Read wanga OBUBALI 31 Bible Online

OBUBALI 31 - wanga bible

OBUBALI 31

¹Mana OMWAMI Nyasaye naboolela Musa ari,

²“Ohelesie Abamidiani eshinyasio khukabakholela Abaisiraeli, ne olunyuma lwokhukhola orio olafwa.”

³Mana Musa naboolela abandu ba Isiraeli ari, “Mwirecheshe okhulwana, mutsie museere Abamidiani mbu mubahelesie eshinyasio khukabakholela OMWAMI Nyasaye.

⁴Murume abandu eshikhumila (1,000) okhurula mubuli oluyia lwenywe okhutsia mwihe.”

⁵Kho nibaahula abandu eshikhumila (1,000) okhurula mubuli oluyia lwa Abaisiraeli, boosi nibaba abandu ebikhumila ekhumi nabibili (12,000) niberechekha okhutsie mwihe.

⁶Mana Musa naruma mwihe abandu eshikhumila (1,000) okhurula buli oluyia lwa Abaisiraeli nibemililwe nende Finehasi omusiani wa Eliazari omwisaaliisi, nibali nende ebimanulwa bia habundu hatakatifu, ne nibatilile mumakhono kabwe tsitarumbeta tsiokhupa oluhungu.

⁷Nibaseera Abamidiani shinga olwa OMWAMI Nyasaye yali nalachile Musa, ne nibeera abasaatsa boosi.

⁸Nibeera abaruchi barano ba Abamidiani abali; Ewi, Rekemu, Zuri, Huri nende Reba, khandi nibeera Balaamu omusiani wa Beori.

⁹Mana abandu ba Isiraeli nibahamba abakhasi ba Abamidiani nabaana babwe, nibayaaya tsing'ombe tsiabwe, emiruko chiabwe nende emiandu chiabwe chiosi.

¹⁰Nibasamba amatookho ka Abamidiani bamenyangamwo nende tsikambi tsiabwe tsiosi.

¹¹Khandi nibabukula ebindu bia bali nibayaayile biosi halala nende abahambe nende emiruko,

¹²ne nibabireera khu Musa nende Eliazari nende abomukanda kwa Isiraeli abali nibali mukambi, bali nibali mumuhololokhwe kwa Moabu okuli ahambi nende omwalo kwa Yorodani injelekha wa Yeriko.

¹³Mana Musa nende Eliazari omwisaaliisi nende abemilisi boosi bomukanda kwabandu ba Isiraeli nibarula mukambi nibatsia okhwakanila abelihe abali nibachelelanga.

¹⁴Ne Musa natiilwa noburuma khubakhongo belihe nende abasinjililanga emikanda chieshikhumila nende emikanda chielikhumi abali nibachelelanga okhurula mwihe.

¹⁵Musa nabareeba ari, “Mbushiina nimulekha abakhasi boosi okhuba mwoyo?

¹⁶Mwitsulile mbu abakhasi bano nibo abaloonda amechesio ka Balaamu ne nibali Peori bachila abandu nibalekha OMWAMI Nyasaye nibenamila omunyasaye Baali. Niko akachila OMWAMI Nyasaye nahelesia abandube eshinyasio shiokhufwa.

¹⁷Khulweshio mwire abaana abasiani boosi nende abakhasi boosi abamala okhukonakhwo nabasaatsa.

¹⁸Halali mwibishiile abeene abakhaana abashili abashisila.

¹⁹Ne abo boosi aberakhwo abandu nende boosi abatilakhwo khumulambo okhuula bamenye elwanyi wekambi khulwa tsinyanga musafu. Ne khunyanga yakhataru nende eyamusafu okhuula mwisiiye abeene nende abakhasi bamwahamba boosi.

²⁰Okhuula musiiye khandi tsingubo tsienywe tsiosi, etsieliseelo, nende etsiobwoya bwetsimbusi, nende shiosi eshiabatswa khumusaala.”

²¹Mana Eliazari omwisaaliisi naboolela abelihe abali nibarulile mubulwani ari: “Kano niko aka OMWAMI Nyasaye yalachilisia Musa mbu:

²²Ebindu shinga itsahabu, ifetsa, omukasa, eshibia, libaati nende lisasi

²³nende eshindu shindi shiosi eshilanyala okhuyia mumulilo ta, okhuula shisiiywe khulwa okhusambwa nomulilo, mana khandi shisiiywe namanyasi. Ne eshindu shiosi eshinyala okhuyia mumulilo mushisiiye namanyasi ako.

²⁴Khunyanga yamusafu okhuula mufuye tsingubo tsienywe, ne mulaba abasiiye, mana mwinjile mukambi.”

²⁵Mana OMWAMI Nyasaye naboolela Musa ari,

²⁶“Iwe nende Eliazari halala nende abemilisi bomukanda okhuula mubale ebindu biosi ebiyaayilwe, abahambe halala nemiruko chiosi.

²⁷Mukabule ebiyaayo ebio hakari, eshitonye shilala shibe eshiabelihe abatsia okhulwana, nashio eshindi eshiabomukanda.

