Read wanga OBUBALI 4 Bible Online

OBUBALI 4 - wanga bible

OBUBALI 4

¹OMWAMI Nyasaye naboolela Musa nende Haroni ari,

²“Obale abeshilibwa shia Kohatsi muboluyia lwa Abalawi, mutsinzu tsiabwe nende mubilibwa biabwe.

³Obale okhurula khubemiyika amakhumi kataru okhuula khubemiyika amakhumi karano abanyala okhukhalabana mwiheema lianje litakatifu.

⁴Chino nichio emilimo chiaboluyia lwa Kohatsi mwiheema litakatifu elo; okhulinda ebindu ebitakatifu muno.”

⁵Mana OMWAMI Nyasaye nalachilisia Musa ari, “Olwa muba nimuhuyia ikambi, Haroni nabasianibe okhuula benjile mwiheema, mana beeshie hasi ingubo yishinganga lisanduku elo.

⁶Balifuunishe neshifuunikho shieliseelo linyushe, ne baalakhwo ingubo yobukondo bwa buluu yoosi, mana benjisiemwo ebitiisi biokhuchinga lisanduku elo.

⁷“Ne khumeesa eya emikaate emitakatifu, baalekhwo ingubo yobukondo bwa buluu, ne barakhwo tsisahani, ebikaye biobubani, tsibakuli nende tsinyungu tsiomusango kweidivai, nakwo omukaate kwa buli inyanga kubetsenjekhwo.

⁸Mana balalalifwimba liosi pe neingubo inzakhanyu, nende okhufunikha ebindu tsana ebio neliseelo linyushe, mana benjisiemwo eshitalatalilo eshiokhuchinga.

⁹“Khandi balabukula ingubo yobukondo bwa buluu, ne bachifunikha khushichibi shietsitaha, nende tsitaha tsiashio, netsindambi tsiashio, nebichinjilo biamafura biashio biosi ebiikhonyelungwa okhubiikhamwo amafura.

¹⁰Ne balashibohela halala nende ebimanulwa biashio mwiseelo linyushe mana bashire khushitalatalilo eshiokhuchinjilakhwo.

¹¹“Ne khu shimalilo shiemisango shietsahabu balaalakhwo ingubo yobukondo bwa buluu, ne bafunikhakhwo liseelo linyushe elo, mana benjisiemwo tsinyanzo etsiokhuchinga.

¹²Mana balabukula ebimanulwa biosi ebiabakhalabanilanga habundu hatakatifu, babiboyele mungubo eyobukondo bwa buluu eyo, bafunikhakhwo liseelo linyushe, mana babire khushitalatalilo eshiokhuchinga.

¹³Mana balarusia likoshe khushimalilo shiemisango, ne balakhwo ingubo yobukondo bweisambarau;

¹⁴Ne balara khuyo ebimanulwa biashio biosi ebia bekhoonyelanga nibakhalabana hashimalilo shiemisango. Mbiebinjo mbu, tsinyungu, amakhango, emiikho, olweelo nende ebimanulwa bia hashimalilo shiemisango biosi; ne bashifunikha neliseelo linyushe, mana babire khushitalatalilo shiokhuchinga.

¹⁵Ne olwa Haroni nabasianibe balaba nibamalile okhufunikha habundu hatakatifu yaho nende ebimanulwa biaho. Olwa muba nimwenyanga okhuhuyia ikambi, nilwo olwa aboluyia lwa Kohatsi betsa okhuchinga ebindu bino biosi, nebutswa balatilakhwo khubindu ebitakatifu tawe, nibatilakhwo balafwa.” Echio nichio emilimo chiaboluyia olwa Kohatsi buli olwa bahuyia liheema litakatifu.

¹⁶“Naye Eliazari omusiani womwisaaliisi Haroni, alasinjilila amafura ketsitaha, nobubane, nomusango kweimele okwa buli lwosi nende amafura kokhutsushililwa. Khandi alasinjilila ebindu biosi ebia lisanduku liamalako nende biosi ebilimwo, ebindu bia habundu hatakatifu nende ebimanulwa biaho.”

¹⁷OMWAMI Nyasaye naboolela Musa nende Haroni ari,

¹⁸“Shiolalekha abandu beshilibwa shia Kohatsi berwe,

¹⁹khulwa okhusita ahambi khubindu ebitakatifu bino tawe. Khulwa okhwikalila kano, Haroni nabasianibe balenjilanga mwiheema nokhuhelesia buli mundu omulimokwe nende eshia akhoyile okhuchinga.

²⁰Nebutswa abeshilibwa shia Kohatsi nibenjila mwiheema mana balola abesaaliisi nibakasinjia ebindu ebitakatifu ebio balafwa.”

²¹Mana OMWAMI Nyasaye naboolela Musa ari,

²²“Khandi obale aboluyia lwa Gerishoni mutsinzu tsiabwe nende mubiliibwa biabwe.

