Read wanga OBUBALI 36 Bible Online

OBUBALI 36 - wanga bible

OBUBALI 36

¹Abemilisi bebilibwa bietsinzu etsiabaana ba Giliadi, omusiani wa Makhiri omwitsukhulu wa Manase ouli omusiani wa Yosefu batsia imbeli wa Musa nende ewa abemilisi bandi ba Abaisiraeli nibaboola

²bari, “OMWAMI Nyasaye yalachilisia inywe okhukabila abandu ba Isiraeli omukunda khulwa okhupa ikha. Khandi yamulachilisia okhukaba omukunda kwomusiani wefwe Zelofehadi khu abakhaanabe.

³Nebutswa mwitsulile mbu nibakhateshela abasaatsa boluyia lundi, obulame buba bulaba bwoluyia olwo, ne omukabo kwefwe kuba kutitiyia.

⁴Mumuyika okwa obulekhulwi, olwa ebindu biosi ebiali nibiakusibwa bikalusilibwa abali benebio, omukunda okwa abakhaana ba Zelofehadi kulameetwa khukwa aboluyia olwa ababateshia abo inziayo, kho ne shikulaba okwa aboluyia lwefwe tawe.”

⁵Mana Musa nalachilisia abandu ba Isiraeli amalako kano okhurula khu OMWAMI Nyasaye. Naboola ari, “Amakhuwa kaboluyia lwa Manase baboolanga kali habwene,

⁶ne bulano OMWAMI Nyasaye aboolanga mbu abakhaana ba Zelofehadi nabalekhule okhuteshela omusaatsa yesi owa benya nebutswa okhuula abe womuluyia lwabwe.

⁷Obulaame bwa buli omwisiraeli butonyenje khuluyialwe.

⁸Buli omukhasi oukabwa obulaame muluyia lwosi olwa Abaisiraeli, okhuula ateshele omusaatsa owa muluyia olwo. Buli omwisiraeli alanyala okhunyoola obulaame bwabakuukanyene okhubirila munjila eyo;

⁹Mana obulaame obwo shibularula khuluyia lundi okhutsia khulundi tawe.”

¹⁰Abakhana ba Zelofehadi bakhola shinga OMWAMI Nyasaye yalachilisia Musa;

¹¹Shichila Mala, Tiriza, Hogila, Milika nende Nowa bateeshela abasiani bomusiani wabwe samwana.

¹²Bateshela abetsinzu tsioluyia lwa Manase omusiani wa Yosefu, mana obulame bwabakhana abo nibutong'a muboluyia lweinzu ya samwana.

¹³Kano niko amalako nende amalachilisio aka OMWAMI Nyasaye yalaka Abaisiraeli okhubirila mu Musa nibali mumwololokho kwa Moabu ahambi nomwalo kwa Yorodani nibashili okhwambukha okhutsia Yeriko.