Read wanga MIKA 1 Bible Online

MIKA 1 - wanga bible

MIKA 1

¹Kano niko aka OMWAMI Nyasaye yaboolela omulakusi Mika, owali niyamenya Moreshetsi mutsinyanga tsioburuchi bwa Yotsamu, obwa Ahazi nende obwa Hezekia mushialo shia Yuda. Mika yabisulilwa amakhuwa kano koosi khwitookho lia Samaria nende elia Yerusalemu.

²Hulile kano inywe abandu boosi. Recheresie kano inywe eshialo shiosi nende biosi ebilimwo, OMWAMI Nyasaye yetsanga okhubayaasia, OMWAMI Nyasaye aboola nali muhekaluye indakatifu.

³Tooto mwene OMWAMI Nyasaye yetsanga okhurula mushimenyoshie, aleekha hasi nachenda khubutenje bweshialo.

⁴Ebikulu bilasalulukha imbeliwe shinga ihula mumulilo, bilabungulukha hasi shinga amaatsi akakholomokha okhurula mushikulu.

⁵Ako koosi kakhekholeshe khulwobumayanu bwabolwibulo lwa Yakobo, khandi khulwobwonooni bwaboluyia lwa Isiraeli. Ne obumayanu bwabolwibulo lwa Yakobo buli heena? Buli mwitookho liabwe likhulundu lia Samaria. Ne obumayanu bwa Yuda buli heena? Buli mwitookho likhongo lia Yerusalemu.

⁶Khulweshio, isie OMWAMI Nyasaye emboola endi, “Ndalakhola litookho lia Samaria okhuba eshibunjikho shiamachinjini mumikunda, ndalalikhola okhuba habundu hokhuraka emitsabibu. Ndalakafuuba mwibanda amachina kekhoonyelwa okhuliumbakha, khandi ndalalikulula emise chialio.

⁷Ndalatubula ebifwanani biabanyasaye balio biosi, inganga yalio yosi yilasambwa nomulilo, nabio ebifwanani bialio bilasasibwa biosi pe. Okhuba liabibunjelesia okhurulana khubutamba, khandi biakhekhoonyelwe khulwa okhurunga obutamba.”

⁸Khulwa okhubeela amakhuwa ako, isie Mika ndalalila nindikhuula. Ndalachenda eshiechenye khandi ebilenje ebikhaya. Ndalekhuula shinga amabwe, khandi ndalakhupa tsimbungu shinga amahuto.

⁹Amafumire ka Samaria shikanyala okhuhona ta, nashio eshialo shia Yuda shiosi shilafumirwa shirio. Amafumire ako kamalile okhuula khubiliibwa bia Yerusalemu, ewa abandu banje bamenyanga.

¹⁰Shimulaboolekhwo amakhuwa ako mwitookho lia Gatsi tawe. Shimulekhuulekhwo kata nahatuutu tawe. Nimuli Betsi-le-afura, mukalakale mulufu, khulwokhulolesia eshibeela shienywe.

¹¹Inywe abandu abamenya Shafiri, bire mutsie mubuhambe, tsie nimuli eshiechenye khandi mushifwimbwa murwe, nenywe abamenya Zaanani shimularulekhwo elwanyi welitookho lienywe tawe. Abandu ba Betsi-ezeli bekhuula, obukhoonyi bwabwe khwinywe bwarusibweho.

¹²Abandu ba Marotsi baliindililanga obukhoonyi nomwoyo kwosi, nebutswa obumululwi bwitsile okhurula khu OMWAMI Nyasaye, buli ahambi neshiliibwa shielitookho lia Yerusalemu.

¹³Inywe abamenya Lakishi, bohe tsifarasi tsienywe khumakaari akelihe. Inywe mwakhola obwonooni bwabandu ba Zayuni bakhola, obumayanu bwabandu ba Isiraeli bakhola buli khwinywe.

¹⁴Khulweshio mulasebulana nende okhulekhana nabandu ba Moreshetsi-Gatsi. Nabo abelitookho lia Akizibu shibalakhoonyakhwo abaruchi ba Isiraeli tawe.

¹⁵Inywe abandu ba Maresha, Nyasaye alamuhaana mumakhono kabasuku abaleetsa okhumutiila. Abaruchi ba Isiraeli balebisa mumbinga etsili Adulamu.

¹⁶Inywe abandu ba Yuda, beche olwaale, khulwa okhwikhuula abaana benywe ba mwaheela. Mukaliyie ebiole bienywe shinga bietsingosia, okhuba abaana benywe balatiilwa nibayilwa mubuhambe.