Read wanga OBUBALI 29 Bible Online

OBUBALI 29 - wanga bible

OBUBALI 29

¹OMWAMI Nyasaye naboolela Musa ari, “Khunyanga yambeli yomwesi kwomusafu mulabetsanga nende omukhung'ano omutakatifu, shimulakholakhwo emilimo chiosi chiosi tawe. Eyo neinyanga yenywe eyokhupa tsitarumbeta.

²Mulahaana omusango omusambe kweisakakha indayi yokhunjamisia isie OMWAMI Nyasaye. Muhane ihunwa ndala, limiiku elala nende amamiiku musafu akomuyika mulala, ebibula obulema bwosi bwosi.

³Muhane omusango kwabio kweimele kwobusie obunyushe obutsokasiibwemwo amafura; tsikilo tsitaru khulwa buli ihunwa, tsikilo tsibili khulwa buli limiiku,

⁴nende ikilo ndala khulwa buli eshimeme shilala khubimeme musafu ebio,

⁵nende imbusi ikhole khulwa omusango kwobwonooni khulwa okhumukholele eshitiso.

⁶Mulahaananga omusango kuno okhumeeta khumusango omusambe kwokhulaba khwomwesi nende omusango kwakwo kweimele nende omusango omusambe kwa buli lwosi, omusango kwakwo kweimele nende kweidivai nimulonda akalachilisibwa khuchio, chibe emisango emisambe chieisakakha yokhunjamisia isie OMWAMI Nyasaye.”

⁷OMWAMI Nyasaye naboolela Musa ari, “Khunyanga yekhumi yomwesi kwomusafu mulabetsanga nomukhung'ano omutakatifu, mwihesie abeene eshinyasio khulwa okhwiyima eshiokhulia khandi mulakholakhwo omulimo kwosi kwosi ta,

⁸habula muhaana omusango omusambe kweshiuya eshilayi eshinjamisinjia isie OMWAMI Nyasaye, muhane ihunwa ndala, limiiku elala nende ebimeme biamamiiku musafu komuyika mulala, ne biosi bibe ebibulakhwo obulema bwosi,

⁹nende omusango kwabio kweimele kwobusie obunyushe nibutsokasibwemwo amafura mbu, tsikilo tsitaru khulwa buli ihunwa, tsikilo tsibili khulwa buli limiiku elala nende

¹⁰ikilo ndala khulwa buli eshimeme shilala khubimeme musafu ebiamakondi ebio.

¹¹Muhaane khandi imbusi ikhole khulwa omusango kwobwonooni okhumeeta khu imbusi yomusango kweshitiso nende khumusango omusambe kwa buli lwosi nende omusango kwakwo kweimele nende kweidivai.”

¹²OMWAMI Nyasaye naboolela Musa ari; “Mube nomukhung'ano omutakatifu khunyanga yekhumi nakharano yomwesi kwomusafu. Mukhole lisabo elo khulwa okhumbelesia oluyali khulwa tsinyanga musafu, ne mulakholakhwo omulimo kwosi kwosi tawe.

¹³Khunyanga yambeli muhaane omusango omusambe, okusambilwe khumulilo kweisakakha eyokhunjamisia isie OMWAMI Nyasaye, nikwo: tsihunwa ekhumi natsitaru, amamiiku kabili, ebimeme biamamiiku ekhumi nabine biomuyika mulala ebilalikhwo nobulema bwosi bwosi tawe.

¹⁴Muhane eshichelo shikhoyele shiobusie butsokasibwemwo amafura akemitseituni okhuba omusango okweimele. Obusie tsikilo tsitaru khubuli ihunwa, tsikilo tsibili khubuli limiiku,

¹⁵nende ikilo ndala khubuli eshimeme shielikondi halala nomusango kweidivai okukhoyele.

¹⁶Muhaane khandi imbusi ikhole khulwa omusango kwobwonooni; khulwa okhumeeta khumusango omusambe okwa buli lwosi halala nomusango kwakwo kweimele nende okwa idivai.

¹⁷“Khunyanga yakhabili muhaane tsihunwa ekhumi natsibili, amamiiku kabili, nende ebimeme biamamiiku ekhumi nabine biomuyika mulala ebibula obulema bwosi bwosi.

¹⁸Khandi muhaane omusango kweimele nende omusango kweidivai halala nende tsihunwa, amamiiku nende ebimeme, okhulondana nobunji bwabio shinga olwa buli nimulondanga lilako.

¹⁹Khandi muhaane imbusi ikhole khulwa omusango kwobwonooni, okhumeeta khumusango omusambe okwa buli lwosi halala nomusango kwakwo kweimele nende omusango kwakwo kweidivai.

