Read wanga OBUBALI 8 Bible Online

OBUBALI 8 - wanga bible

OBUBALI 8

¹Mana OMWAMI Nyasaye nalachilisia Musa ari,

²“Boolela Haroni mbu olwa aba narenjekha, tsitaha musafu khushichibi, atsirenjeshe tsiashie imbeli washio.”

³Mana Haroni nakhola ario; narenjekha tsitaha etsio okhwakha imbeli webichibi ebio shinga olwa OMWAMI Nyasaye yali nalachile Musa.

⁴Ne eshichibi eshio shiakasibwa shirinanwa mbu, okhurula ikulu washio okhuula hasi washio shiali nishieranywa khutsahabu shinga OMWAMI Nyasaye yali namanyiye Musa.

⁵OMWAMI Nyasaye naboolela Musa ari,

⁶“Yaahula Abalawi okhurula mubandu aba Isiraeli mana obasiiye

⁷munjila yino; obahanyekhwo amaatsi kokhusiiywa mana obaboolele babeche emibili chiabwe chiosi khandi bafuye tsingubo tsiabwe. Mana balaba abasiiye.

⁸Mana babukule ihunwa nende obusie obunyushe bwomusango kweimele obutsokasiibwemwo amafura. Nawe obukule ihunwa yindi khulwa omusango kwobwonooni.

⁹Mana okhung'asie halala omukanda kwosi okwa Abaisiraeli, ne osinjisie Abalawi imbeli weliheema lianje litakatifu.

¹⁰Mana Abaisiraeli batiile emikhono chiabwe khumirwe chia Abalawi.

¹¹Mana Haroni ahaane Abalawi khwisie OMWAMI Nyasaye, babe omusango kwokhuchelwa okhurula mu Abaisiraeli, kho mbu bakhalabane emilimo chianje.

¹²Mana Abalawi batiile emikhono chiabwe khumirwe chietsihunwa tsibili etsio, ndala yilahaanwa khulwa omusango kwokhurusiaho obwonooni, nayo eyindi eyo shinga omusango omusambe khulwa okhusiiya Abalawi.

¹³“Mana wahule Abalawi okhuba omusango okwokhuchela khwisie, mana okhole Haroni nabasianibe okhuba abasinjilili babwe.

¹⁴Waahule Abalawi orio okhurula mu Abaisiraeli, kho mbu babe abanje.

¹⁵Olunyuma lwokhubasiiya nende okhubahula nilwo olwa balaba abakwanile okhukhalabanila mwiheema litakatifu.

¹⁶Ebahuule okhuba abanje inziayo mushilenje shiabekulanda abasiani ba Abaisiraeli.

¹⁷Olwa ndeera abekulanda boosi Misiri, ndaahula abasiani abekulanda boosi aba Abaisiraeli nende buli eshikulanda shiemiruko chiabwe okhuba ebianje.

¹⁸Ne bulano embukule Abalawi mushilenje shiabaana abekulanda bomubandu ba Isiraeli,

¹⁹Khandi ndahanile Abalawi khu Haroni nabasianibe okhuba eshihaanwa okhurula mubandu ba Isiraeli, khulwa okhukhalabanila Abaisiraeli mwiheema litakatifu nende okhubaterera okhurula mumanyakhano akanyala okhubanyoola nibakhasita ahambi khwiheema litakatifu.”

²⁰Kho Musa, nende Haroni nende abomukanda kwa aba Isiraeli boosi nibahula Abalawi, shinga olwa OMWAMI Nyasaye yali nalachilisiye Musa.

²¹Kho Abalawi nibesiiya abeene, nibafuya ebifwalo biabwe mana Haroni nabahaana okhuba omusango kwokhuchelwa imbeli ewa OMWAMI Nyasaye. Khandi Haroni nabakholela omulukha okwokhusiiywa.

²²Mana abandu nibakhola koosi aka OMWAMI Nyasaye yali nalachilisiye Musa okhulondokhana nende Abalawi. Kho Abalawi nibakhalabana mwiheema litakatifu hasi wa Haroni nabasianibe.

²³Mana OMWAMI Nyasaye naboolela Musa ari,

²⁴“Abalawi okhurula khubemiyika amakhumi kabili nachirano okhuula bakhalabane mwiheema litakatifu.

²⁵Nibakhoola emiyika amakhumi karano okhuula baleshe okhukhalabana mwiheema elo.

²⁶Abokhurula khumiyika amakhumi karano abo banyala okhukhonyelela Abalawi bashiabwe mwiheema, nebutswa bo abeene shibalakholakhwo omulimo kwosi tawe. Munjila yino nolwa alakabila Abalawi emilimo chiabwe.”