobubi, omwene aba mushilaamo eshio.”

¹⁰Mana Balaki natiilwa noburuma khu Balaamu, ne nakunja ebifusi namuboolela ari, “Isie ekhulanjile witse wunamile abasuku banje bano eshilaamo shiobubi, nawe lola wakhabalaamila ikhabi okhuula khataru.

¹¹Khulweshio, bulano sumukha okalushe ewuwo; embeele nemboolile mbu, toto mwene ndalakhuhelesia eshihaanwa eshioluyali nebutswa OMWAMI Nyasaye akhwikalile okhunyoola eshihaanwa eshio.”

¹²Balaamu naboolela Balaki ari, “Ndaboolela abandubo abawarumila mbu,

¹³kata niwakhambelesia ifetsa nende itsahabu yoosi eyili munzuyo shienyala okhulekha okhuloonda lilako elia OMWAMI Nyasaye mbu, ekhole eliokhunjamisia isie omwene tawe. Habula ndaboola butswa aka OMWAMI Nyasaye yamboolela okhuboola.”

¹⁴Mana Balaamu naboolela Balaki ari, “Bulano, isie engalukhanga khu bandu banje nebutswa neshili okhukalukha enzia okhukhuchetsiyia akabandu aba Isiraeli bano balikholela abandubo mutsinyanga tsitsanga.”

¹⁵Ne narumbula obulakusibwe naboola ari, “Obulakusi obwa Balaamu omusiani wa Beori aboola, amakhuwa akomundu wetsimonitsie tsilolanga obulayi,

¹⁶khandi oyo ouhulilanga amakhuwa ka Nyasaye. Khandi ounyoolanga obuchesi okhurula khu oyo Omukhongo Muno. Netsimoni tsianje nitsitimbile endolanga lilolelo okhurula khu Nyasaye Owobunyali Bwosi.

¹⁷Ehenganga mutsinyanga tsiolunyuma, mana endola lihanga lia Isiraeli. Omuruchi alibukha mwihanga elo, ouliang'ang'a shinga ing'ining'ini. Indabushi yobwami yilirula mu Isiraeli. Alikhupa abemilisi ba Abamoabu, nende okhupa hasi abandu ba Setsi boosi.

¹⁸Abaisiraeli balihula Abaedomu nende okhubukula eshialo shiabasukube aba Seiri.

¹⁹Omuruchi wa Abaisiraeli aliruka nende okhusasia abehonokokha okhufwa okhurula mumatookho ka Moabu.”

²⁰Mana Balaamu nalola Abameleki mwilolelolie, ne narumbula obulakusi buno khubo naboola ari, “Amaleki liali lihanga liamaani mumahanga koosi, nebutswa mubumalilishi babalisasilibwe elala.”

²¹Mana nahenga khu Abakeni, ne narumbula oburumbusi khubo naboola ari, “Eshimenyo shienywe neshiralilu, ne eshitsu shienywe shiarebwa mulwanda,

²²Nenyu Abakeni mwakhasasibwe olwa mwakhahambwe nende Abasiria.”

²³Khandi narumbula oburumbusi naboola ari, “Woowe! Nibena abakhabeho mwoyo olwa Nyasaye yakhakhole amakhuwa ako?

²⁴Abaseeri bakhetsele mumeeli nibarula Kupuro, bakhahulile abandu ba Siria nende aba Eberi. Nebutswa boosi khandi balisishila elala.”

²⁵Mana Balaamu nasumukha, ne nakalukha ingowe, naye Balaki yesi narulaho natsia.