Read wanga OBUBALI 3 Bible Online

OBUBALI 3 - wanga bible

OBUBALI 3

¹Bano nibo abolwibulo lwa Haroni nende Musa khubise ebia OMWAMI Nyasaye yaboola nende Musa khushikulu shia Sinai.

²Kano niko ameera kabasiani ba Haroni; owambeli ni Nadabu, Abihu, Eliazari, nende Itsamari.

³Bano nibo ababakhwa amafura mana nibaahulwa okhuba abesaaliisi.

⁴Nebutswa Nadabu nende Abihu bafwa olwa bahaana obubane obulaali obutakatifu ta khu OMWAMI Nyasaye mushitsiimi shia Sinai. Shibalikhwo nabaana tawe. Kho Eliazari nende Itsamari nibo abakhalabana shinga abesaaliisi mutsinyanga tsiobulamu bwa Haroni samwana.

⁵Mana OMWAMI Nyasaye naboolela Musa ari,

⁶“Reera aboluyia lwa Lawi ahambi, mana obaahule bakhonyelele omwisaaliisi Haroni.

⁷Balamukholelanga ye nende abomukanda kwosi emilimo chienywe mwiheema litakatifu.

⁸Khandi balalindanga ebimanulwa biosi ebia liheema litakatifu, nende okhukholela Abaisiraeli emilimo chienyekha.

⁹Ne Omulimo okwa Abalawi bali ninakwo kwonyene, nokhukhalabanila Haroni nende abasianibe.

¹⁰Mana waahule Haroni nende abasianibe khulwa okhukhalabana emilimo chiobwisaaliisi. Ne omundu undi yesi nateemakhwo okhuchikhola alafwa.”

¹¹Mana OMWAMI Nyasaye naboolela Musa ari,

¹²“Lola, emalile okhubukula Abalawi okhurula mubaisiraeli mushilenje shia buli omusiani omwikulanda womubakhasi ba Isiraeli. Kho Abalawi balaba abanje,

¹³shichila abekulanda boosi nabanje; khunyanga eyo eya ndererakhwo abekulanda mushialo shia Misiri, ndeyahulila omwene abekulanda babaisiraeli boosi, babe ababandu, noho betsisolo, balabetsanga abanje; Nisie OMWAMI Nyasaye.”

¹⁴Mana OMWAMI Nyasaye naboolela Musa mushitsiimi shia Sinai ari,

¹⁵“Obale Abalawi, mutsinzu tsiabwe, mubilibwa biabwe, obale abasaatsa boosi abali nomwesi mulala nende okhubisiaho.”

¹⁶Kho Musa nababala shinga olwa OMWAMI Nyasaye yali namulachilisiye.

¹⁷Ne kano niko ameera kabasiani ba Lawi; Gerishoni, Kohatsi nende Merari.

¹⁸Nako ameera kabasiani ba Gerishoni mubilibwa biabwe bali; Libini nende Shimeyi.

¹⁹Nabo abasiani ba Kohatsi mubilibwa biabwe bali, Amuramu, Izihari, Heburoni nende Uzieli.

²⁰Nabo abasiani ba Merari mubilibwa biabwe bali; Mahali nende Mushi. Bano nibo abakuuka ba Abalawi mubilibwa biabwe.

²¹Mubeshilibwa shia Gerishoni balimwo abomunzu ya Libuni nende eya Shimeyi; etsio nitsio tsinzu tsia aba Gerishoni.

²²Boosi shinga olwa babalwa, abeshisaatsa abali nomwesi mulala nende okhubisiaho bali ebikhumila musafu nende ebikhumi birano (7,500).

²³Abeshilibwa shia Gerishoni bano balachilisibwa okhukhoma ikambi yabwe elubeka lwomumbo weliheema litakatifu.

²⁴Elisafu omusiani wa Laeli niye owali omwimilisi wabwe.

²⁵Ne emilimo echia aba Gerishoni balakwa okhukhola mwiheema litakatifu chiali okhulinda lisanduku liamalako, nende ebifuunikho bialio nende tsingubo tsishinganga habwinjililo bweliheema elo,

²⁶nende tsingubo etsielelanga mulwanyi, nende ingubo eyishinganga habwinjililo bwomulwanyi olwabotokhana lisanduku liamalako nende eshimalilo shiemisango, nende emikoye chiashio. Emilimo chiabwe chiali echilondana nebindu ebio.

²⁷Abeshilibwa shia Kohatsi balimwo abomunzu ya Amaramu, Tsihari, Heburoni, nende Uzieli;

²⁸Abaana abasiani boosi abali nibebulwe nibamalile omwesi mulala nende okhubisiaho bali ebikhumila munane ne bikhumi bisasaba (8,600). Abeshilibwa shia Kohatsi nibo abakholwa okhukhalabana emilimo chia habundu hatakatifu.

