Read wanga OBUBALI 7 Bible Online

OBUBALI 7 - wanga bible

OBUBALI 7

¹Khunyanga eya Musa yali namalile okhusinjisia liheema litakatifu, yalitsushililakhwo amafura nende okhuliahula halala nende ebimanulwa bialio biosi, khandi natsushilile eshimalilo shiemisango amafura nende okhushiahula halala nende ebimanulwa biashio biosi.

²Khunyanga eyo, abamelisi ba Abaisiraeli abali abemilisi bebilibwa bia Abaisiraeli nende abemilisi betsimbia abasinjililanga abandu nibabalwa.

³Bareelera OMWAMI Nyasaye ebihaanwa. Bareera amakaari kasasaba nikafunikhwe, tsiheyi ekhumi natsibili; buli abemilisi babili bareranga likaari elala, ne buli shiamulala nareera iheyi ndala mana nibabihaana imbeli welisanduku liamalako.

⁴Mana OMWAMI Nyasaye naboolela Musa ari,

⁵“Ofuchilile ebihaanwa ebio okhurula khubo mbu bikhonyelwe khulwa obukhalabani bwomwiheema litakatifu; obihaane khu Abalawi buli mundu shinga lwobukhalabanibwe buli.”

⁶Mana Musa nabukula amakaari ako nende tsing'ombe etsio, ne natsihaana khu Abalawi.

⁷Yahelesia aboluyia lwa Gerishoni amakaari kabili nende tsiheyi tsine okhuloondana nobukhalabani bwabwe.

⁸Ne aboluyia lwa Merari yabahelesia amakaari kane nende tsiheyi munane okhuloondana nende obukhalabani bwabwe. Emilimo chiabwe chiosi chiemililwa nende Itsamari omusiani womwisaaliisi Haroni.

⁹Nebutswa Musa shiyahelesiakhwo aboluyia lwa Kohatsi likaari kata iheyi tawe, shichila ebindu ebitakatifu ebia balakwa okhulinda biali ebiokhuchinjilwa khumabeka.

¹⁰Mana abemilisi abo nibareera ebihaanwa khulwa okhwikhoyela okhwahulwa khweshimalilo shiemisango. Olwa bali nibakherechekha okhuhaana ebihaanwa biabwe hashimalilo shiemisango,

¹¹OMWAMI Nyasaye yaboolela Musa ari, “Baboolele mbu, buli khunyanga khulwa tsinyanga ekhumi natsibili, buli omwimilisi alahaana eshihaanwashie khulwa obwahuli bweshimalilo shiemisango.”

¹²Owahaana omusangokwe khunyanga yambeli yali Nashoni omusiani wa Aminadabu omwimilisi waboluyia lwa Yuda.

¹³Omusangokwe kwali; isahani yeifetsa eyobusiro obuhela ikilo ndala neinusu, eshikaye shieifetsa shiobusiro buhela tsikiramu ebikhumi munane (800) okhuloondana neshichelo shiarebwaho, biosi nibitsule obuusie obunyushe obutsokasiibwe namafura khulwa omusango kweimele.

¹⁴Khandi nahana eshikaye shilala shietsahabu eshiobusiro buhela tsikiramu eshikhumi shilala nende ekhumi (110) nishitsule obubane.

¹⁵Khandi nahaana ihunwa ndala, limiiku elala nende eshimeme shielikondi shiomuyika mulala khulwa omusango omusambe.

¹⁶Nende ikhole ndala khulwa omusango kwobwonooni,

¹⁷nende tsiheyi tsibili, amamiiku karano, tsikhole tsirano nende ebimeme biamakondi birano ebiomuyika mulala khulwa omusango kwokhureera omulembe. Kuno nikwo omusango okwa Nashoni omusiani wa Aminadabu yahaana.

¹⁸Khunyanga yakhabili owahana omusangokwe yali Natsanieli omusiani wa Zuari, omwimilisi waboluyia lwa Isakari;

¹⁹Omusangokwe kwali; isahani yeifetsa eyobusiro buhela ikilo ndala neinusu, eshikaye eshiobusiro buhela tsikiramu ebikhumi munane (800) okhuloondana nende eshichelo shiarebwaho, biosi nibitsule obuusie obunyushe obutsokasiibwe namafura khulwa omusango kweimele;

²⁰khandi nahana eshikaye shilala shieitsahabu eshiobusiro buhela tsikiramu eshikhumi shilala nelikhumi (110) nishitsulekhwo obubane.

²¹Khandi nahaana ihunwa ndala, nelimiiku elala eliomuyika mulala khulwa omusango musambe.

²²Nende ikhole ndala khulwa omusango kwobwonooni.

