Read wanga OBUBALI 32 Bible Online

OBUBALI 32 - wanga bible

OBUBALI 32

¹Aboluyia lwa Rubeni nende olwa Gadi bali namatuuli amanji ketsing'ombe. Ne olwa balola eshialo shia Yazeri nende eshialo shia Giliadi, nishili nolwayilo olulayi,

²batsia khu Musa nende omwisaaliisi Eliazari nende abemilisi ba Abaisiraeli nibababoolela bari,

³“Amatookho kabandu ba Atarotsi, Diboni Yazeri, Nimura, Heshiboni, Eliale Sebamu, Nebo, nende ba Beoni,

⁴aba OMWAMI Nyasaye yara mumakhono ka Abaisiraeli, bali nolwayilo olulayi lwetsing'ombe.”

⁵Mana khandi nibamuboolela bari, “Kho nimuchama mukhukabile eshialo eshio, kho khuleshe okhwambukha injelekha womwalo kwa Yorodani.”

⁶Nebutswa Musa yabakalusia abetsimbia tsia Rubeni nende Gadi ari, “Abasiani benywe banyala okhutsia mwihe nenywe nimutonyile hano?

⁷Shichila shiina mwire emioyo chiabandu aba Isiraeli okhutsia mushialo eshia OMWAMI Nyasaye yabahelesiye?

⁸Aka niko kabakuuka benywe bakhola, olwa ndabaruma okhurula Kadeshi-barinea okhulambula eshialo eshio.

⁹Ne olwa batsia okhuula mwibanda lia Eshikoli nibaloola eshialo, beera emioyo echia Abaisiraeli okhwinjila mushialo eshia OMWAMI Nyasaye yabahelesia.

¹⁰Ne OMWAMI Nyasaye natiilwa noburuma khunyanga eyo ne niyetsuba naboola ari,

¹¹‘Toto mwene khu abandu bano abatikulukha okhuruula Misiri, okhurula khubemiyika amakhumi kabili nende okhushilaho, abulaho oulalola eshialo eshia ndetsuba okhuhelesia Aburahamu, Isaka nende Yakobo shichila shibayambulila nomwoyo kwosi tawe.’

¹²Habulakhwo kata mulala, habula Kalebu omusiani wa Yefune Omukanizi nende Yoshwa omusiani wa Nuni shichila bano bahulila OMWAMI Nyasaye nomwoyo kwosi.

¹³Ne OMWAMI Nyasaye yatilwa noburuma khulwa abandu nabakhola okhutimatima mushitsiimi khulwe miyika amakhumi kane, okhuula lwoluyia lwa bandu bali nibakhola obwonooni imbeliwe boosi bali nibafwile.

¹⁴Nenyu bulano mukalushe mubilenje biabakuuka benywe, oluyia lundi olwa abandu abonooni abenyanga okhureera liruma lilulu elia OMWAMI Nyasaye khu Abaisiraeli khandi!

¹⁵Inywe aboluyia lwa Rubeni nende olwa Gadi nimuba nimuloba okhumuhulila bulano yetsa okhulekha abandu bano boosi mushitsiimi, nenywe muletukha obwonooni obwo bwosi.”

¹⁶Mana nibatsia khu Musa nibaboola bari, “Khulombokha hano tsikhonje khulwa emiruko chiefwe nende amatookho khulwa abakhasi befwe nende abaana befwe.

¹⁷Nebutswa khulabala ebimanulwa bielihe nikhuranjilila okhutsia imbeli wabandu ba Isiraeli; okhuula olwa khuba nikhuboosiye mumikunda chiabwe. Nabo abaana befwe abatutu nende abakhasi befwe balamenya mumatookho ketsingoba aha balanyala okhuseerwa nabamenyani beshialo shino ta.

¹⁸Shikhulakalukhakhwo mumatala kefwe, omundu yesi yesi khubandu aba Isiraeli nashili okhunyoola omukabokwe kwomumukunda tawe.

¹⁹Ifwe shikhulakabanakhwo ninabo omukabo injelekha womwalo kwa Yorodani eyo tawe. Shichila omukabo kwefwe kuli elubeka lwebukwe womwalo kwa Yorodani.”

²⁰Kho Musa nababoolela ari, “Nikali mulakhola murio, kho hano imbeli ewa OMWAMI Nyasaye mwimanule khulwa okhutsia mwihe.