²⁸Ne okhurula khushitonye eshiabelihe, obukule omuhambe mulala okhurula mubuli abahambe ebikhumi birano (500) okhuba omurungo khwisie OMWAMI Nyasaye khandi okhole orio khutsing'ombe, tsisishili, amakondi nende tsimbusi.

²⁹Obihaane khu Eliazari omwisaaliisi okhuba eshihaanwa eshiahule khwisie OMWAMI Nyasaye.

³⁰Ne okhurula mumukabo kwa bandu aba Isiraeli olabukula shilala khu makhumi karano khu bandu khutsing'ombe, khutsisishili, ende khubiayo nende khumiruko mana muhelesie Abalawi abaleshelwa okhulinda liheema lianje.”

³¹Mana Musa nende omwisaaliisi Eliazari nibakhola shinga olwa OMWAMI Nyasaye yali yali nalachilisiye Musa okhukhola.

³²Ne ebia abelihe bayaaya mbiebino; Amakondi ebikhumila ebikhumi bisasaba namakhumi musafu na birano (675,000).

³³Tsing'ombe ebikhumila amakhumi musafu na bibili (72,000).

³⁴Tsisishili ebikhumila amakhumi kasasaba na shilala (61,000).

³⁵Nende abakhaana abashisila ebikhumila amakhumi kataru na bibili (32,000).

³⁶Ne omukabo kwabandu batsia mwihe kwali amakondi ebikhumila ebikhumi bitaru na musafu nende ebikhumi birano (337,500)

³⁷nakwo omurungo okwa OMWAMI Nyasaye okhurula khumakondi ako kwali amakondi ebikhumi bisasaba na amakhumi musafu nakarano (675).

³⁸Tsing'ombe tsiali ebikhumila amakhumi kataru na bisasaba (36,000), nakwo omurungo okwa OMWAMI Nyasaye okhurula khutsing'ombe etsio kwali tsing'ombe amakhumi musafu natsibili (72).

³⁹Tsisishili tsiali ebikhumila amakhumi kataru nebikhumi birano (30,500), nakwo omurungo okwa OMWAMI Nyasaye okhurula khutsisishili etsio kwali tsisishili amakhumi kasasaba nandala (61).

⁴⁰Abakhasi abashisila bali ebikhumila likhumi na basasaba (16,000) nakwo omurungo okwa OMWAMI Nyasaye okhurula khubo kwali abakhasi amakhumi kataru nababili (32)

⁴¹Kho Musa nahelesia Eliazari omwisaaliisi omurungo okwo, okwali eshihaanwa khu OMWAMI shinga olwa OMWAMI Nyasaye yali nalachile.

⁴²Omukabo kwabandu aba Isiraeli okwa Musa yarusia khumukabo kwabelihe kwali,

⁴³amakondi ebikhumila ebikhumi bitaru namusafu nende ebikhumi birano (537,500).

⁴⁴Tsing'ombe tsiali ebikhumila amakhumi kataru nebikhumi bisasaba (36,000)

⁴⁵Tsisishili tsiali ebikhumila amakhumi kataru nebikhumi birano (30,500).

⁴⁶Nende abakhaana abashisila ebikhumila ekhumi nabisasaba (16,000).

⁴⁷Okhurula mumukabo kwa bandu ba Isiraeli Musa yabukula shilala khubuli amakhumi karano kabandu nende akemiruko nahelesia Abalawi abaleshelwa okhulinda liheema litakatifu shinga olwa OMWAMI Nyasaye yali nalachile.

⁴⁸Mana abakhongo belihe abasinjililanga emikanda chieshikhumila nende emikanda chielikhumi nibatsia khu Musa,

⁴⁹ne nibamuboolela bari, “ifwe abakhalabanibo babalile abasaatsa belihe abali hasi wamalako kefwe, ne shialiho kata mulala oubulaho khwifwe tawe.

⁵⁰Kho khureerile eshihaanwa eshia OMWAMI Nyasaye, khubindu bia buli mundu anyoolile khubietsahabu, emikotse, emikasa ne tsingaka tsieshibalikho, netsingaka tsiomubirwi, nende ebiuma mbu khubiitisile khulwa obulamu bwefwe imbeli ewa OMWAMI Nyasaye.”

⁵¹Mana Musa nende omwisaaliisi Eliazari nibabukula itsahabu nende ebindu bia abasaatsa abo bareera biosi.

⁵²Ne itsahabu yoosi eyeshihanwa yabasaatsa abo bahanila OMWAMI Nyasaye yali eyihela tsikilo ebikhumi bibili (200).

⁵³Abasaatsa belihe abalali abasinjilili ta, bebishila ebia bali nibayaayile.

⁵⁴Mana Musa nende omwisaaliisi Eliazari nibabukula itsahabu eyo okhurula khubasinjilili belihe abo, ne nibachira mwiheema litakatifu, kho mbu OMWAMI Nyasaye alinde abandu ba Isiraeli.