²³Nende tsiheyi tsibili, amamiiku karano, tsikhole tsirano nende amamiiku akomuyika mulala karano khulwa omusango kwokhureera omulembe. Kuno nikwo omusango okwa Netsanieli omusiani wa Zuari yahana.

²⁴Khunyanga yakhataru owahana omusangokwe yali Eliabu omusiani wa Heloni, omwimilisi waboluyia lwa Zebuluni:

²⁵Omusangokwe kwali isahani yeifetsa eyobusiro buhela ikilo ndala neinusu, libafu lieifetsa eliobusiro buhela tsikiramu ebikhumi munane (800), okhulondana nende eshichelo shiarebwaho, biosi nibitsulekhwo obusie obunyushe obutsokasiibwe namafura khulwa omusango kweimele.

²⁶Khandi nahana eshikaye shilala shietsahabu eshiobusiro buhela tsikiramu eshikhumi shilala nelikhumi (110) nishitsulekhwo obubane,

²⁷Khandi nahaana ihunwa ndala, ne limiiku lilala eliomuyika mulala khulwa omusango musambe.

²⁸Nende ikhole ndala khulwa omusango kwobwonooni,

²⁹nende tsiheyi tsibili, amamiiku karano tsikhole tsirano nende amamiiku komuyika mulala karano khulwa omusango kwokhureera omulembe. Kuno nikwo omusango kwa Eliabu omusiani wa Heloni yahana.

³⁰Khunyanga yakhane owahana omusangokwe yali Elizuri omusiani wa Shedeuri, omwimilisi wabaluyia lwa Rubeni.

³¹Omusangokwe kwali, isahani yeifetsa eyobusiro buhela ikilo ndala neinusu, olukaraya lweifetsa lwobusiro buhela tsikiramu ebikhumi munane (800), okhulondana nende eshichelo shiarebwaho, biosi nibitsule obusie obunyushe obutsokasiibwe namafura khulwa omusango kweimele.

³²Khandi nahana eshikaye shilala shietsahabu eshiobusiro buhela tsikiramu eshikhumi shilala nelikhumi (110) nishitsulekhwo obubane.

³³Khandi nahaana ihunwa ndala nelimiiku lilala eliomuyika mulala khulwa omusango musambe.

³⁴Nende ikhole ndala khulwa omusango kwobwonooni;

³⁵Nende tsiheyi tsibili, amamiiku karano, tsikhole tsirano nende amamiiku komuyika mulala karano khulwa omusango kwokhureera omulembe. Kuno nikwo omusango kwa Elizuri omusiani wa Shedeuri yahana.

³⁶Khunyanga yakharano owahana omusangokwe yali Shelumieli omusiani wa Zurishadai omwimilisi waboluyia lwa Simeoni.

³⁷Omusangokwe kwali; isahani yeifetsa eyobusiro buhela ikilo ndala neinusu, libafu lieifetsa eliobusiro buhela tsikiramu ebikhumi munane (800) okhulondana nende eshichelo shiarebwaho, biosi nibitsule obusie obunyushe obutsokasiibwe namafura khulwa omusango kweimele.

³⁸Khandi nahana eshikaye shilala shietsahabu eshiobusiro buhela tsikiramu eshikhumi shilala nelikhumi (110) nishitsulekhwo obubane.

³⁹Khandi nahaana ihunwa ndala nelimiiku lilala eliomuyika mulala khulwa omusango musambe.

⁴⁰Nende ikhole ndala khulwa omusango kwobwonooni,

⁴¹nende tsiheyi tsibili, amamiiku karano, khulwa omusango kwokhureera omulembe. Kuno nikwo omusango kwa Shelumieli omusiani wa Zurishadai yahana.

⁴²Khunyanga ya khasasaba owahana omusangokwe yali Elisafu omusiani wa Deweli, omwimilisi waboluyia lwa Gadi.

⁴³Omusangokwe kwali; isahani yeifetsa eyobusiro buhela ikilo ndala neinusu, olukaraya lwobusiro buhela tsikiramu ebikhumi munane (800), okhulondana nende eshichelo shiarebwaho, biosi nibitsule obusie obunyushe obutsokasiibwe namafura khulwa omusango kweimele:

⁴⁴Yahana eshikaye shilala shietsahabu eshiobusiro buhela etsikiramu eshikhumi shilala nelikhumi (110) nishitsulekhwo obubane.

⁴⁵Khandi nahaana ihunwa ndala, nelimiiku lilala eliomuyika mulala khulwa omusango omusambe.

⁴⁶Nende ikhole ndala khulwa omusango kwobwonooni;

⁴⁷Nende tsiheyi tsibili, amamiiku karano, tsikhole tsirano, nende amamiiku komuyika mulala karano khulwa Omusango kwokhureera omulembe. Kuno nikwo okwali omusango kwa Eliasafu omusiani wa Deneli yahana.