²¹Abelihe benywe boosi balambukha omwalo kwa Yorodani ne nibemililwe nende OMWAMI Nyasaye balaseera abasuku befwe okhuula olwa OMWAMI Nyasaye alaba nabahulile,

²²khandi nabukule eshialo eshio. Olunyuma lwako munyala okhukalukha, shichila mulaba nimumalile okhusia aka mwasuubisia OMWAMI Nyasaye, nende Abaisiraeli bashienywe. Mana OMWAMI Nyasaye alamuhelesia omukunda kuli elubeka lwebukwe lwomwalo kwa Yorodani kuno.

²³Nebutswa nimulakhola murio ta, emuchetsiyia mbu mulaba nimwonoonile OMWAMI Nyasaye, kho mumanye mbu mulanyoola eshinyasio khulwa obwonooni bwenywe.

²⁴Kho mumbashe amatookho akabakhasi benywe nabaana benywe nende tsikhonje khulwa amakondi kenywe, nebutswa mukhole akamusuubisiye.”

²⁵Mana aboluyia lwa Gadi nende olwa Rubeni nibaboolela Musa bari, “Ifwe abakhalabanibo khulakhola shinga olwa iwe omwami wefwe okhulachile.

²⁶Abakhasi befwe, nabaana befwe abatutu, nemiruko chiefwe, netsing'ombe tsiefwe tsiosi bilatong'a mumatookho ka Giliadi.

²⁷Nebutswa ifwe fwesi khwirecheshe okhutsia mwihe nikhwimililwe nende OMWAMI Nyasaye. Khulambukha omwalo kwa Yorodani nende okhulwana shinga lwoboolile.”

²⁸Kho Musa nalachilisia omwisaaliisi Eliazari, nende Yoshwa nende abakhulundu ba Abaisiraeli ari,

²⁹“Nikaba mbu aboluyia lwa Gadi nende olwa Rubeni balambukha omwalo kwa Yorodani niberecheshe okhulwana olwa OMWAMI Nyasaye alaka, mana bamukhonye muhule abeshialo eshio, kho mulabakabila eshialo shia Giliadi okhuba omukabo kwabwe.

³⁰Nebutswa nibaba nibalambukha omwalo kwa Yorodani okhumukhonya okhulwana ta, kho balanyoola omukabo kwabwe mushialo shia Kanani halala ninenywe.”

³¹Mana aboluyia lwa Gadi nende olwa Rubeni nibakalusia bari, “Ifwe abakhalabanibo khulakhola shinga olwa OMWAMI Nyasaye akhulachile.

³²Olwa OMWAMI Nyasaye akhulaka khulambukha omwalo kwa Yorodani nikhulwana kho mbu khunyoole omukabo kwefwe injelekha womwalo kwa Yorodani.”

³³Mana Musa nahelesia aboluyia lwa Gadi, nende olwa Rubeni nende inusu yoluyia lwa Manase omusiani wa Yosefu eshialo shia Sihoni omuruchi wa Abamori, nende eshialo shia Ogu omuruchi wa Ababashani, halala namatookho kashio koosi nobwayilo bwashio bwosi.

³⁴Mana aboluyia lwa Gadi nibombakha obuyiakha khandi amatookho ka Diboni, Atarotsi, nende Aroeri,

³⁵Atirotsishofani, Yazeri, Yogubeha,

³⁶Betsinimura nende Betsi-harani, nikaba amatookho ketsingoba nende tsikhonje khulwa emiruko.

³⁷Nabo aboluyia lwa Rubeni nibombakha Heshiboni, Eliale, Kiriatsimu,

³⁸Nebo nende Baalimeoni (eliira lialio liakalukhasibwa) nende Sibuma. Mana nibakulikha amatookho kabombakha ameera kabwe.

³⁹Nabo aboluyia lwa Machiri omusiani wa Manase nibasera nokhubukula eshialo shia Giliadi, nibalonda Abamori abali nibamenyamwo.

⁴⁰Mana Musa nahelesia oluyia lwa Machiri omusiani owa Manase eshialo shie Giliadi, nabo nibamenyamwo.

⁴¹Naye Yairi owoluyia lwa Manase natsia naseera nende okhubukula amatala kandi nakakulikha mbu “Hawotsi Yairi.” [6]

⁴²Naye Noba naseera litookho lia Kenatsi nalibukula namataala kalio ne nalikulikha mbu Noba eliira lie omwene.