²⁰“Khunyanga yakhataru muhane tsihunwa ekhumi nandala, amamiiku kabili, ebimeme biamakondi ekhumi nabine biomuyika mulala ebibulakhwo obulema bwosi bwosi.

²¹Muhaane omusango kweimele nende emisango chiakwo echieidivai shinga olwa chili okhulondana nobunji bwemiruko echio.

²²Khandi muhaane imbusi ikhole ndala khulwa omusango kwobwonooni okhumeeta khumusango omusambe kwa buli lwosi nende omusango kwakwo kweimele nende kweidivai.

²³“Khunyanga yakhane muhaane tsihunwa ekhumi, amamiiku kabili, ebimeme biamamiiku ekhumi nabine biomuyika mulala ebibulakhwo obulema bwosi.

²⁴Muhaane khandi omusango kweimele nende emisango chiabio echia idivai echia tsihunwa, echiamamiiku nende echiebimeme ebio shinga lwobunji bwabio buli okhulondana nelilako.

²⁵Khandi muhaane imbusi ikhole ndala khulwa omusango kwobwonooni okhumeeta khumusango omusambe okwa buli lwosi nende omusango kwakwo kweimele nende okwa idivai.

²⁶“Khunyanga yakharano muhane tsihunwa shienda, amamiiku kabili, nende ebimeme biamamiiku ekhumi nabine ebiomuyika mulala ebibulakhwo obulema bwosi.

²⁷Muhaane omusango kweimele nende emisango chiabio echia idivai; echietsihunwa, echiamamiiku nende chiebimeme ebio shinga lwobunji bwabio buli, ne nimulonda akamwalachilisibwa.

²⁸Khandi muhaane imbusi ikhole ndala khulwa omusango kwobwonooni okhumeeta khumusango omusambe okwa buli lwosi nende omusango kwakwo kweimele nende okwa idivai.

²⁹“Khunyanga yakhasasaba mulahaana tsihunwa munane, amamiiku kabili, ebimeme biamamiiku ekhumi nabine biomuyika mulala ebibulakhwo obulema bwosi.

³⁰Khandi muhaane omusango kweimele nende emisango chiabio echia idivai, echietsihunwa, echiamamiiku, echiebimeme ebio, shinga lwobunji bwabio buli, ne nimulonda akamwalachilisibwa.

³¹Khandi muhaane imbusi ikhole ndala khulwa omusango kwobwonooni okhumeeta khumusango omusambe okwa buli lwosi nende omusango kwakwo kweimele nende okwa idivai.

³²“Khunyanga yamusafu mulahaana tsihunwa musafu, amamiiku kabili, ebimeme biamamiiku ekhumi nabine biomuyika mulala ebibulakhwo obulema bwosi.

³³Muhaane khandi omusango kweimele nende emisango chiabio chiokhutsushila; chietsihunwa, chiamamiiku, chiebimeme ebio shinga lwobunji bwabio buli, ne nimulonda akamwalachnilisibwa,

³⁴Khandi muhane imbusi ikhole ndala khulwa omusango kwobwonooni okhumeeta khumusango omusambe okwa buli lwosi nende omusango kweimele nende kweidivai.

³⁵“Khunyanga yamunane mube nomukhung'ano omutakatifu, shimulakholakhwo omulimo kwosi kwosi ta,

³⁶habula muhaane omusango omusambe, okusambilwe khumulilo okwa isakakha yokhunjamisia isie OMWAMI Nyasaye nikwo; ihunwa ndala, limiiku elala, ebimeme biamakondi amamiiku musafu biomuyika mulala, ebibulakhwo obulema bwosi bwosi.

³⁷Muhaane khandi omusango kweimele nende omusango kweidivai kwetsihunwa, amamiiku nende ebimeme, shinga lwobunji bwabio buli nimulonda akamwalachilisibwa.

³⁸Khandi muhaane imbusi ikhole ndala khulwa omusango kwobwonooni; okhumeeta khumusango omusambe kwa buli lwosi nende omusango kwakwo kweimele nende kweidivai.

³⁹“Muhaanilenje isie OMWAMI Nyasaye ebihaanwa bino biosi khundukho tsiamasabo kenywe, okhumeeta khumisango chienywe echia idivai nende chiokhuchama. Mubihaane khulwa emisango chienywe emisambe, echieimele nende khulwa emisango chienywe chieidivai nende chiokhureera omulembe.”

⁴⁰Mana Musa naboolela abandu ba Isiraeli amakhuwa koosi aka OMWAMI Nyasaye yali namulachilisiye okhubaboolela.