Read wanga MIKA 2 Bible Online

MIKA 2 - wanga bible

MIKA 2

¹Bali mushilaamo shiobubi abaloosinjia okhukhola obumayanu, abeyalisinjia mubitali eshilo nibayililisia akobumayanu. Olwa bushietsanga butswa, nibakhola obumayanu obwo, shichila bali nobunyali bwokhubukhola.

²Bekomba emikunda nende okhuchibukula, bekomba tsinzu nende okhutsibukula. Basandinjia omundu nende abeinzuye, khandi bayaayanga emianduchie chiosi.

³Khulweshio OMWAMI Nyasaye aboola ari, “Ndirecheeshe okhumureerera obumululwi, ne shimulehonokosiamwo tawe. Shimulachendakhwo neyisunga ta, okhuba eshio shilaba eshise shiamatinyu khwinywe.

⁴Khunyanga eyo abandu bakhamunyokhoosie nolwimbo, bakhalile nibekhuula obululu nibaboola bari, ‘Khumuluulwe pe! OMWAMI Nyasaye abukuule eshialo shiefwe, tooto mwene ashirusiye mumakhono kefwe. Akabuliile abo abakhuyila mubuhambe emikunda chiefwe.’ ”

⁵Khulweshio inywe shimwakhakabwekhwo omukabo kwosi kwomukunda, olwa abandu ba OMWAMI Nyasaye bakhakalusilibwe emikunda chiabwe tawe.

⁶Abandu bamboolelanga bari, “Shiolakhuyaalila ta, shiolakhuyaalila amakhuwa ako ta, Nyasaye shialakhufwimbia omurwe tawe.

⁷Tooto bwene muli habwene okhuboola murio inywe aboluyia lwa Yakobo? OMWAMI Nyasaye akhaleshile okhwifwilakhwe noho? Tooto mwene anyala okhukhola amakhuwa shinga ako noho? Tawe! Amakhuwa kanje naketsikhabi khu abakholanga akobulunjishi.”

⁸Nebutswa OMWAMI Nyasaye ababoolela ari, “Inywe museeranga abandu banje shinga abaseera abasuku, munuulanga abandu abaholo ebifwalo biabwe, abandu ababira butswa nibatsia mutsingo tsiabwe, abalapaarangakhwo khukelihe tawe.

⁹Inywe mwaloonda abakhasi babandu banje okhurula mutsinzu tsiabwe tsindayi, abaana babwe abatuutu mwabarusiakhwo oluyali lwanje khulwa inziayo.

¹⁰Rule mutsie, hano shimuliho nende habundu ahokhuhulushila tawe. Obwonooni bwenywe bwokhubula okhuba abesiikwa, nibwo obuchila nimumululwa mwesi pe.

¹¹Omulakusi niyakhabeleho ouchenda naboola amakhuwa amakhaya akobubeeyi, ari, ‘Emulakulila mbu, namube nende idivai nende amalwa kokhumeesia mubunji,’ abandu bano bakhachamile muno omundu shinga oyo.

¹²“Nebutswa ndalamukhung'asia inywe abolwibulo lwa Yakobo, ndalamukhung'asia inywe abandu ba Isiraeli abasikala, ndalamureera halala shinga amakondi mushitioli, shinga omukanda omukhongo kwamakondi mushiayo, nenyu mulaba khandi abandu abanji.”

¹³Oyo owakhabekulile eshibanga yakhabaranjilile, nabo bakhafunache eshiliibwa shielitookho nibarula elwanyi, bakhabire nibatsia elwanyi. Omuruchi wabwe yakhabaranjilile, OMWAMI Nyasaye mwene yakhabaranjilile.