Read wanga OBUBALI 30 Bible Online

OBUBALI 30 - wanga bible

OBUBALI 30

¹Musa naboolela abemilisi betsimbia tsia Abaisiraeli ari, “Kano niko aka OMWAMI Nyasaye alachilisiye mbu,

²lwomundu yesi akhola eshitsubo okhuhelesia OMWAMI Nyasaye eshindu shiosi shiosi, noho niyetsuba okhwiyima eshindu shiosi shiosi, shialafunakakhwo eshitsubo eshio ta, habula okhuula akhole eshindu shiosi eshia aba niyetsubile okhukhola.

³“Omukhaana oushili okhutekha nakhola eshitsubo okhuhelesia OMWAMI Nyasaye eshindu shiosi shiosi, noho niyetsuba okhwiyima eshindu shiosi shiosi,

⁴okhuula akhole eshindu eshia aba niyetsubile okhukhola, okhurusiakhwo samwana nahulila mana amukaye okhukhola eshindu eshio.

⁵Nebutswa samwana naba nahulila mana amukaye okhukhola eshia aba niyetsubile okhukhola eshio, kho omukhaana oyo aloosia eshitsubo eshio tawe. Ne OMWAMI Nyasaye alamuleshela, shichila samwana amukayile okhukhola eshitsubo eshio.

⁶“Ne omukhaana ushili okhutekha oyo nakhola eshitsubo matetekhana noho khulwa okhuboolakhwo butswa, noho nakhola eshitsubo shiokhwiyima eshindu omwene olwa ateekha khumusaatsa,

⁷okhuula akhole koosi aka yetsuba, okhurusiakhwo omusaatsawe nahulilakhwo mana namukaya.

⁸Nebutswa omusaatsawe nahulilakhwo mana namukaya okhukhola eshiaba niyetsubile okhukhola, kho omukhasi oyo shialoosia eshitsubo eshio tawe, ne OMWAMI Nyasaye alamuleshela.

⁹“Ne omukhasi omulekhwa noho owalekhana nomusaatsawe okhuula alinde akayetsuba koosi noho eshiayetsuba okhwiyima.

¹⁰“Omukhasi wateshibwa naba nakhola eshitsubo shiokhukhola eshindu shiosi shiosi noho okhwiyima eshindu shiosi shiosi,

¹¹okhuula akhole koosi akaba niyetsubile okhukhola noho okhwiyima, okhurusiakhwo omusaatsawe nahulilakhwo mana namukaya okhukhola eshindu tsana eshio.

¹²Nebutswa omusaatsawe nahulilakhwo mana namukaya okhukhola eshiaba niyetsubile okhukhola, kho omukhasi oyo shialetsuba ta, ne OMWAMI Nyasaye alamuleshela shichila omusaatsawe yamukaya okhuusia eshitsubo eshio.

¹³Omusaatsa omwene omukhasi anyala okhufuchilila noho okhukaya eshitsubo shiosi shiosi shiomukhasiwe aba niyetsuba okhukhola.

¹⁴Nebutswa omusaatsa oyo naba nahulila khukeshitsubo eshio, ne okhurula khunyanga yahulilakhwo nalamukaya ta, omukhasi oyo okhuula akhole koosi akaba niyetsuba okhukhola okhubela olwa ahulilekhwo, shiamukayile ta, kho aba nafuchilile eshitsubo eshio.

¹⁵Nebutswa omusaatsa oyo naba nafukula nende okhukaya eshitsubo eshio olunyuma, kho omusaatsa oyo okhuula ye omwene yetushe obwonoono bwomukhasi oyo.”

¹⁶Kano niko amalachilisio aka OMWAMI Nyasaye yalaka Musa okhulondana nebitsubo hakari homusaatsa nomukhasiwe, khandi omukhaana oushili okhutekha nende samwana.