Read wanga OBUBALI 28 Bible Online

OBUBALI 28 - wanga bible

OBUBALI 28

¹OMWAMI Nyasaye nalachilisia Musa,

²mbu aboolele Abaisiraeli bahaanenje khu Nyasaye emisango chiebiokhulia echikwanile echimuchamisia khubise ebiahule.

³Chino nichio emisango echiebiokhulia echihaanwa khu OMWAMI Nyasaye: amamiiku kabili akamalile omwika mulala akalalikhwo nobulema bwosi tawe khulwa omusango omusambe okwa buli inyanga.

⁴Muhaane elala mumabwibwi nalo elindi khungoloobe.

⁵Buli elala muhaanenje nende ikilo ndala yobusie obwomusango okweimele butsokasibwemwo ilita ndala eyamafura amalayi akemitsaituni.

⁶Kuno nikwo omusango musambe kwa buli lwosi okwahaanwa olwambeli khushikulu shia Sinai okweshiokhulia okuli isakakha eyinjamisinjia isie OMWAMI Nyasaye;

⁷Ne idivai eyomusango okwa idivai yihaanilwa halala nende limiiku ilabetsanga ilita ndala. Mutsushilile idivai yomusango kuno habundu hatakatifu.

⁸Muhaane limiiku eliakhabili khungoloobe halala nende omusango okweidivai shinga mukholile mumabwibwi. Kulaba kwosi khandi omusango okwebiokhulia, okuli okwe isakakha indayi khwisie OMWAMI Nyasaye.

⁹Khunyanga yokhusabato mulahaananga amamiiku kabili akomuyika mulala akalalikhwo nobulema bwosi tawe, obusie tsikilo tsibili obutsokasiibwemwo amafura kemiseituni shinga omusango okweimele nende omusango okweidivai.

¹⁰Omusango musambe kuno okhuula kuhaanungwe buli khusabato okhumeeta khumusango okwa buli lwosi nende omusango okwa idivai yakwo.

¹¹Buli khunyanga yambeli yokhumwesi mulahananga isie OMWAMI Nyasaye omusango omusambe. Muhaanenje tsihunwa tsibili, limiiku elala nende ebimeme musafu ebiamakondi ebiaomuyika mulala, biosi ebibula obulema.

¹²Muhaane obusie butsokasibwemwo amafura akemitseituni okhuba omusango okweimele. Buli ihunwa muhaane mobusie tsikilo tsitaru, limiiku, obusie tsikilo tsibili

¹³Buli eshimeme shielikondi obusie ikilo ndala. Emisango chino emisambe nichio emisango echiebiokhulia echia isakakha indayi khu OMWAMI Nyasaye.

¹⁴Eshichelo shikhoyele omusango okwaidivai nitsilita tsibili khubuli ihunwa, ilita ndala nende inusu khubuli limiiku nende ilita ndala khubuli eshimeme shielikondi. Lino nilio lilako eliomusango omusambe okwa inyanga yambeli eya buli omwesi mumuyika kwosi.

¹⁵Muhaane imbusi ikhole eyomusango okwobwonooni okhumeeta khumusangoo omusambe okwa buli lwosi nende okwaidivai yakwo.

¹⁶Lisabo lia Pasaka elia okhuhelesia OMWAMI Nyasaye oluyali, okhuula likholungwe khunyanga yekhumi nakhane yomwesi kwambeli.

¹⁷Lisabo elo lilachaka khunyanga yekhumi nakharano nilitsiililila khulwa tsinyanga musafu, tsinyinga etsio tsiosi okhuula mulitsenje emikaate chibulamwo limela.

¹⁸Khunyanga yambeli mulabetsanga nomukhung'ano omutakatifu: mulakholakhwo omulimo kwosi ta,

¹⁹halali muhane eshihanwe shieimele eshisambilwe nomulilo, ne khulwa omusango omusambe okwa OMWAMI Nyasaye, muhaane, tsihunwa tsibili, limiiku elala, nende ebimeme musafu biamakondi biomuyika mulala ebibulakhwo obulema bwosi.

²⁰Ne omusango kweimele kwabio kwobusie obunyushe obutsokasiibwemwo amafura nikwo kuno; tsikilo tsitaru tsiobusie obunyushe khulwa buli ihunwa, tsikilo tsibili tsiobuusie khulwa buli limiiku;

²¹nende ikilo ndala khulwa buli eshimeme.

²²Khandi mulahana imbusi ikhole khulwa omusango kwobwonooni khulwa okhumukholela eshitiso.

²³Mulahana bino okhumeeta khumusango omusambe kwakhatsotso kwomumabwibwi.

²⁴Nolwa mulahaananga buli nyanga khulwa tsinyanga musafu, ebiokhulia ebisambilwa khumulilo ebieisiakakha indayi khu OMWAMI Nyasaye. Mulahananga omusango kuno okhumeeta khumusango musambe kwakhatsotso nende omusango kwakwo kweidivai.

²⁵Ne khunyanga yamusafu mulaba nomukhung'ano omutakatifu, ne shimulakholakhwo omulimo kwosi kwosi tawe.

²⁶Ne khunyanga yambeli yelisabo lielichesa, olwa muhanila OMWAMI Nyasaye omusango kweimele imbia, okhuula mube nomukhung'ano omutakatifu, ne shimulakholakhwo emilimo emisiro ta,

²⁷habula mulahana omusango omusambe kweisakakha indayi yokhuchamisia OMWAMI Nyasaye, nikwo kuno: tsihunwa tsibili, limiiku elala, nende ebimeme biamamiiku musafu biomuyika mulala. Biosi bibe ebibulakhwo obulema bwosi.

²⁸Ne muhaane omusango kwabio kweimele kwobusie obunyushe obutsokasiibwemwo amafura, tsikilo tsitaru khulwa buli ihunwa, tsikilo tsibili khulwa limiiku lilala,

²⁹nende ikilo ndala khulwa buli eshimeme shilala.

³⁰Nende imbusi ikhole khulwa okhumukholela eshitsiso.

³¹Muhaane emisango echio nende emisango chieidivai okhumeeta khumusango musambe kwakhatsotso nende omusango kweimele. Ne mulole mbu tsisolo etsio tsibula obulema bwosi bwosi.