²³Okhurula khubemiyika amakhumi kataru okhuula khubemiyika amakhumi karano, abanyala okhukhalabana mwiheema litakatifu.

²⁴Chino nichio emilimo chiabwe mwiheema elo;

²⁵okhuchinganga tsingubo tsinzeleesia etsiokhwisanduku elia mwiheema litakatifu, eshifunikho shialio, nende eshifunikho shieliseelo linyushe eshili hekulu khulio. Nende tsingubo etsishinganga hamuliango kweliheema,

²⁶tsingubo etsielelanga mulwanyi olwabotokhana lisanduku nende eshimalilo shiemisango, ingubo eyishinganga hamuliango nende emikoye chialio nende ebimanulwa biosi ebikhoonyelungwa mwiheema elo. Abeshilibwa shia Gerishoni balakhola koosi akenyekha okhukholwa okhuloondana nebindu ebio.

²⁷Musa nende Haroni okhuula balole mbu abeshilibwa shia Gerishoni bakholile emilimo chiosi khandi bachinje buli shindu eshia Haroni nende abasianibe babalachilisia.

²⁸Echio nichio emilimo echia abeshilibwa shia Gerishoni batsia okhukhola mwiheema nibemililwe nende Itsamari omusiani wa Haroni.”

²⁹Khandi OMWAMI Nyasaye naboolela Musa ari, “Obale abeshilibwa shia Merari mubilibwa biabwe nende mutsinzu tsiabwe.

³⁰Obale abasaatsa boosi abali nemiyika amakhumi kataru okhuula amakhumi karano, abanyala okhukhalabana mwiheema litakatifu.

³¹Emilimo chiabwe mwiheema elo chilaba; okhuchinga tsimbao tsielisanduku liamalako, tsisheti tsialio, ebitiisi bialio nende ebichibi bialio,

³²nende khandi tsisiilo tsiolwanyi olwabotokhana liheema, nende ebichibi bialio, nebibambo bialio, nemikoye chialio, nende ebimanulwa bialio biosi, nende ebindi biosi; ne olachilisie buli omundu eshia akhoyeele okhuchinga.

³³Echio nichio emilimo echia abeshilibwa shia Merari balakwa okhukhola mwiheema nibemililwe nende Itsamari omusiani womwisaaliisi Haroni.”

³⁴Mana Musa nende Haroni nende abemilisi bomukanda nibabala abeshilibwa shia Kohatsi, mubilibwa biabwe nende mutsinzu tsiabwe;

³⁵Abasaatsa abali abemiyika amakhumi kataru okhuula amakhumi karano, abali nibanyala okhukhalabana mwiheema litakatifu,

³⁶nibabalilwe mubilibwa biabwe bali abandu ebikhumila bibili, nebikhumi musafu nende amakhumi karano (2,750)

³⁷Bano boosi nibo abomushilibwa shia Kohatsi abakhalabana mwiheema. Musa nende Haroni bababala nende okhubahandichisia shinga olwa OMWAMI Nyasaye yali niyabalachilisia okhubirira mu Musa.

³⁸Abeshilibwa shia Gerishoni babalwa mubilibwa biabwe nende mutsinzu tsiabwe.

³⁹Abasaatsa boosi abali bemiyika amakhumi kataru okhuula khubemiyika amakhumi karano, abakhalabana mwiheema litakatifu,

⁴⁰bali ebikhumila bibili nebikhumi bisasaba nende amakhumi kataru (2,630).

⁴¹Bano boosi nibo abomushilibwa shia Gerishoni abakhalabana mwiheema. Musa nende Haroni bababala shinga olwa OMWAMI Nyasaye yali niyalachilisia.

⁴²Abeshilibwa shia Merari babalwa mubilibwa biabwe nende mutsinzu tsiabwe.

⁴³Abasaatsa boosi abali abemiyika amakhumi kataru okhuula khubemiyika amakhumi karano, abakhalabana mwiheema litakatifu,

⁴⁴bali ebikhumila bitaru nebikhumi bibili, (3,200).

⁴⁵Bano boosi nibo abomushilibwa shia Merari abakhalabana mwiheema. Musa nende Haroni bababala shinga olwa OMWAMI Nyasaye yali niyalachilisia okhubirira khu Musa.

⁴⁶Kho Musa nende Haroni nende abemilisi ba Abaisiraeli babala Abalawi mutsinzu tsiabwe mubilibwa biabwe;

⁴⁷Abasaatsa boosi abali abemiyika amakhumi kataru okhuula khubemiyika amakhumi karano abakhalabana nende okhuchinga liheema litakatifu,

⁴⁸bali ebikhumila munane nebikhumi birano nende amakhumi munane (8,580).

⁴⁹Buli abeshilibwa bahebwa omulimo kwokhukhola nende eshiokhuchinga shinga olwa OMWAMI Nyasaye yali niyalachilisia okhubirira khu Musa. Kho babalwa bario shinga olwa OMWAMI Nyasaye yalachilisia Musa.