Read wanga OBUBALI 9 Bible Online

OBUBALI 9 - wanga bible

OBUBALI 9

¹Mana OMWAMI Nyasaye naboola nende Musa mushitsiimi eshia Sinai, mumwesi kwokhuranga mumuyika kwakhabili okhurula Abaisiraeli nibarula Misiri, naboola ari,

²“Abandu ba Isiraeli okhuula bakhole lisabo lia Pasaka mubise bialio ebiahulwa.

³Okhuula bakhole lisabo lia Pasaka khungoloobe khweinyanga yekhumi nakhane yomumwesi kuno nibalondanga amalako nende amalachilisio kayo koosi.”

⁴Kho Musa naboolela Abaisiraeli okhukhola lisabo lia Pasaka.

⁵Mana khungoloobe omwesi okwokhuranga okwo nikuli ekhumi nakhane Abaisiraeli bakhola lisabo lia Pasaka mushitsiimi shia Sinai. Abaisiraeli bakhola buli shindu shinga olwa OMWAMI Nyasaye yali nalachilisiye Musa.

⁶Nebutswa baliho abasaatsa bandi abali nibali abomusilo shichila bali nibatilile khumulambo, kho nibalanyalilwa okhukhola lisabo lia Pasaka khunyanga eyo tawe. Kho nibetsa imbeli wa Musa nende Haroni,

⁷nibaboola bari, “Khuli abomusilo, shichila khwatiilile khumilambo, ne mbushiina nikhukaywa okhukhola omusango okwa OMWAMI Nyasaye khunyanga yakwo halala nabandu ba Isiraeli?”

⁸Naye Musa nabakalusia ari, “Linde mbelio embulile elia OMWAMI Nyasaye atsia okhulaka khwinywe.”

⁹OMWAMI Nyasaye naboolela Musa ari,

¹⁰“Boolela Abaisiraeli mbu, omundu yesi khwinywe noho owomulwibulo lwenywe nali owomusilo khulwa okhutiila khumulambo noho nali ehale muluchendo alafuchililwa okhukhola lisabo lia Pasaka.

¹¹Okhuula alikhole khungoloobe omwesi kwakhabili nikuli ekhumi nakhane. Okhuula mulilie halala nemikaate chibulamwo limela nende tsifwa ntsindulu.

¹²Ne balalekhakhwo eshitonye shiosi shiosi okhukona okhuula okhushia kata okhutonyolakhwo eshikumba shielikondi elo tawe. Mukhole lisabo lia Pasaka elo nimulonda amalako kalio koosi.

¹³Nebutswa omundu yesi omusiiye khandi oulali ehale muluchendo ta, nalakhola lisabo lia Pasaka ta, omundu oyo alarusibwa mubandube, shichila shiahaanile eshihaanwashie khubise bielisabo lia Pasaka tawe. Kho omundu oyo okhuula yetushe obwonoonibwe obwo.

¹⁴Omurende yesi niyamenya mwinywe naba niyenya okhukhola lisabo lia Pasaka, okhuula alikhole nalonda amalachilisio nende amalako kalio koosi. Amalako kalio kali khubandu boosi babe abebule kata abarende.”

¹⁵Khunyanga yeliheema litakatifu liasinjisibwa, lileesi lietsa nilliifunikha liosi. Mushilo lileesi elo liafwananga shinga omulilo.

¹⁶Nolwa kali kario buli inyanga, lileesi elo lialifunikhanga mushiteere, ne mushilo lialolekhanga shinga omulilo.

¹⁷Ne buli olwa lileesi elo liarulanga khwiheema elo, Abaisiraeli basumukhanga oluchendo lwabwe, ne habundu aha lileesi elo liayelanga, niho aha bakhomanga ikambi yabwe.

¹⁸Khulilako elia OMWAMI Nyasaye, Abaisiraeli basumukhanga, khandi khulilakolie, bakhomanga ikambi yabwe. Ne khulwa oluhoono lwelileesi lialinji niliyelile khuliheema litakatifu, Abaisiraeli bamenyanga mukambi eyo.

¹⁹Kata olwa lileesi elo liashindanga khwiheema elo tsinyanga tsinyinji Abaisiraeli baloondanga lilako elia OMWAMI Nyasaye, kho shibasumukhanga okhutsia tawe.

²⁰Ebise bindi lileesi lialinji khwiheema tsinyanga tsindiiti, ne shinga lilako elia OMWAMI Nyasaye liba nilili Abaisiraeli bamenyanga mukambi yabwe, ne khandi shinga OMWAMI Nyasaye alaka nilwo olwa basumukhanga.

²¹Ne ebise bindi lileesi lialinjiho okhurula khungoloobe okhuula olwa bushia, ne olwa liarulanga nibushiele, nilwo olwa boosi basumukhanga. Buli olwa lileesi elo liarulangaho boosi basumukhanga.

²²Lileesi elo niliatsiilililanga okhubaho khulwa tsinyanga tsibili noho omwesi noho kata omuyika, noho kata okhubisiaho, olwa liba nilishili khwiheema Abaisiraeli batsiilililanga okhumenya mukambi, nebutswa olwa liarulangaho ne boosi basumukha.

²³Khulilako elia OMWAMI Nyasaye bakhomanga ikambi yabwe, khandi khulilako elia OMWAMI Nyasaye basumukhanga okhutsia; Baloondanga aka OMWAMI Nyasaye yabalachilisinjia okhubirira khu Musa.