⁴⁸Khunyanga yomusafu owahana omusangokwe yali Elishama omusiani wa Amihudi, omwimilisi waboluyia lwa Efuraimu.

⁴⁹Omusangokwe kwali isahani yeifetsa eyobusiro buhela ikilo ndala neinusu, olukaraya lweifetsa lwobusiro buhela tsikiramu ebikhumi munane (800) okhulondana neshichelo shiarebwaho, biosi nibitsule obusie obunyushe obutsokasiibwe namafura khulwa omusango kweimele.

⁵⁰Khandi nahana eshikaye shilala shietsahabu eshiobusiro buhela etsikiriamu eshikhumi shilala nelikhumi (110) nishitsulekhwo obubane.

⁵¹Khandi nahaana ihunwa ndala, ne limiiku lilala eliomuyika mulala khulwa omusango musambe,

⁵²nende ikhole ndala khulwa omusango kwobwonooni,

⁵³nende tsiheyi tsibili, amamiiku karano, tsikhole tsirano nende amamiiku komuyika mulala karano khulwa omusango kwokhureera omulembe. Kuno nikwo omusango okwa Elishama, omusiani wa Amihudi yahaana.

⁵⁴Khunyanga yomunane owahana omusangokwe yali Gamalieli omusiani wa Pedahazuri, omwimilisi waboluyia lwa Manase.

⁵⁵Omusangokwe kwali; isahani yeifetsa eyobusiro buhele ikilo ndala neinusu, olukaraya lwobusiro buhela tsikiramu ebikhumi munane (800) okhulondand nende eshichelo shiarebwaho, biosi nibitsulekhwo obusie obunyushe obutsokasiibwe namafura khulwa omusango kweimele.

⁵⁶Khandi nahana eshikaye shilala eshietsahabu eshiobusiro buhela etsikiramu eshikhumi shilala nelikhumi (110) nishitsulemwo obubane.

⁵⁷Khandi nahaana ikhunwa ndala, nelimiiku lilala eliomuyika mulala khulwa omusango musambe.

⁵⁸Nende ikhole ndala khulwa omusango kwobwonooni,

⁵⁹Nende tsiheyi tsibili, amamiiku karano, tsikhole tsirano, nende amamiiku komuyika mulala karano khulwa omusango kwokhureera omulembe. Kuno nikwo omusango okwa Gamalieli omusiani wa Padahazuri yahana.

⁶⁰Khunyanga ya shienda owahana omusangokwe yali Abidani omusiani wa Gideoni, omwimilisi waboluyia lwa Benjamini;

⁶¹Omusangokwe kwali isahani yeifetsa eyobusiro buhela ikilo ndala neinusu, libafu eliobusiro buhela tsikiramu ebikhumi munane (800) okhulondana nende eshichelo shiarebwaho, biosi nibitsulekhwo obusie obunbyushe obutsokasiibwe namafura khulwa omusango kweimele.

⁶²Khandi nahana eshikaye shilala shietsababu eshiobusiro buhela tsikiramu eshikhumi shilala nelikhumi (110) nishitsulekhwo obubane

⁶³khandi nahaana limiiku lilala eliomuyika mulala khulwa omusango musambe.

⁶⁴Nende ikhole ndala khulwa omusango kwobwonooni.

⁶⁵Nende tsiheyi tsibili, amamiiku karano, tsikhole tsirano, nende amamiiku komuyika mulala karano khulwa Omusango kwokhureera omulembe. Kuno nikwo omusango okwa Abidani omusiani wa Gideoni yahana.

⁶⁶Khunyanga yelikhumi owahana omusangokwe yali Ahiezeri omusiani wa Amishadayi omwimilisi waboluyia lwa Dani.

⁶⁷Omusangokwe kwali; isahani yeifetsa eyobusiro buhela ikilo ndala neinusu, libafu eliobusiro buhela tsikiramu ebikhumi munane (800), okhulondana nende eshichelo shiarebwaho, biosi nibitsule obusie obunyushe obutsokasiibwe namafura khulwa omusango kweimele.

⁶⁸Khandi nahana eshikaye shilala shietsahabu eshiobusiro buhela etsikiramu eshikhumi shilala nelikhumi (110) nishitsulekhwo obubane.

⁶⁹Khandi ihunwa ndala, nelimiiku lilala eliomuhika mulala khulwa omusango musambe.

⁷⁰Nende ikhole ndala khulwa omusango kwobwonooni.

