Read wanga OBUBALI 25 Bible Online

OBUBALI 25 - wanga bible

OBUBALI 25

¹Olwa Abaisiraeli bali nibamenya mwibanda lia Akakia, bachaaka okhuheya nabakhasi Abamoabu abali nibamenyayo.

²Abakhasi abo nibalanga Abaisiraeli okhukhola amasabo akokhwinamila omunyasaye wa Moabu. Abaisiraeli nibalia ebiokhulia biamasabo ako khandi nibenamila omunyasaye wabwe mbu, Baali owa Peori.

³Kho OMWAMI Nyasaye nabasinyishila

⁴ne naboolela Musa ari, “Bukula abemilisi boosi ba Abaisiraeli bano abali abakhayi khwisie, obeere mushiteere habulafu, mana nasi shindalasinyishila abandu banje tawe.”

⁵Mana Musa naboolela abemilisi abo ari, “Buli shiamulala khwinywe yeere buli mundu owomuluyialwe owinamilanga omunyasaye Baali wa Peori.”

⁶Ne mulala khubasaatsa aba Isiraeli yetsa narera munzumwe omukhasi omumidiani, Musa nende abomukanda kwabandu nibalolanga, olwa bali nibashililanga hamuliango kweliheema litakatifu.

⁷Olwa Finehasi omusiani wa Eliazari omwitsukhulu wa Haroni omwisaaliisi yalolakhwo ako, yabukha nalekha abomukanda; Yabukula lifumo

⁸ne nalonda khumusaatsa oyo nende omukhasi oyo niyenjila mushikoro shiomukari shieinzuye mana nabafumira boosi, omusaatsa oyo nende omukhasi oyo. Nalwo olumbe olwali nilwiranga Abaisiraeli lwasinjisibwa.

⁹Ne lwali nilumalile okhwira abandu ebikhumila amakhumi kabili nabine (24,000).

¹⁰Mana OMWAMI Nyasaye naboolela Musa ari,

¹¹“Shieshisinyishile Abaisiraeli tawe, khulwa okhubeela aka Finehasi akholile shiachamile okhulola nibenamila omunyasaye undi yesi ta, habula okhunzinamila isie, niko akachila nilabamulula neliruma lianje tawe.

¹²Kho muboolele mbu, ndalakhola indakano eyeinziayo ninaye.

¹³Omwene nende aboluyialwe balaba abesaaliisi inziayo, shichila shiafuchililekhwo obuyingani bwosi khwisie tawe khandi achilile abandu nibaleshelwa obwonooni bwabwe.

¹⁴“Elira liomusaatsa omuisiraeli owerwa halala nende omukhasi Omumidiani liali, Zimuri omusiani wa Salu, omwimilisi waboluyia lwa Simeoni.

¹⁵Ne eliira liomukhasi omumidiani owerwa liali Kozibi omukhaana wa Zuri, owali omwimilisi wabeshilibwa mu Midiani.”

¹⁶Mana OMWAMI Nyasaye nalachilisi Musa ari,

¹⁷“Seera Abamidiani, mana obeere,

¹⁸khulwa okhubela obwonooni bwabakhukholela olwa bakhukaatia Peori khandi nende khulwa Kozibi oweerwa mutsinyanga tsiolumbe Peori.”