Read wanga OBUBALI 27 Bible Online

OBUBALI 27 - wanga bible

OBUBALI 27

¹Abakhaana ba Zelofehadi omusiani wa Heferi, owa Giliadi, owa Makiri, owa Manase okhurula muboluyia lwa Manase omusiani wa Yosefu bali; Maala, Nowa, Hogila, Milika nende Tiriza.

²Abakhaana bano batsia imbeli wa Musa, Eliazari omwisaaliisi, abemilisi nende abomukanda kwosi hamuliango kweliheema Litakatifu nibaboola bari,

³“Papa wefwe yafwila mushitsiimi, ne shiyalekhakhwo abaana abasiani kata mulala tawe. Shiyali mulala khubalondi abakora abakhaya okhuhulila OMWAMI Nyasaye tawe; Yafwa khulwa okhubeela obwonoonibwe omwene.

⁴Eshichila eliira lia papa wefwe libililwe mu Isiraeli khulwa okhubela shiyalikhwo nabaana abasiani ta, nishiina? Mukhukabekhwo omukabo okhurula mumukabo okwa abasiani babwe papa.”

⁵Musa nareera amakhuwa kabwe khu OMWAMI Nyasaye.

⁶Naye OMWAMI Nyasaye naboolela Musa ari,

⁷“Abakhaana ba Zelofehadi bali habwene; obahelesie omukabo kwakhabele kwa samwana okhurula mubasiani babwe.

⁸Mana oboolele abandu ba Isiraeli mbu ‘Omundu naba nafwa ne nalalikhwo nomusiani ta, mubukule omukabo kwakhabele okukwe mana mukabile abaanabe abakhaana.

⁹Ne naba nabula abakhaana kho muhelesie obulaamebwe abasiani babwe.

¹⁰Ne naba nabula abasiani babwe, kho muhelesie obulamebwe abasiani babo samwana.

¹¹Ne naba nabula abasiani babwe kata abasiani babo samwana, kho omwikhowe owa hambi muluyialwe akabwe obulaame obwo mana bube obubwe. Abaisiraeli okhuula balonde lilako lino shinga Isie OMWAMI Nyasaye emulachilisiye.’ ”

¹²OMWAMI Nyasaye naboolela Musa ari, “Tikulukha otsie mushikulu shia Abiramu shino mana olole eshialo eshiandahelesia abandu ba Isiraeli.

¹³Ne lwoba nomalile okhushilola olafwa shinga lwomusiani wenywe Haroni yafwa.

¹⁴Shichila mwakhaya okhulonda lilako lianje mushitsiimi shia Zini. Olwa abomukanda banziyiniakanakhwo Meriba mwaloba okhubalolosilia obunyali bwanje obutakatifu.” (Meriba neyisebele yamaatsi eyili Kadeshi mushitsiimi shia Zini).

¹⁵Musa nasaaya OMWAMI Nyasaye naboola ari,

¹⁶“Niwe OMWAMI Nyasaye, khandi omanyile amakhuwa koosi akali mumwoyo kwomundu. Kho ekhusaba mbu, wahule omwimilisi wa Isiraeli.

¹⁷Abandubo benya omundu ounyala okhubemilila mwihe; nebutswa bakhaba shinga amakondi katimatimanga eyi nende eyi nikabula omwayi.”

¹⁸Mana OMWAMI Nyasaye naboolela Musa ari, “Bukula Yoshwa omusiani wa Nuni, omusaatsa owa omwoyo omulayi, mana ore amakhonoko khumurwekwe okhumanyia mbu Yahulwe.

¹⁹Ne omurere asinjile imbeli wa Eliazari omwisaaliisi nende abomukanda boosi mana orumbule nibaliho mbu niye oukalushe mushilenjeshio.

²⁰Ne oboolele abomukanda mbu, okhuula bamuhelesie oluyali, shinga olwa bakhuhelesinjia iwe.

²¹Yoshwa okhuula yeletenje khu Eliazari omwisaaliisi, owitsa okhumanyilisinjia akenzenya niyekhoonyelanga Urimu nende Tsuminu. Munjila yino nolwa Eliazari alanyala okhwibalila Yoshwa nende abomukanda kwosi okwa Abaisiraeli mumakhuwa kabwe koosi?

²²Mana Musa nakhola shinga olwa OMWAMI Nyasaye yali namulachilisiye. Namureera Yoshwa okhusinjila imbeli wa Eliazari omwisaaliisi nende abomukanda boosi.

²³Mana Musa nara amakhonoke khumurwe wa Yoshwa mana namurumbula okhuba oukalushe mushilenjeshie shinga OMWAMI Nyasaye yali nalachilisiye.”