⁷¹Nende tsiheyi tsibili, amamiiku karano, tsikhole tsirano nende amamiiku komuyika mulala karano, kuno nikwo omusango kwa Ahiezeri omusiani wa Amishadayi yahana.

⁷²Khunyanga yelikhumi nandala owahana omusangokwe yali Pagieli omusiani wa Okurani, omwimilisi waboluyia lwa Asheri;

⁷³Omusangokwe kwali; isahani yeifetsa eyobusiro buhela ikilo ndala neinusu, olukaraya lweifetsa lwobusiro buhela tsikiramu ebikhumi munane (800), okhulondana nende eshichelo shiarebwaho, biosi nibitsule obusie obunyushe obutsokasiibwe namafura khulwa omusango kweimele.

⁷⁴Khandi nahana eshikaye shilala shietsahabu eshiobusiro buhela tsikiramu eshikhumi nelikhumi (110) nishitsulekhwo obubane.

⁷⁵Khandi nahaana ikhunwa ndala, nelimiiku lilala eliomuyika mulala khulwa omusango musambe.

⁷⁶Nende ikhole ndala khulwa omusango kwobwonooni.

⁷⁷Nende tsiheyi tsibili, amamiiku karano, tsikhole tsirano nende amamiiku komuyika mulala karano khulwa Omusango kwokhureera omulembe, kuno nikwo omusango kwa Pagieli omusiani wa Okurani yahana.

⁷⁸Khunyanga yelikhumi na khabili owahana omusangokwe yali Ahira omusiani wa Enani, omwimilisi waboluyia lwa Nafutali.

⁷⁹Omusangokwe kwali; isahani yeifetsa eyobusiro bwayo bwali ikilo ndala neinusu, olukaraya lweifetsa lwobusiro bwalwo bwali tsikiramu ebikhumi munane (800), okhulondana nende eshichelo shiarebwaho, biosi nibitsulekhwo obusie obunyushe obutsokasiibwe namafura khulwa omusango kweimele.

⁸⁰Khandi nahana eshikaye shilala shieitsahabu eshiobusiro buhela tsikiramu eshikhumi nelikhumi (110) nishitsulekhwo obubane.

⁸¹Khandi nahaana ihunwa ndala, nelimiiku lilala eliomuyika mulala khulwa omusango musambe.

⁸²Nende ikhole ndala khulwa omusango kwobwonooni.

⁸³Nende tsiheyi tsibili, amamiiku karano, tsikhole tsirano nende amamiiku komuyika mulala karano. Kuno nikwo omusango kwa Ahira omusiani wa Enani yahana.

⁸⁴Bino nibio ebiali ebihanwa ebia abemilisi ba Abaisiraeli bahaana khunyanga eya eshimalilo shiemisango shiahulwa nishitsushililwakhwo amafura mbu; tsisahani tsieifetsa ekhumi natsibili, ebikaye ebia eifetsa ekhumi nabibili, ebikaye bieitsahabu ekhumu nabibili.

⁸⁵Buli isahani yeitsahabu yali nobusiro buhela ikilo ndala neinusu, ne buli eshikaye eslna ifetsa shiali eshiobusiro buhela tsikiramu ebikhumi munane (800). Ebimanulwa biosi biefetsa biali ebiobusiro buhela tsikilo amakhumi kabili, netsikiramu ebikhumi bisasaba (27.6 Kg), okhulondana nende eshichelo shiarebwaho.

⁸⁶Ebikaya bie tsahabu nibitsulekhwo obubane biosi biali ebiobusiro buhela ikilo ndala netsikiramu ebikhumi bitaru namakhumi kabili (1.32 Kg) okhulondana neshichelo shiarebwaho.

⁸⁷Emiruko chiosi echiomusango musambe chiali tsihunwa ekhumi natsibili, amamiiku ekhumi nakabili, amamiiku komuyika mulala ekhumi nakabili, halala nende ebihaanwa biabwe bieimele. Natsio tsikhole ekhumi natsibili tsiali tsiomusango kwobwonooni.

⁸⁸Ne emiruko chiosi echiomusango kwokhureera omulembe chiali tsihunwa amakhumi kabili na tsine, amamiiku amakhumi kasasaba, tsikhole amakhumi kasasaba nende amamiiku komuyika mulala amakhumi kasasaba. Kuno nikwo omusango kwahaanwa olwa eshimalilo shiemisango shiali nishiahulwe nende nishitsushililwekhwo amafura.

⁸⁹Ne olwa Musa yenjila mwiheema litakatifu okhuboola nende OMWAMI Nyasaye, yahulila OMWAMI Nyasaye naboola ninaye okhurula hekulu khushifunikho eshili khwisanduku lieindakano elili hakari webilonje bietsimbaha bibili.