Read wanga OBUBALI 26 Bible Online

OBUBALI 26 - wanga bible

OBUBALI 26

¹Olunyuma lwolumbe olwo, OMWAMI Nyasaye yaboolela Musa nende Eliazari omusiani wa Haroni omwisaaliisi ari,

²“Obale obunji bwa bandu mubuli tsinzu etsia buli omukanda okwa Abaisiraeli; abemiyika amakhumi kabili nende okhubiraho, abanyala okhulwana mwihe.”

³Mana Musa nende Eliazari omwisaaliisi nibaboolela Abaisiraeli nibali mumuhololookhwe kwa Moabu ahambi khumwalo kwa Yorodani Yericho bari,

⁴“Mubale abandu boosi abemiyika amakhumi kabili nende ababisiaho, shinga olwa OMWAMI Nyasaye yalaka Musa. Bano nibo Abaisiraeli abarula mushialo shia Misiri.”

⁵Abolwibulo lwa Rubeni omusiani wambeli wa Yakobo, abeshilibwa shia Hanoki, Palu

⁶Hezironi nende Karimu.

⁷Boosi bali abandu ebikhumila amakhumi kane na bitaru nebikhumi musafu nende amakhumi kataru. (43,730).

⁸Palu yebula Eliabu,

⁹Eliabu niyebula Namueli, Datsani nende Abiramu. Datsani nende Abiramu nibo abahulwa nomukanda. Bakhaya okhuhulila Musa nende Haroni nibeyunga nende abomukanda kwa Kora abakhaya okhuhulila OMWAMI Nyasaye.

¹⁰OMWAMI Nyasaye nakhola liloba liasama mana nilibamila boosi, ne nibafwa halala nende Kora nabomukandakwe lwomulilo kwasamba abandu ebikhumi bibili namakhumi karano (250) ne nibaba eshilolelo shiokhuchetsiyia khubandu.

¹¹Nebutswa abaana ba Kora shibafwa tawe.

¹²Aboluyia lwa Simeoni okhulondana nende ebilibwa biabwe bali; abebiilibwa shia Nemweli, Yamini, Yakini,

¹³Zera nende Shauli.

¹⁴Abebilibwa bano bali abandu ebikhumila amakhumi kabili na bibili nende ebikhumi bibili (22,200).

¹⁵Aboluyia lwa Gadi okhulondana nende ebilibwa biabwwe bali abebilibwa bia Zefoni, Hagi, Shuni, Zefoni,

¹⁶Ozini, Eri

¹⁷Arodi nende Areli.

¹⁸Abebilibwa bano bali ebikhumila amakhumi kane nende ebikhumi birano (40,500).

¹⁹Abasiani ba Yuda bali Eri nende Onani; ne babili bano bafwila mushialo shia Kanani.

²⁰Aboluyia lwa Yuda okhulondana nende ebilibwa biabwe bali, abebilibwa bia Shela, Perezi, Zera;

²¹Nabo abaana ba Perezi bali abeinzu ya Hezironi nende Homuli.

²²Abo nibo abali abebilibwa bioluyia lwa Yuda abandu ebikhumila amakhumi musafu na basasaba nende ebikhumi birano. (76,500).

²³Aboluyia lwa Isakari okhulondana nende ebilibwa biabwe bali; abebilibwa bia Tola, Puwa

²⁴Yashubu nende Shimuroni.

²⁵Abebilibwa bino bali abandu ebikhumila amakhumi kasasaba nabine nende ebikhumi bitaru (64,300).

²⁶Oluyia lwa Zebuluni lwali nebilibwa biabwe mbu Seredi, Eloni, Yahalili.

²⁷Bano nibo abali abeshilibwa shia Zebuluni, abandu ebikhumila amakhumi kasasaba nende ebikhumi birano (60,500).

²⁸Aboluyia lwa Yosefu owebula abasiani babili Manase nende Efuraimu.

²⁹Aboluyia lwa Manase bali; Marichiri omusiani wa Manase niye owali samwana Giliadi. Abebilibwa baloondakhwo bano barula khu Giliadi;

³⁰abebilibwa bia Yezeri, Heleki,

³¹Asirieli Shekemu.

³²Nende Shemila, nende Heferi.

³³Naye Zehofehadi omusiani wa Heferi shiyayebulakhwo abasiani ta, habula abakhaana; ne ameera kabakhana ba Zelofehadi kali Mahala, Nuwa, Hagila, Milika nende Tiriza.

³⁴Bano nibo abali abeshilibwa shia Manase; obunji bwabwe bali ebikhumila amakhumi karano na babili nende ebikhumi musafu (52,700).

³⁵Ne bano nibo abali aboluyia lwa Efuraimu okhulondana nende ebilibwa biabwe; abebilibwa bia Shutsela, Pekeri, Tahani,

³⁶Ne bano nibo aboluyia lwa Shutsela; abeshilibwa shia Erani.