²⁹Abetsinzu tsia aboluyia lwa Kohatsi balakwa okhukhoma ikambi yabwe elubeka lwomumbo weliheema elo.

³⁰Omwimilisi owabetsinzu tsioluyia lwa Kohatsi yali Elizafani omusiani wa Uzieli.

³¹Ne emilimo chiabwe chiali okhulinda Lisanduku lieindakano, imeesa, neshichibi shietsitaha, neshimalilo shiemisango, ebimanulwa bia habundu hatakatifu ebia abesaaliisi bekhoonyelanga, ingubo ishinga nende buli shindu shiosi eshia banyala okhwikhoonyela.

³²Omwimilisi omukhongo wa Abalawi yali Eliazari omusiani womwisaaliisi Haroni. Niye owali omukhongo owa abakhalabananga habundu hatakatifu.

³³Abeshilibwa shia Merari balimwo abomunzu ya Mahali nende Mushi, etsio nitsio tsinzu tsia Merari.

³⁴Boosi shinga olwa babalwa, abeshisaatsa abali abomwesi mulala nende okhubisiaho bali ebikhumila bisasaba ne bikhumi bibili (6,200).

³⁵Omwimilisi wabeshilibwa shia Merari yali Zurieli omusiani wa Abihaili. Nabo balakwa okhukhoma ikambi yabwe elubeka lwemasaba weliheema.

³⁶Ne emilimo chiabwe chiali okhulinda ebitiisi bielisanduku, tsisheti tsialio, netsisiilo, nebichibi bialio, halala nebimanulwa bialio biosi, nende biosi ebikhonyelungwa halala ninabio.

³⁷Khandi balachilisibwa okhulinda ebitiisi ebiomulwanyi lwabotokhana liheema elo, nende tsisiilo tsiabio, nebibambo biabio nende emikoye chiabio.

³⁸Ne Musa nende Haroni nabasianibe balakwa okhukhoma ikambi yabwe elubeka lwebukwe welisanduku elo, elubeka eweliuba lirulilanga imbeli weliheema. Emilimo chiabwe chiali okhulinda habundu hatakatifu mushilenje shia Abaisiraeli. Ne omundu undi yesi nateema okhusitaho alafwa.

³⁹Boosi aba Musa nende Haroni babala mu Abalawi shinga olwa OMWAMI Nyasaye yabalachilisia mubilibwa biabwe, abeshisaatsa boosi abali abomwesi mulala nende okhubisiaho bali ebikhumila amakhumi kabili na babili (22,000).

⁴⁰Mana OMWAMI Nyasaye naboolela Musa ari, “Bala abekulanda beshisaatsa aba Abaisiraeli, abomwesi mulala nende okhubisiaho, ohandiche ameera kabwe.

⁴¹Ne olabukula Abalawi okhuba abanje mushilenje shia abekulanda mubaisiraeli. Khandi tsing'ombe tsia Abalawi mushilenje shiebikulanda bietsing'ombe tsia Abaisiraeli, nisie OMWAMI Nyasaye.”

⁴²Kho Musa nabala abekulanda bomuluyia lwa Abaisiraeli shinga olwa OMWAMI Nyasaye yali namulachilisiye.

⁴³Ne abekulanda abeshisaatsa boosi abali abomwesi mulala nende okhubisiaho, bali ebikhumila amakhumi kabili nabibili nende ebikhumi bibili namakhumi musafu nabataru (22,273).

⁴⁴Mana OMWAMI Nyasaye naboolela Musa ari,

⁴⁵“Obukule Abalawi mushilenje shia abekulanda mubaisiraeli nende tsing'ombe tsia Abalawi mushilenje shietsing'ombe tsia Abaisiraeli; Abalawi nabanje. Nisie OMWAMI Nyasaye.

⁴⁶Ne shichila abekulanda ba Abaisiraeli bashila Abalawi nabandu ebikhumi bibili namakhumi musafu nabataru (273), okhuula okule khandi abaana ba Abaisiraeli abalikhwo ikulu abo,

⁴⁷buli mulala orunje ebitonye birano bieifetsa, okhuloondana nende eshichelo shiarebwaho,

⁴⁸mana amapesa ako kahelesibwe Haroni nabasianibe.”

⁴⁹Musa nakhola shinga OMWANI Nyasaye yamuboolela, kho nabukula,

⁵⁰ebitonye eshikhumila nebikhumi bitaru nende amakhumi kasasaba nabirano bieifetsa (1,365).

⁵¹Mana nahelesia Haroni nabasianibe.