Read wanga OBUBALI 6 Bible Online

OBUBALI 6 - wanga bible

OBUBALI 6

¹Mana OMWAMI Nyasaye naboolela Musa ari,

²“Boolela abandu ba Isiraeli mbu, omusaatsa noho omukhasi yesi yesi nalia eshitsubo eshia okhuba omunaziri[1] khulwa okhwiyahula omwene khwisie OMWAMI Nyasaye,

³shialanywakhwo idivai kata eshindu shiosi shiosi eshiemeesinjia ta, khandi alanywakhwo amaatsi kemitsabibu, noho okhuliakhwo emitsabibu emibisi kata emiumu tawe.

⁴Mubulamubwe bwosi, shialaliakhwo eshindu shiosi shiosi eshirulanga khumutsabibu noho khubufwa bwakwo noho amakhoba kakwo tawe.

⁵“Tsinyanga tsiosi etsia aba mushitsubo eshiokhuba omunaziri shialatumakhwo liswilie kata okhulibeka tawe. Khulwa tsinyanga tsiosi etsia aba niyeyaahula omwene khu OMWAMI Nyasaye alaba omutakatifu, khulweshio okhuula aleshe liswilie nende tsindefutsie okhurambiha.

⁶Tsinyanga tsiosi etsia yeyaahula omwene khulwa OMWAMI Nyasaye shialasitakhwo ahambi nende omulambo tawe.

⁷Kata samwana noho nyinamwana noho omusiani wabwe noho omukhaana wabwe nafwa; shialeyonooniakhwo omwene khulwa okhusita ahambi nemilambo chiabwe tawe, shichila eshilolelo shiokhwiyahulakhwe omwene khu Nyasaye shili khumurwekwe.

⁸Tsinyanga tsiosi etsia aba nali omunaziri ye nomutakatifu khwisie OMWAMI Nyasaye.

⁹“Ne omundu yesi yesi niyetsukhana yafwa matetekhana, omunaziri naliho, ne niyonoonia liswilie elia yaahulila OMWAMI Nyasaye, okhuula abeche liswilie elo khunyanga yamusafu eyili eyokhusiiywakhwe.

¹⁰Khunyanga yomunane okhuula areere amahusi kabili nende amakuuku kabili khumwisaaliisi habwinjililo bweliheema litakatifu.

¹¹Naye omwisaaliisi alahaana elala khulwa omusango kwobwonooni, ne elindi khulwa omusango omusambe, khulwa okhumutisa shichila yonoonile khulwa okhuba ahambi nomulambo. Khunyanga tsana eyo okhuula yaahule liswilie khandi,

¹²yeyaahule omwene khu OMWAMI Nyasaye khuluhoono olwa aba niyeyahula, khandi okhuula areere limiiku liomuyika mulala libe eliomusango kweshikha. Tsinyanga tsia yali niyamala nali omwahule shitsilabalwa tawe, shichila liswilie litakatifu lionoonibwa.

¹³“Tsinyanga tsia yetsuba okhuba omunaziri nitsihwele, okhuula akhole omusango. Atsie habwinjililo bweliheema litakatifu,

¹⁴mana yahaanile isie OMWAMI Nyasaye amakondi kataru akabulakhwo obulema bwosi kano, limiiku eliomuyika mulala khulwa omusango omusambe, lisubini eliomuyika mulala khulwa omusango kwobwonooni nende limiiku eiomusango kwokhureera omulembe.

¹⁵Khandi ahaane eshimwelo shiemikaate chibulamwo limela, namandazi akatsokasibwemwo amafura nende ebisikuti ebibashilwe amafura nende okhumeetakhwo ebihaanwa bialakwa ebieimele nende idivai.

¹⁶“Ne omwisaaliisi alahaana bino biosi khwisie OMWAMI Nyasaye, mana akhole omusango kwobwonooni nende omusango omusambe.

¹⁷“Alahaana limiiku elo khwisie okhuba omusango kwokhureera omulembe, mana alihaane halala neshimwelo shiemikaate eshio. Mana ahaane khandi ebihaanwa bieimele nende idivai.

¹⁸Omunaziri oyo alabechela liswilie habwinjililo bweliheema litakatifu, mana alire mumulilo okuba nikusambanga omusango kwokhureera omulembe okwo.

¹⁹“Omwisaalisi abukule eshiambeli shielimiiku elo nishiteshilwe, halala nende eliandasi nende omukaate mulala okubulamwo limela okhurula mushimwelo, nabira mumakhono komunaziri oyo.

²⁰Olunyuma lwako omwisaaliisi abichele imbeli wanje shinga omusango kwokhuchelwa; Nibio ebihaanwa ebitakatifu ebia omwisaaliisi, okhumeeta khu itakata nende eshiatakho shielimiiku ebialakwa mbu nebiomwisaaliisi. Olunyuma lwako omunaziri oyo anyala okhunywa idivai.

²¹“Kano niko amalako kabanaziri. Nebutswa omunaziri naba niyetsuba okhuhaana eshihaanwa eshikhongo eshishila eshihaanwa eshia akhoyile okhuhaana okhuula yosie habwene eshitsubo eshiaba niyetsuba eshio.”

²²Mana OMWAMI Nyasaye naboolela Musa ari,

²³“Boolela Haroni nabasianibe mbu olwa baba nibasabila abandu ba Isiraeli ikhabi baboolenje bari,

²⁴‘OMWANI Nyasaye amuhelesie ikhabi khandi amulinde.

²⁵OMWANI Nyasaye amukholele akeshisa nende akobukoosia.

²⁶OMWAMI Nyasaye amukholele amalayi khandi amuhelesie omulembe.’

²⁷“Nolwa balarumbula bario eliira lianje okhuba lietsikhabi khubandu ba Isiraeli, nasi nebahelesia tsikhabi.”