Read wanga OBUBALI 34 Bible Online

OBUBALI 34 - wanga bible

OBUBALI 34

¹OMWAMI Nyasaye naboolela Musa

²okhulachilisia abandu ba Isiraeli amakhuwa kano ari: “Olwa mwinjila mushialo shia Kanani eshiemuhelesiye, tsinzakho etsiomukunda kwenywe tsilaba tsirinanwa:

³Elubeka lwenywe lwebukwe, lwakho lwemulambo lulachachila khushitsiimi shia Zini eshili khulwakho lwa Edomu.

⁴Lulakotoshela elubeka lwemulambo okhuula khunjila ya Akarabimu okhuula Zini, nilutsiililila okhuula Kadeshibarinea. Mana lulatsiililila okhuula Hazari-adari, nilutsia Azimoni.

⁵Olwakho olwo lulashiama okhurula Azimoni nilutsia khulwakho lwa Misiri okhuula khunyanza ya Mediterenia.

⁶“Olwakho elubeka lwomumbo, lulaba Inyanza ya Mediterenia.

⁷“Olwakho lwenywe lwemasaba lulalondoola shilunji okhurula khunyanza ya Mediterenia okhuula khushikulu shia Hori;

⁸Okhurula khushikulu eshio okhutsia okhuula mushilibwa shia Hamatsi. Lulatsiililila okhuula Zedadi;

⁹nende Ziforoni niluhwela Hazari Enani.

¹⁰“Olwakho lwebukwe lulalondola shilunji okhurula Haza Enani okhuula Shefamu;

¹¹Lulakotokha okhurula Shefamu nilutsia emulambo okhuula Ribula khulubeka lwebukwe lwa Ainu; nende khubikulu ebili ebukwe khundulo weinyanza ya Galilaya.

¹²Lukholomoshe elubeka lwemulambo khumwalo kwa Yorodani okhuula khunyanza Yomunyu. “Tsino nitsio tsinsakho tsine tsiomukunda kwenywe.”

¹³ Musa naboolela Abaisiraeli ari, “Shino nishio eshialo eshiamulalamilwa; munjila eyokhupa ikha; nishio eshialo eshia OMWAMI Nyasaye yahelesia tsimbia shienda nende isusu.

¹⁴Tsimbia tsiabasiani ba Rubeni nende tsiabasiani ba Gadi halala nende inusu yoluyia lwa Manase lwebukwe tsimalile okhunyoola emikabo chatsio okhulondana netsinzu tsiabwe.

¹⁵Tsimbia tsibili etsio nende inusu yoluyia eyo tsimalile okhunyoola obulame bwabwe injelekha ebukwe womwalo kwa Yorodani eyihengane nende litookho lia Yeriko.”

¹⁶OMWAMI Nyasaye naboolela Musa ari,

¹⁷“Eliazari omwisaaliisi nende Yoshwa omusiani wa Nuni nibo abalakabulila abandu omukunda.

¹⁸Khandi waahule omwimilisi okhurula mubuli oluyia bakhoonye okhukabula omukunda.

¹⁹Kano niko ameera akabasata abo; muluyia lwa Yuda, alaba Kalebu omusiani wa Yefune.

²⁰Oluyia lwa Simeoni abe Shemueli omusiani wa Amihudi.

²¹Owoluyia lwa Benjamini abe Elidadi omusiani wa Kesiloni.

²²Owoluyia lwa ba Dani omwimilisi, abe Buki omusiani wa Yogili.

²³Oluyia lwa Manase omusiani wa Yosefu, abe Hanieli omusiani wa Efodi.

²⁴Ne owoluyia lwabasiani ba Efuraimu abe Kemueli omusiani wa Shifatani.

²⁵Owoluyia lwabasiani ba Zebuluni abe Elizafani omusiani wa Parinakhi.

²⁶Owoluyia lwabasiani ba Isakhari abe Palitieli omusiani wa Azani.

²⁷Ne owoluyia lwabasiani ba Asheri abe Ahihudu omusiani wa Sheloni.

²⁸Ne owoluyia lwabasiani ba Nafutali abe Pedaheli omusiani wa Amihudi.”

²⁹Abo nibo abasaatsa aba OMWAMI Nyasaye yalaka okhukabulila Abaisiraeli omukunda mushialo shia Kanani.