Read wanga OBUBALI 5 Bible Online

OBUBALI 5 - wanga bible

OBUBALI 5

¹Mana OMWAMI Nyasaye naboolela Musa ari,

²“Lachilisia abandu ba Isiraeli mbu barusie mukambi omundu yesi yesi ouli nobuchele, noho ouraatsanga, noho ouli owomusilo khulwa okhwitiisia khumulambo.

³Orusie abandu abo boosi elwanyi weikambi, kho mbu baleshe okhwonoonia ikambi ya emenyilemwo hakari wabandu banje.”

⁴Mana Abaisiraeli nibalonda lilako elo. Kho nibarusia abandu abo elwanyi weikambi shinga olwa OMWAMI Nyasaye yali nalachilisiye okhubirira khu Musa.

⁵Khandi OMWAMI Nyasaye naboolela Musa ari,

⁶“Boolela abandu ba Isiraeli mbu, lwomusaatsa noho omukhasi naba nakhaywa okhuba omwisiikwa khwisie, ne niyonoonela owashie mwikhuwa liosi liosi, owonoonile oyo aba neshikha.

⁷Ne okhuula yeyame obwonoonibwe obwo. Okhuula arunje omurungo kwosi khandi ameetekhwo eshitonye shiakharano, ahelesie owa yonoonele oyo khulwa obwonooni obwo.

⁸Nebutswa omundu owonoonelwa oyo, naba niyafwa, ne nabula omwikhowe wahambi ounyala okhurungwa omurungo okwo, kho kuba kulahaanwa khwisie OMWAMI Nyasaye okhuba kwomwisaaliisi. Omurungo okwo nokwokhumeeta khulimiiku liokhutisa obwonooni bwomundu oyo.

⁹Ebihaanwa biosi ebitakatifu ebia Abaisiraeli baahanila isie OMWAMI Nyasaye bilabetsanga ebiomwisaaliisi.

¹⁰Buli omwisaaliisi abiishe ebihaanwa birelilwe khuye.”

¹¹Mana OMWAMI Nyasaye naboolela Musa ari

¹²“Boolela abandu ba Isiraeli mbu, omukhasi yesi yesi owateshibwa, naba nakhaya okhuba omwisiikwa khumusaatsawe,

¹³ne naheya nomusaatsa undi, ne omusaatsawe mwene noho omundu undi yesi nalamanyakhwo ta, omukhasi oyo aba owomusilo kata nabulaho oumanyile likhuwa elo.

¹⁴Kho omusaatsawe naba nakanakania mumwoyokwe mbu, omukhasiwe aheyile, ne natiilwa neimbalikha noho napaaririisia mumwoyokwe mbu, omukhasiwe aheyile ne nalaheyile ta,

¹⁵kho boosi babili okhuula batsie khumwisaaliisi bamuyilile eshihaanwa shiomusango, njieshino mbu, eshitonye shielikhumi shiobuusie bweishayiri. Nebutswa bulatsokasibwamwo amafura noho okhurakhwo obubaane tawe, shichila nomusango kweimele kwomusaatsa oukanakania mumwoyokwe mbu omukhasiwe aheyile, nikwo omusango okukholwa khulwa okhumanyisia obwatoto bwelikhuwa elo.

¹⁶“Omwisaaliisi areere omukhasi oyo imbeli amusinjisia imbeli weshimalilo shiemisango.

¹⁷Mana omwisaaliisi oyo abukule amaatsi amatakatifu khushikaye, khandi abukulakhwo olufu oluli mubwelu bweliheema litakatifu nalura mumaatsi okhukakhola okhuba amalulu.

¹⁸Mana omwisaaliisi arimbulule liswi liomukhasi oyo imbeli weshimalilo, mana are omusango kweimele okwo mumakhono komukhasi oyo. Mana omwisaaliisi atiile mumakhonoke eshikaye shiamaatsi amalulu ako akareeranga eshilaamo shiobubi.”

¹⁹Mana omwisaaliisi akhole omukhasi oyo okwitsuba namuboolela ari, “Noba nolaheyilekhwo ta, kho shiolasalisibwa namaatsi akareranga eshilaamo eshibi kano tawe.

²⁰Nebutswa noba noheyile,

²¹OMWAMI Nyasaye akhole eliiralio okhuba eshilaamo eshiobubi mubandubo; khandi akhole eburiebwo okhwikhuuna nende indayo okhufwimba.

²²Amaatsi kano kenjile mundayo nikayikhola okhufimba khandi kakhole oburiebwo okhwikhuuna.” Mana omukhasi oyo akalusie naboola ari, “Amina! Amina!”

²³Mana omwisaaliisi ahandiche eshilaamo eshio mushitabu eshikanye, mana yoosie amahandiko ako mumaatsi amalulu akali mushikaye.

²⁴Omwisaaliisi anywesia omukhasi oyo amaatsi amalulu ako, nako kalamutsuunia inda obululu.

²⁵Mana omwisaaliisi abukule omusango kweimele okhurula mumakhono komukhasi oyo mana akuchele imbeli wanje isie OMWAMI Nyasaye, mana akuhaane khushimalilo shiemisango.

²⁶Mana omwisaaliisi afumbarekhwo obusie bwomusango kweimele okwo bube eshihaanwa shieshitsubo, mana abusambile khushimalilo shiemisango. Olunyuma lwako anywesie omukhasi oyo amaatsi amalulu ako.

²⁷Omukhasi oyo naba naheyile, amaatsi ako kalakhola indaye okhutsuuna obululu khandi okhufimba, khandi kalakhola oburiebwe okhwikhuuna. Eliiralie lilaba eshilaamo eshibi mubandube.

²⁸Nebutswa naba nalaheyile ta, shiaba alasalisibwa ta, khandi alanyala okhwibula abaana.

²⁹Elio nilio lilako khumukhasi owatekha naba naheya, ne niyeyonoonia omwene,

³⁰noho omusaatsa nakanakania mumwoyokwe mbu, omukhasiwe aheyile. Omwisaaliisi okhuula amureere imbeli wanje, mana amukholele aka lilako lino lilachilisinjia.

³¹Omusaatsa oyo alaba omulekhuule okhurula mubumayanu obwo, nebutswa omukhasiwe naba naheyile okhuula anyoole eshinyasio eshio.