³⁷Bano nibo bali abeshilibwa shia Efuraimu, obunji bwabwe bwali abandu ebikhumila amakhumi kataru nende ebikhumi birano (32,500). Bano nibo abali aboluyia lwa Yosefu okhulondana nende ebilibwa biabwe.

³⁸Abolwibulo lwa Benjamini okhulondana nende ebilibwa biabwe bali; abeshilibwa Bela, Ashibeli Ahiramu,

³⁹Shefufamu nende Hufamu okhurula khu Hufamu.

⁴⁰Nabo abasiani ba Bela bali Aridi nende Naamani.

⁴¹Bano nibo abali abeshilibwa shia Benjamini obunji bwabwe bwali ebikbumila amakhumi kane nabirano nende ebikhumi bisasaba (45,600).

⁴²Aboluyia lwa Dani okhulondana nende ebilibwa biabwe bali; abeshilibwa Shuhamu.

⁴³Aboluyia lwa Dani, boosi halala bali ebikhumila amakhumi kasasaba nabine nebikhumi bine (64,400).

⁴⁴Abolwibulo lwa Asheri okhulondana nende ebilibwa biabwe bali; abeshilibwa Imuna, Ishiwi, Beriaha.

⁴⁵Abolwibulo lwa Beria bali abeshilibwa shia Heberi, Malikieli okhurula khu Malikieli.

⁴⁶Ne eliira liomukhaana wa Asheri liali Sera.

⁴⁷Bano nibo abali abeshilibwa shiabasiani ba Asheri, obunji bwabwe bwali ebikhumila amakhumi karano nabitaru nende ebikhumi bine (53,400).

⁴⁸Abolwibulo lwa Nafutali okhulondana nende abebilibwa biabwe bali; abeshilibwa Yahazeli, Guni;

⁴⁹Yazeri, Shilemu.

⁵⁰Bano nibo abali aboluyia lwa ba Nafutali, boosi bali ebikhumila amakhumi kane nabirano nende ebikhumi bine (45,400).

⁵¹Obunji bwa babndu ba Isiraeli boosi bali ebikhumila ebikhumi bisasaba nashilala nebikhumi musafu namakhumi kataru (601,730).

⁵²OMWAMI Nyasaye naboolela Musa ari,

⁵³“Kabulila tsimbia etsio omukunda okhulondana nobunji bwabandu batsio.

⁵⁴Khuboluyia olukhongo olabahelesia omukabo omukhongo ne khuboluyia olututu obahelesie omukabo omututu; buli oluyia olukabulile omukunda okhulondana nobunji bwabandu balwo.

⁵⁵Nebutswa eshialo eshio shikabwe khulwa okhupa ikha. Mana okabe omukunda omukhongo khuluyia olukhongo, nakwo mututu khuluyia olututu.

⁵⁶Omukabo okwa buli oluyia kulakabwa khulwa okhupa ikha. Buli oluyia lulakabwa okhulondana nobunji bwabandu balwo.”

⁵⁷Aboluyia lwa Lawi bali abeshilibwa shia Gerishoni, Kohatsi nende Merari.

⁵⁸Tsino nitsio tsinzu tsioluyia lwa Lawi; inzu ya Libini, inzu ya Heburoni, inzu ya Mahali, inzu ya Mushi nende inzu ya Kora. Ne Kohatsi yali samwana Amuramu.

⁵⁹Eliira liomukhasi wa Amuramu liali Yokebedi omukhaana wa Lawi, owayebulila Misiri. Naye Yokebedi yebulila Amuramu, Haroni, Musa nende Miriamu omukhaana wabwe.

⁶⁰Ne abaana ba Haroni bali Nadabu, Abihu, Eliazari nende Itsamari,

⁶¹Nebutswa Nadabu nende Abihu bafwa olwa basambila OMWAMI Nyasaye obubane obulali obutakatifu tawe.

⁶²Abaana abasiani Abalawi abali abomwesi mulala nende okhubisiaho bali ebikhumila amakhumi kabili na bitaru (23,000). Bano shibaabalwa halala nende Abaisiraeli bandi ta, shichila shibakabwakhwo omukabo kwosi mu Isiraeli tawe.

⁶³Bano nibo Abaisiraeli abasaatsa aba Musa nende omwisaaliisi Eliazari babala olwa abandu ba Isiraeli bali nibali mumuhololokhwe kwa Moabu ahambi nende omwalo okwa Yorodani, nibashile okhwambukha okhutsia Yeriko.

⁶⁴Nebutswa mubandu bano shiyalikhwomwo omusaatsa kata mulala khuba Musa nende Haroni omwisaaliisi babala olwa Abaisiraeli bali mushitsiimi shia Sinai ta.

⁶⁵OMWAMI Nyasaye yali niyalaka mbu boosi bakhafwile mushitsiimi mana toto boosi nibafwa, okhurusiakhwo Kalebu omusiani wa Yefuna nende Yoshwa omusiani wa Nuni.