Read wanga OBUBALI 35 Bible Online

OBUBALI 35 - wanga bible

OBUBALI 35

¹OMWAMI Nyasaye yaboolela Musa mumuhololokhwe kwa Moabu injelekha womwalo kwa Yorodani norula Yeriko ari,

²“Laka abandu ba Isiraeli mbu okhuula bakabekho Abalawi amatookho kandi okhumenyamwo nende obwayilo bukabotokhane okhurula mubulaame bwabwe.

³Amatookho ako kabe aka Abalawi mana bamenyemwo. Omukunda okwa obwayilo kulaba khulwa tsing'ombe tsiabwe nende emiruko chiabwe chindi chiosi.

⁴Omukunda okwa obwayilo okwo kube tsimita tsimia tsine nende amakhumi karano tsimbeka tsiosi okhurula khwisisi elia litookho elo;

⁵Kho mbu obwiyango bubemwo mukari obuhela tsimita tsimia shienda khu buli khundulo, nalo litookho nilili hakari wobwayilo obwo.

⁶Okhuula mukabe Abalawi amatookho kasasaba, komundu anyala okhwilushilamwo niyakhetsukhana yeera owashie. Mubameete amatookho kandi amakhumi kane nende kabili,

⁷halala nobwayilo bwako, mana koosi kabe amakhumi kane nende munane.

⁸Obunji bwamatookho aka Abalawi mubuli oluyia bulondane nende obukhongo bwomukunda kwabwo.”

⁹OMWAMI Nyasaye naboolela Musa

¹⁰okhulachilisia Abaisiraeli ari, “Olwa mwambukha omwalo kwa Yorodani nimwinjila mushialo shia Kanani,

¹¹okhuula mwahule amatookho akobwilushilo akomundu yesi anyala okhwilushilamwo niyakhetsukhana yeera owashie.

¹²Mubwenomwo alabamwo, alehonokosia okhurula khubekho bomundu owayerire metsukhana oyo. Omundu yesi owitsukhana niyeera owashie aleerwa nashili okhuyaasibwa habulafu tawe.

¹³Mwahule amatookho kasasaba,

¹⁴kataru kabe ebukwe womwalo kwa Yorodani nako kataru kandi mushialo shia Kanani.

¹⁵Amatookho kasasaba kano kabe akobwilushilo bwabandu aba Isiraeli, nende abarende bamenyanga mubo tsinyanga tsindutu nho inziayo. Omundu yesi niyakhetsukhana yeera owashie, yelushile mwelala muko.

¹⁶“Nebutswa omundu yesi yesi naba niyakhanywekha owashie neshibia, mana nafwa, ounyweshele oyo aba omwiri, naye yesi okhuula yerwe.

¹⁷Ne naba nalasile owashie nelichina mana nafwa, oulasile oyo aba omwiri, ne okhuula yeerwe.

¹⁸Kata omundu yesi niyakhanywekha owashie neshimanulwa shieshisala shili mumukhonokwe, mana nafwa, ounyweshele oyo aba omwiri ne okhuula yesi yeerwe.

¹⁹Omwikho womundu wirirwe oyo owa hambi niye oukhoyele okhumala eshikwoli khumundu wiriire oyo. Omwikho oyo niyetsukhana yanyoola omundu oyo okhuula amwiire.

²⁰“Ne omundu yesi niyakhasila owashie mana namwiira khulwa okhumuluma okhukwa noho okhumulasa neshindu,

²¹noho okhumukhupa nomukhonokwe aba omwiiri, ne okhuula yesi yeerwe. Omwikho owahambi womundu wiirirwe oyo niye oukhoyele okhumwiira okhuula amwiire olwa anyoola omundu oyo.

²²“Nebutswa omundu niyetsukhana niyeera owashie owalasila ta, khulwa okhumuluuma khukwa, noho okhumulasakhwo eshindu,

²³noho omundu nalasa lichina nalalolanga nasalisia owashie wetsukhana oulali omusukuwe tawe;

²⁴nikali kario oluyia lwabandu abo lulayaasia niluterera omwikho womundu ufwile oulenyanga okhumala eshikwoli tawe, nebutswa baterere omundu wiriire oyo.

²⁵Oluyia olwo luhonokosie omundu wirire oyo okhurula mumukhono okwomumali weshikwoli ne okhuula bakalusie omundu oyo mwitookho eliobwilushilo liabele niyelushilamwo. Ne amenyemwo okhuula olwa Omwisaaliisi omukhulundu ouliho ebise ebio afwa.

²⁶Ne ouli neshikha shiokhwira oyo niyakharula mwitookho eliobwilushilo elo liabeele niyelushilemwo,

²⁷naye omwikho womundu owayirire oyo niyakhamunyoola mana yesi namwiira, kho omundu weshikwoli oyo shiaba omwiiri tawe.

²⁸Omundu oweshikha eshiokhwiira okhuula amenye mwitookho liobwilushilo okhuula olwa Omwisaaliisi Omukhulundu ouliho ebise ebio afwa; nebutswa olunyuma lwomwisaaliisi oyo okhufwa omundu oyo anyala okhwinyokha.

²⁹Ne amakhuwa kano kabe amalachilisio khandi amalako khwinywe, mutsimbia tsienywe nende mubimenyo bienywe biosi.

³⁰“Omundu niyakhenjililwa itookho khulwa obwiiri, anyala okhunyoolekha neshikha, ne okhuula yeerwe khulwa obuloli bwabandu babili noho abanji, bulaba bwomundu mulala yenyene tawe.

³¹Omundu omwiri okhuula yeerwe. Alehonokokhakhwo eshinyasio shino khulwa okhurunga amapesa tawe.

³²Omundu yesi niyakhelukha yatsia mwitookho eliobwilushilo, mulamufuchilile okhurunga amapesa mbu kho akalushe ingo olwa Omwisaaliisi Omukhulundu aha nashiliho mwoyo tawe.

³³Nimwakhafuchilila omurungo, muba mwonoonia eshialo eshia mumenyamwo. Obwiiri bwonooninjia eshialo, ne injila yosi ibulaho eyokhukhola eshitiso eshio okhulafia abandu ewa omundu yeerirwe okhuyiniakhwo butswa okhwira omwiiri oyo.

³⁴Mulonoonie eshialo shiamumenyangamwo ta, shichila nisie OMWAMI Nyasaye ne emenyanga mubandu aba Isiraeli.”