Read wanga MIKA 3 Bible Online

MIKA 3 - wanga bible

MIKA 3

¹Hulile inywe abemilisi bolwibulo lwa Yakobo, hulile inywe abarukanga abandu ba Isiraeli! Ninywe abakhoyile okhumanya aka habwene,

²nebutswa inywe mwaloba amalayi, nimuheela amabi. Murusinjia likhoba khubandu banje, nimurandula inyama khumakumba kabwe.

³Inywe muliitsanga inyama ya bandu banje, nimurandula likhoba okhurula khumibili chiabwe. Mufunakanga amakumba kabwe, nimukatonyamwo ebitonye shinga inyama yokhuteekhwa.

⁴Eshise shitsanga eshia mwakhamuhaabile OMWAMI Nyasaye, nebutswa shiyakhamuhabine tawe. Yakhabise obwenibwe eshise eshio, shichila mwamala okhukhola obwonooni.

⁵Khulweshio OMWAMI Nyasaye aboola khubalakusi bakoyasinjia abandube, abalakusi abalakulanga akomulembe olwa bahebwa omurungo, nebutswa nibalahebwa omurungo ta, balakula akamariisia nende akelihe, ari;

⁶“Inywe abalakusi, eshilo shilamwitsila, nebutswa shimulalola amalolelo ta, eshiilima shilamwitsila, nebutswa shimulakhola obulakusi tawe. Eliuba lilayeela ninenywe, nashio eshiteere shilakwa eshilo khwinywe.”

⁷Abalakusi balatiilwa netsisoni, nabo abafumu nibafwimbibwa omurwe. Boosi balaholeela tsi, okhuba shibalanyoolakhwo likalusio liosi liosi okhurula khu Nyasaye tawe.

⁸Nebutswa OMWAMI Nyasaye yanzitsusiyemwo obunyali, nende Rohowe. Yanyaliile okhumanya obukhalachi bwa habwene nende okhumbelesia obunyali bwokhuboolela abolwibulo lwa Yakobo obumayanu bwabwe, khandi okhuboolela abandu ba Isiraeli obwonooni bwabwe.

⁹Hulile amakhuwa kano inywe abemilisi babolwibulo lwa Yakobo, recheresie inywe abaruchi babandu ba Isiraeli, inywe abasila akobwatooto, khandi abashiaminjia amalayi.

¹⁰Inywe abombakhanga litookho lia Zayuni neshitsayi, nende litookho lia Yerusalemu nobusandibwi.

¹¹Abayaasi babwe bayaasinjia khulwa eshiomufuusi, nabo abesaaliisi bechesinjia khulwa omurungo, nabo abalakusi balakulanga khulwamapeesa. Kata kario beyitsialanga nibaboola bari, “OMWAMI Nyasaye shiali mwifwe noho? Shikhulanyoolakhwo amatinyu koosi ta.”

¹²Kho khulwa okhubeela inywe, litookho lia Zayuni lilalimwa shinga omukunda. Yerusalemu lilakwa likunda, nashio eshikulu shieihekalu yombakhwakhwo shilakwa omutsuru.